រាជធានីភ្នំពេញ ៖ ខេត្តព្រះសីហនុបច្ចុប្បន្នកំពុងវិវត្តន៍ខ្លួនបណ្ដើរៗក្លាយជាប៉ូលសេដ្ឋកិច្ចទី២នាពេលដ៏ខ្លីខាងមុខ បន្ទាប់ពីរាជធានីភ្នំពេញ ខណៈដែលវិនិយោគិនបរទេស ពិសេសវិនិយោគិនចិនបាននិងកំពុងសម្រុកសាងសង់គម្រោងជាច្រើននៅតំបន់នោះ ។ សក្តានុពលខេត្តនេះត្រូវគេមើលឃើញដោយផ្ទាល់ភ្នែក ដោយមានតំបន់ឆ្នេរដ៏ទាក់ទាញ តំបន់សេដ្ឋកិច្ចពិសេស,…
រាជធានីភ្នំពេញ ៖ ខេត្តព្រះសីហនុបច្ចុប្បន្នកំពុងវិវត្តន៍ខ្លួនបណ្ដើរៗក្លាយជាប៉ូលសេដ្ឋកិច្ចទី២នាពេលដ៏ខ្លីខាងមុខ បន្ទាប់ពីរាជធានីភ្នំពេញ ខណៈដែលវិនិយោគិនបរទេស ពិសេសវិនិយោគិនចិនបាននិងកំពុងសម្រុកសាងសង់គម្រោងជាច្រើននៅតំបន់នោះ ។
សក្តានុពលខេត្តនេះត្រូវគេមើលឃើញដោយផ្ទាល់ភ្នែក ដោយមានតំបន់ឆ្នេរដ៏ទាក់ទាញ តំបន់សេដ្ឋកិច្ចពិសេស, ជាខេត្តស្ថិតក្នុងគំនិតផ្តួចផ្តើម «ខ្សែក្រវាត់មួយ ផ្លូវមួយ»របស់ប្រទេសចិន, គម្រោងផ្លូវល្បឿនលឿន, ការតភ្ជាប់ផ្លូវដែក, កំពង់ផែទឹកជ្រៅ និងព្រលានយន្ដហោះអន្តរជាតិជាដើម ដែលសុទ្ធសឹងជាហេដ្ឋារចនាសម្ព័ន្ធតភ្ជាប់សកម្មភាពពាណិជ្ជកម្មរបស់កម្ពុជាទៅកាន់ពិភពលោក ។
លោក ច្រឹក សុខនីម អគ្គនាយកក្រុមហ៊ុន Century21 Mekong បានថ្លែងកាលពីពេលថ្មីៗនេះថា ខេត្តព្រះសីហនុពិតជាមានសក្តានុពល ដោយសារមានការភ្ជាប់ជើងហោះហើរពីប្រទេសចិន និងពីខេត្តសៀមរាបមកកាន់ទីនោះកាន់តែច្រើន ពិសេសអ្វីដែលលោកភ្ញាក់ផ្អើលនោះ គឺឃើញវត្តមានជនជាតិចិនកាន់តែច្រើនមកទស្សនា និងវិនិយោគនៅខេត្តជាប់មាត់សមុទ្រមួយនេះ ។
លោកបន្តថា ៖« និយាយពីការសាងសង់ខុនដូនៅខេត្តព្រះសីហនុ យើងត្រូវសួរថា តើអ្នកអភិវឌ្ឍន៍ផ្តោតលើអ្នកណាជាគោលដៅ ។ បើអ្នកវិនិយោគផ្តោតលើប្រជាជនក្នុងស្រុក ខ្ញុំមិនសូវមានជំនឿចិត្តនោះទេ »។ លោកបន្ថែមថា ៖« ប្រជាពលរដ្ឋខេត្តព្រះសីហនុទំនងមិនសូវចាប់អារម្មណ៍ខុនដូច្រើនទេ គឺពួកគាត់ចាប់អារម្មណ៍លំនៅឋានផ្ទាល់ដីច្រើនជាង ដោយសារខេត្តនៅសល់ដីទំនេរច្រើន និងមានតម្លៃធូរថ្លៃនៅឡើយនៅតំបន់មួយចំនួន »។
លោកបញ្ជាក់ថា ដោយសារខេត្តព្រះសីហនុ ជាតំបន់ទេសចរណ៍ ហើយរាជរដ្ឋាភិបាលកំពុងរៀបចំតំបន់នេះទៅជាតំបន់ពាណិជ្ជកម្មនាពេល អនាគត អ្នកវិនិយោគដែលមានគោលដៅវិនិយោគរយៈពេលវែង បានងាកទៅកាន់តំបន់នេះកាន់តែច្រើន ដោយសារវាជាតំបន់ដែលមានសក្តានុពលសម្រាប់ពេលអនាគត ។
លោកថ្លែងថា ៖« រាជរដ្ឋាភិបាលបាននិងកំពុងផ្តោតការយកចិត្តទុកដាក់នៅតំបន់នេះ តាមរយៈការរៀបចំឆ្នេរឲ្យមានសោភ័ណភាព និងរៀបរយជាងមុន, គម្រោងសាងសង់ផ្លូវហាយវេពីរាជធានីភ្នំពេញទៅកាន់ខេត្តនេះ, ការពង្រីកព្រលានយន្តហោះលំដាប់អន្តរជាតិ និងកំណើនភ្ញៀវទេសចរ សុទ្ធតែជាកត្តាហុចសក្តានុពលដល់អ្នកវិនិយោគសាងសង់ខុនដូនៅខេត្តនេះ »។
អគ្គលេខាធិការសម្ព័ន្ធទេសចរណ៍ជាតិកម្ពុជា លោក ហូ វណ្ឌី បានថ្លែងថា បច្ចុប្បន្នមានក្រុមហ៊ុនអាកាសចរណ៍ក្នុងស្រុកចំនួនពីរ គឺក្រុមហ៊ុន កម្ពុជាអង្គរអ៊ែរ និងក្រុមហ៊ុន បាយ័នអ៊ែរ បានធ្វើការហោះហើររវាងខេត្តសៀមរាប និងរាជធានីភ្នំពេញទៅកាន់ខេត្តព្រះសីហនុ ជារៀងរាល់ថ្ងៃ និងមានអាកាសចរណ៍មកពីបរទេសធ្វើការហោះហើរលក្ខណៈជួល និងយូរៗម្តងមកកាន់ខេត្តព្រះសីហនុផងដែរ ។ លោកបន្តថា ៖« ជោគជ័យ ឬមិនជោគជ័យលើការសាងសង់ខុនដូ និងអចលនវត្ថុនៅទីនេះ វាអាស្រ័យលើការអភិរក្សធនធានធម្មជាតិ និងការរៀបចំតំបន់នេះឲ្យកាន់តែមានភាពទាក់ទាញ »។
អភិបាលខេត្តព្រះសីហនុ លោក យន្ដ មីន បានថ្លែងថា បច្ចុប្បន្នក្នុងខេត្តព្រះសីហនុមានអាជីវកម្មបែបទេសចរណ៍ជិត៩០០អាជីវកម្ម ក្នុងនោះ សណ្ឋាគារមាន៧៩សណ្ឋាគារ ផ្ទះសំណាក់៣៣៦ ភោជនីយដ្ឋានជាង៣០០ទីតាំង និងកាស៊ីណូកំពុងដំណើរការជាង១០០ទីតាំង ព្រមទាំងអាជីវកម្មផ្សេងៗទៀត ហើយសព្វថ្ងៃនេះដែរ ក៏មានអាជីវកម្មជាច្រើនទៀតក៏កំពុងដំណើរការសាងសង់ ដោយគ្រោងនឹងដំណើរការនៅពេលឆាប់ៗនេះ ។ លោកបន្តថា ខេត្តព្រះសីហនុចេះតែបន្តអភិវឌ្ឍន៍ទៅមុខកាន់តែលឿន ដោយសាររាជរដ្ឋាភិបាលបានរៀបចំខេត្តនេះឲ្យក្លាយជាតំបន់ពាណិជ្ជកម្មពហុវិស័យ ព្រោះខេត្តមានឆ្នេរស្អាត មានកំពង់ផែទឹកជ្រៅតែមួយគត់នៅកម្ពុជា និងមានជើងហោះហើរត្រង់កាន់តែច្រើនឆ្ពោះមកកាន់ខេត្តនេះ ។ លោកអភិបាលខេត្ត បានមានប្រសាសន៍ថា ៖« ក្នុងពេលដែលផ្ទះកំពុងជួសជុល និងកែលម្អ ហើយមានភ្ញៀវមកលេងទៀតនោះ វាប្រាកដជាធ្វើឲ្យភ្ញៀវមិនពេញចិត្តចំពោះសកម្មភាពរបស់យើង ដូចនេះហើយមានតែអត់ធ្មត់បន្តទៀត និងរង់ចាំឲ្យផ្ទះបានរួចរាល់សិន » ។ លោកបន្ដ ៖« ដោយសារតែខេត្តព្រះសីហនុ ជាខេត្តមួយមានតំបន់ទេសចរណ៍គួរឲ្យទាក់ទាញច្រើន ទើបវិនិយោគិនជាតិនិងអន្តរជាតិបានមកបណ្ដាក់ទុនរកស៊ីជាដោយបង្កើតជាកន្លែងកម្សាន្ត, ផ្ទះសំណាក់ សណ្ឋាគារ និងរមណីយដ្ឋានជាច្រើន » ។
លោកបន្តទៀតថា ក្នុងពេលដែលខេត្តព្រះសីហនុកំពុងតែអភិវឌ្ឍន៍នៅពេលនេះ វាបានផ្ដល់ប្រយោជន៍ជាច្រើន ដល់ពលរដ្ឋក្នុងមូលដ្ឋាននិងពលរដ្ឋមកពីខាងក្រៅ ។ ជាក់ស្ដែងនៅរាល់អាជីវកម្មដែលកំពុងបម្រើនៅក្នុងខេត្ត បានស្រូបកម្លាំងពលកម្មរាប់ម៉ឺននាក់ ដើម្បីបម្រើការ និងទទួលបានកម្រៃសម្រាប់ផ្គត់ផ្គង់ជីវភាពគ្រួសារ ។
ទីប្រឹក្សារាជរដ្ឋាភិបាលកម្ពុជា លោកបណ្ឌិត សុក ស៊ីផាន់ណា បានថ្លែងថា តាមរយៈគោលនយោបាយអភិវឌ្ឍន៍វិស័យឧស្សាហកម្មរបស់រាជរដ្ឋាភិបាលដែលបានដាក់ខេត្តព្រះសីហនុជាតំបន់សេដ្ឋកិច្ច និងឧស្សាហកម្ម បានធ្វើឲ្យខេត្តនេះមានសកម្មភាពអភិវឌ្ឍន៍យ៉ាងលឿន ដោយសារហេដ្ឋារចនាសម្ព័ន្ឋអំណោយផលនានា ដូចជាតំបន់សេដ្ឋកិច្ចពិសេស ដែលងាយស្រួលក្នុងការដឹកជញ្ជូន ដោយសារវាជាប់កំពង់ផែទឹកជ្រៅតែមួយគត់របស់កម្ពុជា, ការពង្រីកព្រលានយន្តហោះកងកេងឲ្យក្លាយជាព្រលានយន្តហោះលំដាប់អន្តរជាតិ, ការតភ្ជាប់ផ្លូវគោក និងផ្លូវល្បឿនលឿនជាដើម ដែលសុទ្ធសឹងតែជាសក្តានុពលរបស់ខេត្ត ។
លោកថ្លែងថា ៖« ខ្ញុំគិតថារយៈពេល៥ឆ្នាំខាងមុខ ខេត្តព្រះសីហនុនឹងជំនួសខេត្តសៀមរាប ដោយសារខេត្តសៀមរាបពឹងផ្អែកខ្លាំងតែលើវិស័យទេសចរណ៍តែមួយប៉ុណ្ណោះ »។ គោលនយោបាយរបស់រាជរដ្ឋាភិបាលកម្ពុជា ក្រោមការដឹកនាំរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី បានដាក់ចេញនូវយុទ្ធសាស្ត្រដូចខាងក្រោម ៖
១-រាជរដ្ឋាភិបាលបានកំណត់យុទ្ធសាស្ត្ររបស់ខ្លួន ក្នុងការអភិវឌ្ឍខេត្តព្រះសីហនុ តាមរយៈគោលនយោបាយឆ្នាំ២០១៧-២០២៥ ខេត្តព្រះសីហនុ នឹងក្លាយទៅជាតំបន់សេដ្ឋកិច្ចពិសេសពហុបំណង គ្រប់គ្រងដោយរដ្ឋបាលពិសេស ។
២-ផ្លូវល្បឿនលឿនភ្នំពេញ-ព្រះសីហនុ នឹងចាប់ផ្តើមសាងសង់នៅចុងឆ្នាំ២០១៨នេះ ។
៣-ក្រោយបោះឆ្នោតជ្រើសតាំងតំណាងរាស្ត្រ នីតិកាលទី៦ហើយ នៅចុងឆ្នាំ២០១៨នេះដែរ ខេត្តព្រះសីហនុ នឹងបង្កើតក្រុងមួយទៀត គឺទីក្រុងកោះរ៉ុង (ក្រុងកោះរ៉ុង) មិនមែនបង្កើតឡើងដើម្បីគ្រប់គ្រងប្រជាពលរដ្ឋប៉ុន្មានពាន់នាក់នោះទេ គឺបង្កើតឡើងដើម្បីគ្រប់គ្រងភ្ញៀវទេសចររាប់លាននាក់ និងទិសដៅអភិវឌ្ឍន៍ប្រកបដោយនិរន្តរភាព ។
៤-ក្រោមកិច្ចសហប្រតិបត្តិការទំនាក់ទំនងការទូតរវាងកម្ពុជា-ចិន តំបន់សេដ្ឋកិច្ចពិសេសក្រុងព្រះសីហនុ (បិត្រាំង) នឹងប្រែក្លាយទៅជាទីក្រុងមិត្តភាពកម្ពុជា-ចិន ។
៥-ខេត្តព្រះសីហនុ នឹងក្លាយទៅជាក្បាលនាគសេដ្ឋកិច្ចនៃព្រះរាជាណាចក្រកម្ពុជា ។
ចំណែកគោលនយោបាយ ខ្សែក្រវាត់មួយ ផ្លូវមួយ និងគោលនយោបាយផ្លូវសូត្ររបស់ចិន ក្នុងដើម្បីពង្រីកឥទ្ធិពលរបស់ខ្លួន ចិនបានដាក់ចេញនូវគោលនយោបាយនេះក្នុងគោលដៅជំរុញការវិនិយោគចេញក្រៅ ដោយយកការវិនិយោគ ឬពាណិជ្ជកម្មជាស្ពានចម្លងទំនាក់ទំនងការទូត។ មិនមែនជារឿងដោយឡែកសម្រាប់កម្ពុជាទេ បច្ចុប្បន្ននេះ ចិនបានជំរុញការវិនិយោគចេញក្រៅជាង៣៥ប្រទេស ដែលជាសម្ព័ន្ធមិត្តរបស់ខ្លួន ជាពិសេស តំបន់អាហ្វ្រិក រួមនឹងកម្ពុជាផងដែរ ។
ជាមួយគ្នានេះ ចិនបានកំណត់យកខេត្តជាប់សមុទ្រទាំង៤ខេត្តជាផ្លូវសូត្រ គឺ (ខេត្តកោះកុង ខេត្តព្រះសីហនុ ខេត្តកំពត និងខេត្តកែប)របស់កម្ពុជា ដែលជាផ្លូវស្របតាមមាត់សមុទ្រពីខេត្តកោះកុង រហូតដល់ខេត្តកែប អាចនឹងចាប់ផ្តើមស្ថាបនានៅពេលអនាគត ។ ទន្ទឹមនឹងនេះ ខេត្តសេដ្ឋកិច្ចមួយរបស់ចិន នឹងត្រូវចងសម្ព័ន្ធភាពជាមួយខេត្តមួយនៃប្រទេសមួយ ដែលជាប្រទេសសម្ព័ន្ធមិត្តរបស់ខ្លួន ។ ឧទាហរណ៍ ៖ ទីក្រុងវ៉ូស៊ី ខេត្តជាំងស៊ូ ជាសម្ព័ន្ធភាពជាមួយប្រទេសកម្ពុជា ដែលតាមរយៈនេះ តំបន់សេដ្ឋកិច្ចពិសេសក្រុង ព្រះសីហនុ (បិតត្រាំង) ត្រូវបានវិនិយោគលើទឹកដីនៃខេត្តព្រះសីហនុ ៕
ចែករំលែកព័តមាននេះ