រាជធានីភ្នំពេញ ៖ បុរសបីនាក់ត្រូវបានសមត្ថកិច្ចចាប់ឃាត់ខ្លួន បន្ទាប់ពីផឹកស៊ីជាមួយគ្នា ហើយក៏បង្កជាហិង្សារងរបួសស្នាម ព្រោះតែរឿងប្រពន្ធមកហៅទៅផ្ទះ ។ ហេតុការណ៍នេះកើតឡើង កាលពីវេលាម៉ោង១២កណ្តាលអធ្រាត្រថ្ងៃទី០៤ ខែកញ្ញា…
រាជធានីភ្នំពេញ ៖ បុរសបីនាក់ត្រូវបានសមត្ថកិច្ចចាប់ឃាត់ខ្លួន បន្ទាប់ពីផឹកស៊ីជាមួយគ្នា ហើយក៏បង្កជាហិង្សារងរបួសស្នាម ព្រោះតែរឿងប្រពន្ធមកហៅទៅផ្ទះ ។ ហេតុការណ៍នេះកើតឡើង កាលពីវេលាម៉ោង១២កណ្តាលអធ្រាត្រថ្ងៃទី០៤ ខែកញ្ញា ឆ្នាំ២០១៨ ត្រង់ចំណុចតូបប៉ះកង់ និងលក់ភេសជ្ជៈមួយកន្លែង តាមបណ្តោយផ្លូវ១០០៣ ស្ថិតក្នុងសង្កាត់ភ្នំពេញថ្មី ខណ្ឌសែនសុខ ។
បើតាមសម្តីពីសមត្ថកិច្ចបានឲ្យដឹងថា បុរសដែលផឹកស៊ីស្រវឹងទាំងបីនាក់ដែលត្រូវសមត្ថកិច្ចឃាត់ខ្លួនខាងលើទី១ មានឈ្មោះ សាន រី ភេទប្រុស អាយុ៣៨ឆ្នាំ ជាជាងប៉ះកង់ ស្នាក់នៅកន្លែងកើតហេតុ ជាភាគីខាងម្ចាស់តូបកើតហេតុខាងលើ ។ និងភាគីម្ខាងទៀតដែលជាអ្នករត់ម៉ូតូឌុបប្រចាំនៅកន្លែងកើតហេតុ ហើយស្គាល់គ្នា និងភាគីខាងលើមានឈ្មោះ ចិន ជើយ អាយុ៣៩ឆ្នាំ ស្នាក់នៅក្បែរកន្លែងកើតហេតុ និងបក្សពួកម្នាក់ទៀតមិនស្គាល់ឈ្មោះរួមទាំងដកហូតម៉ូតូចំនួនបីគ្រឿងចំណែកមួយគ្រឿងម៉ាកសង់កូរ៉េ និងពីរគ្រឿងទៀតម៉ាកហុងដាឌ្រីម ស៊េរី០១៧ ថែមទាំងពូថៅមួយទៀតផង ។
បើតាមសម្តីទាំងស្រវឹងពីភាគីខាងម្ចាស់តូបបានឲ្យដឹងថា កាលពីវេលាម៉ោង៨យប់ថ្ងៃកើតហេតុគាត់ និងអ្នកលក់ដូរតាមរទេះបីទៅបួននាក់ បានអង្គុយផឹកស្រាបៀរនៅតូបរបស់គាត់ដែលជាកន្លែងកើតហេតុ ។ លុះផឹកអស់ស្រាបៀរប្រហែលកន្លះកេះ ស្រាប់តែឃើញបុរសខាងលើដែលជាភាគីម្ខាងទៀតបានជិះម៉ូតូមួយគ្រឿងមិនចាំម៉ាកដោយក្នុងស្ថានភាពស្រវឹងមកឈប់នៅកន្លែងកើតហេតុ។ ដោយគាត់គិតថា ជាអ្នកស្គាល់គ្នាឃើញមុខគ្នារាល់ថ្ងៃគាត់ក៏បានហៅបុរសនោះឲ្យមកចូលរួចក្នុងវង្វង់ផឹកស៊ីជាមួយពួកគាត់ ។ មួយស្ទុះក្រោយមក ស្រាប់តែប្រពន្ធរបស់បុរសខាងលើបានមកហៅបុរសខាងលើឲ្យត្រឡប់ទៅផ្ទះ តែបុរសរូបនោះមិនព្រមទៅនោះទេក៏បង្កជាការឈ្លោះប្រកែកគ្នា រវាងបុរសខាងលើ និងប្រពន្ធរបស់គេ ។
ពេលនោះគាត់ក៏ប្រាប់បុរសនោះឲ្យត្រឡប់ទៅផ្ទះជាមួយប្រពន្ធទៅ កុំមកឈ្លោះគ្នានៅទីនោះអី រួចគាត់ក៏បានយកស្រាបៀរពីរកំប៉ុងដែលនៅសល់បោះចោលទៅដី ដើម្បីបញ្ចប់ការផឹកស៊ី ។ ហើយក៏បានបែកផ្លូវគ្នាទៅដេកអស់ទៅ ។
លុះដល់វេលាកើតហេតុ ស្រាប់តែបុរសខាងលើដែលជាភាគីម្ខាងទៀតបាននាំបក្សពួក៥ទៅ៦ជិះម៉ូតូបីគ្រឿងខាងលើ ។ មករករឿងគាត់ថែមទាំងវាយគាត់ពីរទៅបីដៃចំមុខទៀតផង ។ រួចក៏កើតជាការប្រតាយប្រតបគ្នា ភ្លាមៗនេះក៏មានសន្តិសុខដែលយាមកាមនៅបុរីពិភពថ្មីនៅក្បែរនោះបាននាំគ្នីគ្នាប្រមាណជាង១០នាក់មកជួយឃាត់ និងចាប់បានបុរសខាងលើរួមទាំងបក្សពួកម្នាក់ដែលរងរបួសបែកក្បាល ចំណែកឯបក្ខពួកឯទៀតបានរត់គេចខ្លួនបាត់ស្រមោល។
បើតាមសម្តីទាំងក្នុងស្ថានភាពស្រវឹងពីភាគីខាងអ្នករត់ម៉ូតូឌុបបានឲ្យដឹងថា នៅមុនពេលកើតហេតុគាត់បានជិះម៉ូតូមកកន្លែងកើតហេតុបំណងទិញស្រាទៅផឹកនៅឯផ្ទះរបស់ខ្លួនវិញ ។ ខណៈពេលមកដល់ក៏ត្រូវភាគីខាងម្ចាស់តូបហៅឲ្យចូលផឹកជាមួយ ។ បន្ទាប់មកប្រពន្ធរបស់គាត់ក៏បានមកហៅគាត់ទៅផ្ទះរួចគាត់ក៏បានដេញប្រពន្ធរបស់គាត់ឲ្យទៅផ្ទះមុនគាត់ទៅ ។ ពេលនោះស្រាប់តែបុរសដែលជាភាគីខាងម្ចាស់តូបដេញគាត់ឲ្យទៅផ្ទះ និងដៀលគាត់ថា អន់ណាស់ផឹកស៊ីប្រពន្ធមកហៅ ហើយថែមទាំងយកស្រាបៀរពីរកំប៉ុងកប់ត្រូវក្បាលគាត់ថែមទៀតផង ហើយក៏បង្កជាហិង្សាវាយគ្នាតែម្តងទៅ ។
ក្រោយពេលកើតហេតុសមត្ថកិច្ចមូលដ្ឋានបានចុះមកដល់កន្លែងកើតហេតុ ហើយបាននាំខ្លួនបុរសទាំងបីនាក់ខាងលើ រួមទាំងវត្ថុតាងត្រូវទៅសាកសួរនាំនៅឃុំខ្លួនបណ្តោះអាសន្ននៅខណ្ឌសែនសុខ ដើម្បីរង់ចាំចាត់ការបន្តនៅពេលក្រោយ ៕
ចែករំលែកព័តមាននេះ