រាជធានីភ្នំពេញ ៖ កម្ពុជាទទួលគម្រោងវិនិយោគយក្ស ៩ បន្ថែមទៀត សរុបទុន ៤២៣លានដុល្លារ គ្របដណ្តប់លើវិស័យសំខាន់ៗ ។ គណៈកម្មាធិការវិនិយោគកម្ពុជា…
រាជធានីភ្នំពេញ ៖ កម្ពុជាទទួលគម្រោងវិនិយោគយក្ស ៩ បន្ថែមទៀត សរុបទុន ៤២៣លានដុល្លារ គ្របដណ្តប់លើវិស័យសំខាន់ៗ ។ គណៈកម្មាធិការវិនិយោគកម្ពុជា បានឱ្យដឹងថា គម្រោងវិនិយោគដែលមានទុនវិនិយោគសរុបប្រមាណ ៤២៣លានដុល្លារអាម៉េរិក អាចបង្កើតការងារបានប្រមាណ ៥ពាន់កន្លែង និងមានមុខសញ្ញាវិនិយោគក្នុងវិស័យឧស្សាហកម្មចំនួន ៧ គម្រោង រួមមាន ៖ ផ្គុំដំឡើងគ្រឿងអេឡិចត្រូនិក បរិក្ខារអគ្គិសនី និងបរិក្ខារអគ្គិសនីបំភ្លឺ, ផលិតប្រដាប់ព្យួរសម្លៀកបំពាក់, ផលិតសម្ភារតុបតែងសម្រាប់ពិធីបុណ្យ (បុណ្យណូអែល និងបុណ្យ Halloween) និងវត្ថុអនុស្សាវរីយ៍, ជ្រលក់ពណ៌, ផ្គុំដំឡើងម៉ូតូ, ផលិតក្តារបន្ទះ និងផលិតក្រដាស, វិស័យទេសចរណ៍ចំនួន ១ គម្រោង ៖ សាងសង់ និងធ្វើអាជីវកម្មសណ្ឋាគារផ្កាយ ៥ ចំនួន ១.៣៤១បន្ទប់, និងវិស័យកសិកម្ម និងកសិ-ឧស្សាហកម្មចំនួន ១គម្រោង ៖ បង្កើតកសិដ្ឋានបណ្តុះមេផ្សិត និងផ្សិតគ្រប់ប្រភេទ និងវេចខ្ចប់កសិផល (ផ្សិត) ។
គម្រោងវិនិយោគទាំង ៩ ដូចបានរៀបរាប់ខាងលើនេះ បានបោះទីតាំងនៅរាជធានីភ្នំពេញ ខេត្តតាកែវ កំពង់ស្ពឹ កំពង់ឆ្នាំង និងខេត្តស្វាយរៀង ។ នេះបើយោងតាមកិច្ចប្រជុំនៅថ្ងៃទី ១០ ខែកុម្ភៈ ឆ្នាំ ២០២៦ របស់គណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជា គឺកិច្ចប្រជុំច្រកចេញចូលតែមួយ ដើម្បីពិនិត្យពិភាក្សាលើសំណើសុំចុះបញ្ជីគម្រោងវិនិយោគមានលក្ខណៈសម្បត្តិគ្រប់គ្រាន់ចំនួន ៩ គម្រោង ដឹកនាំដោយ ឯកឧត្តម ជា វុទ្ធី អគ្គលេខាធិការគណៈកម្មាធិការវិនិយោគកម្ពុជា នៅទីស្តីការក្រុមប្រឹក្សាអភិវឌ្ឍន៍កម្ពុជា ៕
ចែករំលែកព័តមាននេះ