ខេត្តព្រះវិហារ ៖ ថ្មីៗនេះ ប្រជាពលរដ្ឋរស់នៅភូមិស្រយ៉ង់ ឃុំស្រយ៉ង់ ស្រុកគូលែន ចំនួន១៨០គ្រួសារ បានផ្ទុះបាតុភាពយ៉ាងតឹងសរសៃកដាក់គ្នាជាមួយម្ចាស់ដីសម្បទានសេដ្ឋកិច្ច អេហ្វហ្វ័រភី ម៉ាឡេស៊ី ស្ថិតក្នុងដីព្រៃការពារដោយរដ្ឋបាលព្រៃឈើសង្កាត់គូលែន ។
ចំពោះការប្រឈមក្នុងជម្លោះដណ្តើមដីរវាងប្រជាពលរដ្ឋជាមួយម្ចាស់ដីសម្បទានសេដ្ឋកិច្ចនាពេលនេះ ត្រូវបានក្រុមប្រជាពលរដ្ឋអះអាងថា ដីនៅចំណុចអូរបាក់ផ្លុក ស្ថិតក្នុងភូមិស្រយ៉ង់ត្បូង និងស្រយ៉ង់ជើង ដែលម្ចាស់ក្រុមហ៊ុនដីសម្បទានសេដ្ឋកិច្ច កំពុងឈូសឆាយនាពេលនេះ គឺជាដីរបស់ពួកគាត់ កំពុងអាស្រ័យផល ខ្លះ២ឆ្នាំ និងខ្លះ៣ឆ្នាំមកហើយ ។ នៅពេលនេះ រាជរដ្ឋាភិបាលបានតម្រូវឱ្យក្រុមហ៊ុនបញ្ឈប់ការឈូសឆាយសិន រង់ចាំការចុះវាស់វែងពីសំណាក់ក្រុមយុវជនស្ម័គ្រចិត្តសម្តេចតេជោ ឱ្យដល់ពួកគាត់ តែម្ចាស់ដីសម្បទានសេដ្ឋកិច្ច ក្រុមហ៊ុន អេហ្វហ្វ័រភី ម៉ាឡេស៊ី នៅតែទន្ទ្រានបន្តការឈូសឆាយដីស្រែចម្ការរបស់ពួកគាត់ ។ ប្រជាពលរដ្ឋបានចោទថា ក្រុមហ៊ុនដីសម្បទានសេដ្ឋកិច្ច អេហ្វហ្វ័រភី ម៉ាឡេស៊ី បានប្រើប្រាស់កងកម្លាំងប្រដាប់អាវុធ គឺប៉ូលិសឱ្យទៅការពារ ។
ជុំវិញជម្លោះដ៏ស្រួចស្រាល់រវាងប្រជាពលរដ្ឋភូមិស្រយ៉ង់ត្បូង និងភូមិស្រយ៉ង់ជើង ជាមួយក្រុមហ៊ុនខាងលើនេះ លោកសំ ឡាម មេឃុំស្រយ៉ង់ បញ្ជាក់ថា បញ្ហាដីទំនាស់រវាងប្រជាពលរដ្ឋជាង១០០គ្រួសារ ក្នុងឃុំស្រយ៉ង់ជាមួយក្រុមហ៊ុនខាងលើនេះ គឺដីភាគច្រើនជារបស់ប្រជាពលរដ្ឋដែលបានអាស្រ័យផលអស់រយៈពេលជាយូរឆ្នាំមកហើយ ។ ប៉ុន្តែមកដល់ពេលនេះ ក្រុមហ៊ុនមិនទាន់បានឆ្វៀលដីទាំងនោះឱ្យប្រជាពលរដ្ឋនៅឡើយទេ ទើបប្រជាពលរដ្ឋនាំគ្នាតវ៉ា ។
លោកជុំ ពុយ អភិបាលស្រុកគូលែន ថ្លែងថា ក្រុមហ៊ុន អេហ្វហ្វ័រភី ម៉ាឡេស៊ី ដែលកំពុងធ្វើការឈូសឆាយដីព្រៃនៅតំបន់ជម្លោះខាងលើនេះ ក្នុងនាមលោកជាអភិបាលស្រុក និងជាប្រធានគណៈកម្មការដីរដ្ឋថ្នាក់ស្រុក លោកពុំទាន់បានឃើញមានអាជ្ញាប័ណ្ណជាផ្លូវការណាមួយនៅឡើយទេ ។ លោកបញ្ជាក់ថា ថ្វីដ្បិតតែពេលនេះក្រុមហ៊ុនបានឈូសឆាយដីនៅក្នុងតំបន់ជម្លោះ តែកន្លងទៅក្រុមការងារស្រុកបានធ្វើការឆ្វៀលដី ដែលប៉ះពាល់ជាមួយប្រជាពលរដ្ឋម្តងហើយ លុះពេលនេះស្រាប់តែមានប្រជាពលរដ្ឋមកតវ៉ាពាក់ព័ន្ធនឹងដីរបស់ពួកគាត់ទៀត ។ លោកអភិបាលស្រុកបន្តថា លោកនឹងបង្កើតគណៈកម្មការត្រួតពិនិត្យដីថ្នាក់ស្រុកទៅពិនិត្យម្តងទៀត ។
ពាក់ព័ន្ធនឹងជម្លោះដីធ្លីរវាងប្រជាពលរដ្ឋ និងក្រុមហ៊ុន អេហ្វហ្វ័រភី ម៉ាឡេស៊ី ក្នុងឃុំស្រយ៉ង់នេះ លោកពឹង ទ្រីដា ប្រធានមន្ទីរកសិកម្មខេត្ត បញ្ជាក់ថា ដីនេះកាលពីមុនពេលរាជរដ្ឋាភិបាលមានគោលនយោបាយចាស់ សកម្មភាពថ្មី លើវិស័យដីធ្លី ក្រុមហ៊ុននេះមានអាជ្ញាប័ណ្ណក្នុងការធ្វើវិនិយោគ ពីរដ្ឋាភិបាលរួចហើយ ប៉ុន្តែកន្លងទៅ ក្រុមហ៊ុននេះមិនទាន់បានដំណើរការនៅឡើយទេ ។ ចំណែកលោកអុិត ភូម្រា នាយខណ្ឌរដ្ឋបាលព្រៃឈើព្រះវិហារ បានឱ្យដឹងថា ចំពោះដីសម្បទានសេដ្ឋកិច្ចរបស់ក្រុមហ៊ុន អេហ្វហ្វ័រភី ម៉ាឡេស៊ី ដែលនៅពេលនេះកំពុងមានជម្លោះជាមួយប្រជាពលរដ្ឋ គឺដីទាំងនេះ កន្លងទៅក្រុមហ៊ុនបានបង់ពន្ធទៅលើព្រៃឈើជូនរាជរដ្ឋាភិបាលរួចជាស្រេចហើយ ប៉ុន្តែដោយសារកន្លងទៅ ក្រុមហ៊ុននេះមិនទាន់បានធ្វើការអភិវឌ្ឍ ។ លុះពេលនេះក្រុមហ៊ុនចាប់ដំណើរការ បែរជាមានជម្លោះជាមួយប្រជាពលរដ្ឋ ដែលនេះជាបញ្ហាមួយតម្រូវឱ្យក្រុមហ៊ុនបញ្ឈប់ការឈូសឆាយសិន រង់ចាំគណៈកម្មការដីរដ្ឋថ្នាក់ខេត្តធ្វើការត្រួតពិនិត្យជាថ្មីម្តងទៀត ។
ពេលនេះប្រជាពលរដ្ឋជាង១០០គ្រួសារបានព្រមានថា បើក្រុមហ៊ុន អេហ្វហ្វ័រភី ម៉ាឡេស៊ី មិនប្រគល់ដីទាំងនោះជូនដល់ពួកគាត់វិញទេ នៅពេលឆាប់ៗនេះពួកគាត់នឹងនាំគ្នាទៅដល់ភូមិគ្រឹះសម្តេចតេជោ ហ៊ុន សែន ដើម្បីសុំការអន្តរាគមន៍ពីសម្តេច ៕
ចែករំលែកព័តមាននេះ