ខេត្តកំពង់ឆ្នាំង ៖ ប្រជាពលរដ្ឋរស់នៅក្នុងភូមិកំពង់ប្រាសាទ ឃុំសែប ស្រុកកំពង់ត្រឡាចក៏ដូចជា ប្រជាពលរដ្ឋរស់នៅភូមិគជ្រុំ ឃុំកោះថ្កូវ ស្រុកជលគីរី បានត្អូញត្អែ ពីការលំបាកដោយសារទឹកជំនន់ឆ្នាំនេះបានឡើងធំ និងលឿនជាងឆ្នាំបណ្តាមុនៗ ។
ប្រជាពលរដ្ឋលើកឡើងបែបនេះ ខណៈពួកគាត់បានធ្វើដំណើរតាមកាណូតមកកាន់ទីផ្សារដែលបន្លាស់ទី មកកាន់ទីទួលសុវត្ថិភាព ។
បុរសម្នាក់ដែលជាអ្នករត់កាណូតដរចម្លងមានទីលំនៅភូមិកំពង់ប្រសាទ ឃុំសែប បាននិយាយឱ្យដឹងថា ទឹកឆ្នាំនេះបានឡើងលឿនខ្ពស់ជាងបណ្តាឆ្នាំកន្លងទៅ ធ្វើឱ្យស្រូវរបស់ប្រជាពលរដ្ឋត្រូវលិចលង់ដោយមានខ្លះមិនទាន់ទុំ ដែលមិនអាចច្រូតកាត់ប្រមូលផលបាននៅឡើយ ចំណែកខ្លះទៀតជិតនឹងប្រមូលផលក៏ត្រូវទឹកលិចតែម្ដង ។ ស្រូវប្រជាពលរដ្ឋរងការខូចខាតមានចំនួនជាច្រើនហិកតា ។
លោកបានបញ្ជាក់ថា ឆ្នាំនេះទឹកមានកម្ពស់ខ្ពស់ជាងឆ្នាំកន្លងទៅធ្វើឲ្យផ្សារកំពង់ប្រាសាទលិចលង់អស់ដែរ ហើយបានរត់បន្លាស់ទីចម្ងាយប្រមាណជាង១គីឡូម៉ែត្រ ដើម្បីដាក់លក់ជាបណ្ដោះអាសន្ន ហើយផ្សារនេះនឹងអាចរំកិលឡើងទៅលើបន្តទៀតបើសិនជាទឹកទន្លេនៅតែបន្តឡើង ។
ចំណែកប្រជាពលរដ្ឋមកពីភូមិគជ្រុំ ឃុំកោះថ្កូវ ស្រុកជលគីរី វិញក៏បាននិយាយដែរថា ផ្ទះរបស់ពួកគាត់បានលេចអស់ទៅហើយ ។ ពួកគាត់ធ្វើដំណើរមកផ្សារនេះ ដើម្បីមករកទិញម្ហូបអាហារ ។ លើកមុនពួកគាត់ជិះតែម៉ូតូងាយស្រួល ប៉ុន្តែពេលនេះគាត់ត្រូវជិះកាណូត២ដំណាក់កាល គឺជិះពីឃុំកោះថ្កូវ មកកំពង់ប្រាសាទ តម្លៃម្នាក់៣ពាន់រៀល និងជិះពីកំពង់ប្រាសាទមកកាន់ផ្សារទីទួលសុវត្ថិភាពនេះតម្លៃម្នាក់១ពាន់រៀលថែមទៀត ដូច្នោះ១ថ្ងៃគាត់ត្រូវចំណាយ៨ពាន់រៀលសម្រាប់ធ្វើដំណើរទៅមកខុសពីកាលដីគោក គាត់ជិះម៉ូតូ ចំណាយលើការចាក់សាំងត្រឹមតែកន្លះលីត្រ អស់តែ២ពាន់រៀលប៉ុណ្ណោះ ។
ប្រជាពលរដ្ឋទាំងនោះបានលើកឡើងទៀតថា រយៈពេល៧ឆ្នាំ ហើយដែលទឹកទន្លេធ្លាប់បានឡើងធំម្តង ហើយ៧ឆ្នាំក្រោយ គឺឆ្នាំនេះទឹកទន្លេបានខ្ពស់សាជាថ្មីទៀត ។ ដោយសារតែបែបនេះហើយទើបកាលពីឆ្នាំមុនៗ កន្លងទៅប្រជាពលរដ្ឋមិនបានត្រៀមបម្រុងទូកក្តាទុកជាមុនដែលជាហេតុធ្វើឲ្យពួកគាត់គ្មានមធ្យោបាយផ្ទាល់ខ្លួននោះឡើយ ។
តាមលោក ងិន ហ៊ុន ប្រធានមន្ទីរកសិកម្មរុក្ខាប្រមាញ់ និងនេសាទខេត្តកំពង់ឆ្នាំងបានឲ្យដឹងថា ដំណាំស្រូវរបស់ប្រជាពលរដ្ឋរងការប៉ះពាល់មានចំនួនជាង៩០ហិកតាក្នុងនោះនៅស្រុកជលគីរី ស្រូវដែលរងការរូចខាតទាំងស្រុងមានចំនួន៧ហិកតា (ស្រូវជិតទុំ) ។
ចំណែកដំណាំចំការមិនមានផលប៉ះពាល់នោះទេ ព្រោះអ្នកចម្ការបានដឹងពីពេលវេលា ក្នុងការដាំដុះ ប៉ុន្តែដំណាំរួមផ្សំនៅតាមផ្ទះពិតជាមានការខូចខាតខ្លះដែរ ។
ដោយឡែកកម្បស់ទឹកជំនន់ដែលបញ្ជាក់ដោយមន្ទីរធនធានទឹក និងឧទុនិយមខេត្តបានឲ្យដឹងថា ថ្ងៃទី០២ ខែកញ្ញា នេះទឹកមានកម្ពស់ ៩,៧០ម៉ែត្រ ប្រើប្រៀបធៀបដូចគ្នា ឆ្នាំ២០១៧ ទឹកមានកម្ពស់ ៨,៨៦ម៉ែត្រ គឺខ្ពស់ជាង០,៨៤ម៉ែត្រ ចំណែកកម្ពស់ទឹកប្រកាសអាសន្នក្នុងខេត្តកំពង់ឆ្នាំងគឺ ១១ម៉ែត្រ ៕
ចែករំលែកព័តមាននេះ