បុគ្គលគួរពិចារណាអំពីជាតិកំណើតជាមនុស្សនេះចាត់ថាជាកំណើតដ៏ពិសេសជាងកំណើតណាៗទាំងអស់ ព្រោះមានឱកាសធ្វើប្រយោជន៍បានច្រើន ដូច្នេះសូមកុំឱ្យពេលវេលាកន្លងហួសទៅទទេឱ្យសោះ គួរធ្វើនូវប្រយោជន៍គឺបុណ្យកុសលគ្រប់យ៉ាងដែលអាចធ្វើបានកុំ ។
ការស្តាប់ព្រះធម៌នាំឱ្យមានបញ្ញាជាប្រទីបធំសម្រាប់បំភ្លឺលោក កម្ចាត់នូវភាពងងឹតគឺអវិជ្ជា ដូច្នេះពុទ្ធបរិស័ទគួរយកចិត្តទុកដាក់ស្តាប់ព្រះធម៌ដោយសេចក្តីគោរព យកការស្តាប់ និងការបដិបត្តិព្រះធម៌ជាធំក្នុងជីវិត ។
ប្រាកដណាស់ក្នុងលោកនេះគ្មានអ្នកណាអាចនាំយកនូវជាតិកំណើតមកប្រគល់ឱ្យយើងបានទេ គឺមានតែយើងខ្លួនឯងប៉ុណ្ណោះដែលមានអវិជ្ជាតែងនាំយកនូវជាតិទុក្ខមកសម្រាប់ខ្លួនឯង ប្រគល់ឱ្យខ្លួនឯង ដូច្នេះខ្លួនឯងហ្នឹងជាកំពូលសត្រូវរបស់ខ្លួនឯង នាំមកនូវទុក្ខសព្វបែបយ៉ាងនៅក្នុងជាតិកំណើតនេះ ។
ដើម្បីរំសាយទុក្ខ បុគ្គលត្រូវទូន្មានចិត្តឱ្យតាំងនៅក្នុងការស្តាប់ព្រះធម៌ដោយគោរព និងត្រូវចាំជានិច្ចថា ទាល់តែមានព្រះពុទ្ធត្រាស់ដឹងទើបមាននូវព្រះធម៌ ដូច្នេះព្រះធម៌ជារបស់ដែលក្រសែនមហាក្រ តែនេះគឺជាភ័ព្វសំណាងណាស់ ដែលបុគ្គលកើតមកទាន់ព្រះធម៌ ។
ចែករំលែកព័តមាននេះ