រាជធានីភ្នំពេញ ៖ មនុស្សកាន់តែកំពុងប្រឈមនឹងជំងឺប្លែកៗ ទាំងខ្លួននៅក្មេង ស្របគ្នាដែលមនុស្សមួយចំនួនត្រូវគេឃើញឈឺស្លាប់ភ្លាមៗទាំងវ័យមិនទាន់ពាក់កណ្ដាលដោយសារតែជំងឺដាច់សរសៃឈាមខួរក្បាល និងជំងឺមហារីកជាដើម ។ អ្នកជំនាញសុខភាពបានអះអាងថា ហេតុផលតែមួយគត់ដែលអាចឱ្យមនុស្សចៀសផុតពីជំងឺទាំងនេះ គឺត្រូវសកម្មនឹងកីឡាតាំងពីឥឡូវនេះទៅ…
រាជធានីភ្នំពេញ ៖ មនុស្សកាន់តែកំពុងប្រឈមនឹងជំងឺប្លែកៗ ទាំងខ្លួននៅក្មេង ស្របគ្នាដែលមនុស្សមួយចំនួនត្រូវគេឃើញឈឺស្លាប់ភ្លាមៗទាំងវ័យមិនទាន់ពាក់កណ្ដាលដោយសារតែជំងឺដាច់សរសៃឈាមខួរក្បាល និងជំងឺមហារីកជាដើម ។
អ្នកជំនាញសុខភាពបានអះអាងថា ហេតុផលតែមួយគត់ដែលអាចឱ្យមនុស្សចៀសផុតពីជំងឺទាំងនេះ គឺត្រូវសកម្មនឹងកីឡាតាំងពីឥឡូវនេះទៅ ដើម្បីកុំឱ្យសុខភាពទ្រុឌទ្រោម ទើបចាប់គិតគូរដែលអ្នកជំនាញសុខភាពបានប្រកាសថា ជារឿងហួសពេល។
លោកវេជ្ជបណ្ឌិត សុខ ចិត្ត ជំនាញសង្គ្រោះបន្ទាន់ និងថ្នាំសណ្ដំ ប្រចាំមន្ទីរពេទ្យព្រះកេតុមាលា បានថ្លែងកាលពេលថ្មីៗកន្លងមកនេះថា របបអាហារ និងបរិយាកាសរស់នៅក្នុងពេលនេះ នឹងធ្វើឱ្យមនុស្សច្រើនឡើងប្រឈមនឹងបញ្ហាសុខភាព ជាពិសេសគឺបញ្ហាចរន្តឈាមដើរមិនសូវស្រួល ហើយបណ្ដាលឱ្យមនុស្សមានជំងឺលើសឈាម និងជំងឺដាច់សរសៃឈាមខួរក្បាលជាដើម ដោយមិនទាន់រាប់បញ្ចូលជំងឺប្លែកៗផ្សេងទៀត ដែលបង្កពីរបបអាហារ ដែលមានសារជាតិគីមីខ្ពស់។
លោកថា ចំណីអាហារនាពេលបច្ចុប្បន្ន សុទ្ធតែមានបញ្ចូលតិចតួចនូវសារធាតុគីមីទុកឱ្យបានយូរ ឱ្យមានឱជារស និងសារធាតុប៉ះពាល់សុខភាពជាច្រើនដែលមិនបង្កផលប៉ះពាល់ក្នុងពេលទទួលទាន ប៉ុន្តែវាបានបង្កនូវផលប៉ះពាល់ជាច្រើនផ្សេងទៀតនៅពេលខាងមុខ ជាពិសេសគឺជំងឺក្រពះ ពោះវៀន និងជំងឺមហារីកជាដើម។
លោកថា មានមធ្យោបាយមួយគត់ គឺត្រូវតែមានកីឡាក្នុងខ្លួន បើទោះជាមិនអាចក្លាយខ្លួនជាអ្នកកីឡាដែលមានចលនា ក៏ត្រូវហាត់ប្រាណ និងធ្វើសកម្មភាពបញ្ចេញញើស បញ្ចេញជាតិពុលឱ្យបានច្រើនជារៀងរាល់ថ្ងៃ ដើម្បីបន្ថយនូវការប៉ះពាល់ទាំងនោះ ។
លោកបានហៅអ្នកមានសកម្មភាពហាត់ប្រាណ និងមានកីឡាក្នុងខ្លួនទាំងអស់ ថាជាអ្នកដែលហ៊ានប្រឈមនឹងផលប៉ះពាល់ និងថាអ្នកដែលសកម្មទាំងនោះ នឹងមានសុខភាពល្អប្រសើរជាងអ្នកមិនមានកីឡាក្នុងខ្លួន ។ ប៉ុន្តែលោកថា ការទទួលទានគ្រឿងស្រវឹង និងអាហារដែលមានសារធាតុគីមីដោយមិនប្រយ័ត្នរាល់ថ្ងៃ ក៏នៅតែប៉ះពាល់សម្រាប់អ្នកលេងកីឡាផងដែរ ប្រសិនបើខ្វះការយកចិត្តទុកដាក់ ។
អ្នកបញ្ចេញញើសជាប្រចាំនឹងទទួលបានអត្ថប្រយោជន៍ច្រើនណាស់ពីការលេងកីឡា ដោយលោកបញ្ជាក់យ៉ាងខ្លីថា បើអត់សកម្មភាពលេងកីឡាទាល់តែសោះក៏ត្រូវតែមានពេលស្ទីម និងម៉ាស្សា ដើម្បីសម្រួលសរសៃ និងបញ្ចេញញើសដាច់ខាត ទើបអាចដោះស្រាយនូវបញ្ហាផលប៉ះពាល់បាន ។
រំលឹកពីការរៀបរាប់អត្ថប្រយោជន៍នៃការបញ្ចេញញើសនាពេលនោះ លោកបានថ្លែងថា ការធ្វើចលនាកីឡា ឬស្ថិតនៅបន្ទប់ស្ទីមឱ្យចេញញើស ទី១ជួយកាត់បន្ថយស្ត្រេស ទី២ជំរុញរាងកាយឱ្យសម្រាកបានល្អ ទី៣ជំរុញឱ្យមានការសម្រាន្តលក់ស្កប់ស្កល់ ទី៤បង្កើនប្រព័ន្ធការពារនៅក្នុងរាងកាយឱ្យរឹងមាំ ទី៥ជួយសម្រួលដល់ចលនាឈាមរត់បានល្អ ទី៦ជួយកម្ចាត់សារជាតិពុលពីសារពាង្គកាយ ទី៧ជំនួយដល់ការដកដង្ហើម ទី៨ទាញអុកស៊ីសែនទៅកាន់ខួរក្បាលបានល្អ ទី៩ធ្វើឱ្យស្បែកទន់ភ្លឺរលោង ទី១០ជួយបញ្ចុះទម្ងន់សម្រកខ្លាញ់ និងទី១១ជួយប្រឆាំងការរលាក ដោយសារតែការស្ទីម និងសូណា ធ្វើឱ្យស្បែករបស់មនុស្សស៊ាំនឹងបរិយាកាសក្ដៅ ឬត្រជាក់បានយ៉ាងល្អ ។
សម្រាប់សូណាវិញ លោកថាមានគុណប្រយោជន៍យ៉ាងខ្លាំងដូចជា ទី១ជួយបញ្ចុះទម្ងន់ ទី២បញ្ចេញជាតិពុលក្នុងខ្លួន ទី៣បន្ថយអាការឈឺសាច់ដុំរ៉ាំរ៉ៃ ទី៤ជំរុញសរសៃឈាមត្រង់កន្លែងរបួសស្នាម ឬកន្លែងវះកាត់ឱ្យដើរស្រួលឆាប់ជា ទី៥ជួយប្រព័ន្ធឈាមរត់ក្នុងបេះដូងបានល្អ ទី៦ជួយជំរុញប្រព័ន្ធសារពាង្គកាយឱ្យរឹងមាំ និងទី៧ជួយជំរុញការព្យាបាលជំងឺមហារីកឱ្យមានប្រសិទ្ធភាព ។
ចំណែកការម៉ាស្សាវិញលោកថា ទី១កាត់បន្ថយស្ត្រេស ទី២កាត់បន្ថយការឈឺចាប់ក្រោយវះកាត់ ទី៣កាត់បន្ថយជំងឺថប់អារម្មណ៍សម្រាប់អ្នកធ្វើការច្រើន ទី៤កាត់បន្ថយការឈឺចាប់ផ្នែកខាងក្រោមឆ្អឹងខ្នង ទី៥កាត់បន្ថយភាពតឹងនៃសាច់ដុំ ទី៦ជួយឱ្យប្រព័ន្ធខួរក្បាលបញ្ជាទៅការគិតបានល្អ ទី៧ជួយបន្ថយការឈឺចាប់សម្រាប់អ្នកមានអាការឈឺក្បាលរ៉ាំរ៉ៃ(ជំងឺប្រកាំង)។
ទី៨ជួយឱ្យសម្រាន្តបានស្កប់ស្កល់ ទី៩កាត់បន្ថយជំងឺធ្លាក់ទឹកចិត្ត ទី១០ជំរុញឱ្យសុខភាពបេះដូងដើរស្រួល ទី១១បន្ថយការឈឺចាប់ត្រង់កន្លែងសន្លាក់ ទី១២បន្ថយស្ត្រេសសម្រាប់អ្នកជំងឺមហារីក ទី១៣ជួយបញ្ចុះសម្ពាធឈាម ទី១៤ជួយបន្ថយអាការឈឺប្រអប់ដៃ ទី១៥កាត់បន្ថយអាការរោយកញ្ចឹងក ទី១៦កាត់បន្ថយអាការក្អួតចង្អោរសម្រាប់អ្នកកើតជំងឺមហារីក និងទី១៨បន្ថយការឈឺចាប់អ្នកវះកាត់ប្ដូរសន្លាក់ ។
លោកវេជ្ជបណ្ឌិត សុខ ចិត្ត បន្តថា មនុស្សគ្រប់រូបគួរមានទម្លាប់ស្ទីម និងម៉ាស្សា ជាពិសេសអ្នកមិននូវចង់ហាត់ប្រាណបញ្ចេញញើស ។ ដ្បិតថាសកម្មភាពហាត់ប្រាណ និងធ្វើកីឡាអាចនឹងធ្វើឱ្យមនុស្សគ្រប់រូបឈឺសាច់ដុំដំបូងៗ ប៉ុន្តែលោកថាវាមិនមានផលប៉ះពាល់នោះទេ ផ្ទុយទៅវិញ គឺវាបានជួយឱ្យសរីរាងគ្រប់ផ្នែកមានចរន្តឈាមដើរបានល្អ ហើយបញ្ហាសំខាន់គឺរន្ធញើសនឹងបើកបញ្ចេញសារជាតិពុលចេញពីក្នុងខ្លួនបានច្រើនដែលនឹងធ្វើឱ្យសុខភាពមានដំណោះស្រាយល្អប្រសើរ ។
យ៉ាងណាមិញ លោកជំរុញឱ្យមនុស្សគ្រប់រូបត្រូវមានសកម្មភាពកីឡាតាំងពីក្មេងឡើងទៅ ដោយមិនមែនទាល់តែចូលដល់វ័យទ្រុឌទ្រោមហើយ ទើបម្នាក់ៗសម្រុកចេញហាត់ប្រាណ ដើម្បីស្ដារសុខភាពនោះឡើយ ។ លោកឧទាហរណ៍ថា អ្នកជាកីឡាករដែលមានសកម្មភាពហ្វឹកហាត់ជាប់លាប់ ពួកគេតែងតែមានសុខភាពប្រក្រតីជាងមនុស្សគ្មានសកម្មភាពកីឡា បើទោះជាកីឡាករទាំងនោះមិនសូវបានដឹងពីអត្ថប្រយោជន៍ក្រៅពីចង់ចាញ់ឈ្នះរបស់ពួកគេ ។
មិនខុសគ្នាដែរ កីឡាករ-កីឡាការិនីគ្រប់ផ្នែកបានអះអាងថា តាំងពីពួកគេបានក្លាយជាជនសកម្មក្នុងការបញ្ចេញញើសតាមរយៈសកម្មភាពកីឡា បានធ្វើឱ្យផលប៉ះពាល់ចំពោះសុខភាពរបស់ពួកគេត្រូវបានកាត់បន្ថយជាអតិបរិមា ។ ប៉ុន្តែពួកគេក៏បានព្រមានផងដែរថា ការហ្វឹកហាត់ ឬការបញ្ចេញញើសលើសកម្រិត ហើយខ្វះរបបអាហារគ្រប់គ្រាន់ ក៏នឹងធ្វើឱ្យប៉ះពាល់សុខភាពវិញផងដែរ៕
ចែករំលែកព័តមាននេះ