រយៈពេល7ខែ ឥណទានអេស៊ីលីដាសម្រេចបានកំណើន3%

ថ្ងៃទី ៣០ ខែ សីហា ឆ្នាំ ២០១៨
ម៉ោង ០៧:៤០
គង់ ម៉ាលីន

រាជធានីភ្នំពេញ ៖ ការផ្តល់ឥណទានរបស់ធនាគារអេស៊ីលីដា ដែលជាធនាគារឈានមុខគេមួយនៅកម្ពុជា សម្រេចបានកំណើន៣%ក្នុងរយៈពេល៧ខែឆ្នាំនេះ បើធៀបនឹងរយៈពេលដូចគ្នាកាលពីឆ្នាំមុន ។

ប្រធាននាយកប្រតិបត្តិធនាគារ អេស៊ីលីដា ភីអិលស៊ី លោកបណ្ឌិត អុិន ចាន់នី បានមានប្រសាសន៍ឲ្យដឹងកាលពីចុងសប្តាហ៍មុនថា ទំហំឥណទានរបស់ធនាគារបានកើនទឹកប្រាក់ពី៣.០២២លានដុល្លារកាលពីឆ្នាំមុន រហូតដល់ចំនួន៣.១១២លានដុល្លារនៅដំណាច់ខែកក្កដា កន្លងមកនេះ ស្មើនឹងកំណើន៣% ។ លោកបន្តថា ការសម្រេចបានកំណើននេះ អាចធ្វើឲ្យធនាគារទទួលបានឥណទានតាមការគ្រោងទុកប្រចាំឆ្នាំ ដែលគ្រោងនឹងសម្រេចឲ្យបាន៩%នៅឆ្នាំនេះ ។ លោកបន្តថា ៖« លើសពីនេះទំហំប្រាក់បញ្ញើ បានកើនឡើងខ្ពស់ជាងឥណទាន ដោយទឹកប្រាក់បានកើនពី៣.២៤៩លានដុល្លារ រហូតដល់ទំហំ៣.៤០៥,៩លានដុល្លារអាមេរិក មានកំណើនជិត៥% »។ លោកបន្ថែមថា ៖« កំណើនឥណទាន និងប្រាក់បញ្ញើ បានឆ្លុះបញ្ចាំងពីភាពរឹងមាំរបស់វិស័យធនាគារនៅកម្ពុជា ក៏ដូចជាបង្ហាញពីទំនុកចិត្តរបស់ប្រជាពលរដ្ឋកើនឡើងផងដែរ »។

យោងតាមធនាគារជាតិនៃកម្ពុជា បច្ចុប្បន្នទ្រព្យសកម្មក្នុងវិស័យធនាគារមានចំនួន១២៥ទ្រីលានរៀល ស្មើនឹង៣១ប៊ីលានដុល្លារ កើនឡើង៧៣ដង បើធៀបនឹងឆ្នាំ១៩៩៨ ។ ក្នុងនោះ ឥណទានសរុបដែលបានផ្តល់ទៅគ្រប់វិស័យមានចំនួន៧១ទ្រីលានរៀល ស្មើនឹង១៧ប៊ីលានដុល្លារ ខណៈប្រាក់បញ្ញើសរុបបានកើនឡើង៧៧ទ្រីលានរៀល ស្មើនឹង១៩ប៊ីលានដុល្លារ ។

ទីប្រឹក្សាឧត្តមក្រុមប្រឹក្សាសេដ្ឋកិច្ចជាតិលោកបណ្ឌិត ម៉ី កល្យាណ បានថ្លែងថា ការរីកចម្រើនក្នុងវិស័យធនាគារ ក៏ដូចជាក្នុងប្រព័ន្ធ ហិរញ្ញវត្ថុកម្ពុជា បាននិងកំពុងឆ្ពោះទៅកាន់ភាពកាន់តែទុកចិត្តបាន ហើយប្រព័ន្ធនេះកាន់តែមានភាពរីកចម្រើន និងវិវត្តន៍ទៅមុខដោយវិជ្ជមាន ព្រោះបច្ចេកវិទ្យាបាននិងកំពុងជួយដល់វិស័យនេះ។

លោកបន្តថា ការមកដល់នៃធនាគារថ្មី បានផ្តល់ឲ្យវិស័យនេះមានភាពរីកចម្រើនទាំងធនធាន ទាំងបច្ចេកវិទ្យា និងមនុស្ស ព្រោះពេលធនាគារថ្មីៗមកដល់ ពួកគេនាំយកបច្ចេកវិទ្យាមក ដើម្បីជួយបណ្តុះបណ្តាលធនធានមនុស្សក្នុងស្រុក ដែលធ្វើឲ្យធនធានមនុស្សនៅក្នុងវិស័យនេះរីកចម្រើនថែមទៀត ។
លោកបន្តថា ៖« សុខភាពឥណទានមានភាពល្អប្រសើរ និងកំណើននៃឥណទានមិនកើនគំហុក និងឈានដល់ចំណុចគួរឲ្យបារម្ភនោះទេ » ៕