រាជធានីភ្នំពេញ ៖ មន្ត្រីជាន់ខ្ពស់មួយរូបនៃអតីតគណបក្សសង្គ្រោះជាតិលោក ម៉ាជ សុវណ្ណារ៉ា ដែលត្រូវបានដោះលែងពីពន្ធនាគារកាលពីយប់កណ្តាលអធាត្រថ្ងៃទី២៧ ឈានចូលថ្ងៃទី២៨ សីហា ឆ្នាំ២០១៨ បានប្រកាសនឹងធ្វើការជាមួយនឹងសម្តេចតេជោ…
រាជធានីភ្នំពេញ ៖ មន្ត្រីជាន់ខ្ពស់មួយរូបនៃអតីតគណបក្សសង្គ្រោះជាតិលោក ម៉ាជ សុវណ្ណារ៉ា ដែលត្រូវបានដោះលែងពីពន្ធនាគារកាលពីយប់កណ្តាលអធាត្រថ្ងៃទី២៧ ឈានចូលថ្ងៃទី២៨ សីហា ឆ្នាំ២០១៨ បានប្រកាសនឹងធ្វើការជាមួយនឹងសម្តេចតេជោ ហ៊ុន សែន នាយករដ្ឋមន្ត្រីកម្ពុជា នឹងថ្នាក់ដឹកនាំវ័យក្មេងរបស់គណបក្សកាន់អំណាច គឺកូនប្រុសទាំង៣របស់សម្តេចតេជោតែម្តង ។
ថ្លែងប្រាប់ទៅកាន់អ្នកសារព័ត៌មានភ្លាមៗ បន្ទាប់ពីត្រូវបានដោះលែងពីព្រៃស ជាមួយនឹងមនុស្ស១៣នាក់ផ្សេងទៀត ដែលជាសកម្មជនអតីតបកប្រឆាំងលោក ម៉ាជ សុវណ្ណារ៉ា បានថ្លែងអរគុណសម្តេចតេជោ និងព្រះមហាក្សត្រដែលបានលើកលែងទោសរូបលោក និងសកម្មជនផ្សេងទៀត និងបានបញ្ជាក់ថា លោកនាយករដ្ឋមន្ត្រីហ៊ុន សែន លោកមានផ្លួវដឹកនាំនយោបាយច្បាស់លាស់ ព្រោះអ្នកនយោបាយជាន់ខ្ពស់គេមិនដែលបិទផ្លូវនយោបាយទេ ។ គឺថា គេបិទផ្លូវម្ខាងគេទុកផ្លូវឲ្យចេញម្ខាង ដើម្បីឯកភាពជាតិខ្មែរ ។
លោក ម៉ាជ សុវណ្ណារ៉ា ថ្លែងបញ្ជាក់ថា «ខ្មែរស្បែកដូចគ្នា លោកនាយករដ្ឋមន្ត្រីក៏ស្បែកខ្មៅ គាត់កូនអ្នកស្រែ ខ្ញុំកូនអ្នកស្រែ ។ អញ្ចឹងគាត់នៅបន្តវេនកូនរបស់គាត់សុទ្ធតែអ្នកចេះដឹង បណ្ឌិតច្បាប់បណ្ឌិតយោធា សេដ្ឋកិច្ច ហើយខ្ញុំក៏អនុបណ្ឌិតវិទ្យាសាស្ត្រនយោបាយ ។ ខ្ញុំនៅស្រុកខ្មែរខ្ញុំយល់ពីវប្បធម៌ខ្មែរ យើងអាចធ្វើការជាមួយគ្នា …។ អញ្ចឹងខ្ញុំមានសង្ឃឹមថា ពេលនេះខ្មែរត្រូវឯកភាពជាតិគ្នាព្រោះយើងដើរមកជាង៤០ឆ្នាំ ក្រោយពីរបបប៉ុល ពត យើងឥតទាន់រីកចម្រើនអ្វីទេ យើងខ្ចីដង្ហើមសេដ្ឋកិច្ចគេដក» ។
អតីតមន្ត្រីជាន់ខ្ពស់មួយរូបនេះបានបន្តថា លោកជឿថា អ្នកដឹកនាំខ្មែរ គឺមានភាពវៃឆ្លាតនឹងចាប់ដៃគ្នាធ្វើការ ហើយលោកក៏បាន«អំពាវនាវដល់លោកនាយករដ្ឋមន្ត្រីហ៊ុន សែន ខ្ញុំអំពាវនាវដោយស្នាមញញឹមដល់ព្រះករុណាជីវិតតម្កល់លើត្បូង ខ្ញុំសង្ឃឹមថា លោកនាយករដ្ឋមន្ត្រីហ៊ុន សែន នឹងពិចារណាទោះបីនីតិវិធី នីតិរដ្ឋតុលាការក៏ដោយ តែខ្ញុំសង្ឃឹមថា មេបក្សរបស់ខ្ញុំគឺលោក កឹម សុខា នឹងត្រូវបានដោះលែងដោយគ្មានការចោទប្រកាន់ ព្រោះបើទុកទៀតវែងឆ្ងាយណាស់» ។
លោក ម៉ាជ សុវណ្ណារ៉ា បាននិយាយថា ការដោះលែងរូបលោក និងអ្នកផ្សេងៗទៀត គឺអត់មានពាក់ព័ន្ធអីនឹងសំពាធអន្តរជាតិនោះទេ ហើយរូបលោក និងអតីតសកម្មជនផ្សេងៗទៀតក៏មិនត្រូវបានគេទិញដែរ ដូច្នេះចូរកុំនិយាយថា តិចម៉ាជ សុវណ្ណារ៉ា និង១៤នាក់ ដែលត្រូវបានគេដោះលែងនោះត្រូវបានគេទិញក្បាលអីទៅអត់ទេ តែការដោះលែងនេះ គឺជាសញ្ញានៃ«ឯកភាពជាតិគ្នា» ។ អ្នកនយោបាយសំបូរវោហារូបនេះបានបន្តថា « ខ្ញុំជឿថា លោកនាយករដ្ឋមន្ត្រីហ៊ុន សែន ឥតបិទផ្លូវនយោបាយទេ ។ អ្នកដឹកនាំកំពូលគេចេះណាស់ តែចង់ឲ្យក្មេងជំនាន់ក្រោយលេងនយោបាយ …តែខ្ញុំចង់ឲ្យក្មេងសារក្រោយរៀនធ្វើនយោបាយ ដោយប្រើបញ្ញា កុំប្រើរឿងលាបពណ៌គ្នា វាហួសសម័យហើយ ។ ហើយខ្ញុំត្រូវធ្វើនយោបាយបន្តទៀត ព្រោះខ្ញុំជាប់គុក ដោយសារហេតុផលនយោបាយ រឿងអីខ្ញុំត្រូវរត់ចោលស្រុកឯណាទៀត ។ ខ្ញុំត្រូវធ្វើនយោបាយ តែខ្ញុំត្រូវធ្វើនយោបាយជាមួយអ្នកជំនាន់ក្រោយ គឺហ៊ុន ម៉ាណែត ហ៊ុន ម៉ានិត និងហ៊ុន ម៉ានី គឺធ្វើជាមួយគ្នា។
សូមបញ្ជាក់ថា អតីតមន្ត្រី និងសកម្មជនគណបក្សសង្គ្រោះជាតិចំនួន១៤នាក់ត្រូវបានតុលាការដោះលែងឲ្យមានសេរីភាពនៅវេលាជាងម៉ោង១២អធ្រាត្រឈានចូលថ្ងៃទី២៨ ខែសីហា ឆ្នាំ ២០១៨ នេះដែលការដោះលែងនេះត្រូវបានធ្វើឡើងបន្ទាប់ពីអ្នកទាំង១៤នាក់បានសរសេរលិខិតស្នើសុំលើកលែងទោសទៅលោកនាយករដ្ឋមន្ត្រី ហ៊ុន សែន កាលពីថ្ងៃទី២៤ ខែសីហា និងមានព្រះរាជក្រឹត្យលើកលែងទោសពីព្រះមហាក្សត្រ ។
ទណ្ឌិតទាំងនេះត្រូវបានតុលាការផ្តន្ទាទោសដាក់ពន្ធនាគារពី៧ដល់២០ឆ្នាំពីបទដឹកនាំកុបកម្ម និងចូលរួមកុបកម្មនៅទីលានប្រជាធិបតេយ្យចាស់ក្បែរវត្តភ្នំ បណ្តាលឲ្យសន្តិសុខជាង៣០នាក់របួសកន្លងមក ៕
ចែករំលែកព័តមាននេះ