រាជធានីភ្នំពេញ ៖ មន្ត្រីជាន់ខ្ពស់ស្ថានទូតថៃ ប្រចាំនៅកម្ពុជា បានឲ្យដឹងថា ខេត្តសៀមរាបជាខេត្តដែលមានសក្តានុពលសំខាន់មួយលើផ្នែកសេដ្ឋកិច្ច និងទេសចរណ៍ ពិសេសគឺជាមជ្ឈមណ្ឌលតាំងបង្ហាញផលិតផលនិងសេវាកម្មរបស់ប្រទេសជាដៃគូពាណិជ្ជកម្មនៅក្នុងតំបន់នាពេលបច្ចុប្បន្ន បន្ទាប់ពីទីក្រុងភ្នំពេញ ។
លោក ជីរ៉ាវុឍ សុវណ្ណាអាត អគ្គទីប្រឹក្សាពាណិជ្ជកម្មប្រចាំស្ថានទូតថៃនៅកម្ពុជា មានប្រសាសន៍ក្នុងសន្និសីទសារព័ត៌មានមួយ កាលពីថ្ងៃទី២៣ សីហា កន្លងមកថា ៖« សៀមរាបជាខេត្តមួយមានសក្តានុពលខ្លាំងខាងផ្នែកសេដ្ឋកិច្ចនិងទេសចរណ៍ ដែលទទួលបានភ្ញៀវទេសចរចូលមកទស្សនាមកពីជុំវិញពិភពលោក បន្ទាប់ពីទីក្រុងភ្នំពេញ ។ ខេត្តក៏មានសក្តានុពលក្នុងការដាក់តាំងបង្ហាញផលិតផល និងសេវាកម្មរបស់ក្រុមហ៊ុននានាដែលជាដៃគូពាណិជ្ជកម្មផងដែរ ។ ដោយមើលឃើញបែបនេះ ទើបថៃគ្រោងនឹងរៀបចំពិព័រណ៍ Mini Thailand Week 2018 នាពេលខាងមុខ »។
លោកបានលើកឡើងថា ទំនិញថៃបាននាំចូល និងចែកចាយនៅប្រទេសកម្ពុជា តែងទទួលបានការគាំទ្រពីអតិថិជននៅកម្ពុជាបានយ៉ាងល្អ។ ទន្ទឹមនេះ តំណាងពាណិជ្ជកម្មថៃ តែងតែណែនាំដល់ពាណិជ្ជករថៃនាំចូលទំនិញមកទីផ្សារកម្ពុជា ត្រូវផ្តោតសំខាន់លើគុណភាព ដូចនឹងការនាំចេញទៅបណ្តាប្រទេសផ្សេងៗ ទៀតដែរ ។ លោកបន្តថា ៖« យើងមិនបណ្តោយឱ្យទំនិញថៃដែលមិនមានគុណភាពលក់នៅទីផ្សារប្រទេសកម្ពុជាទេ គឺយើងតែងតែតាមដានជាប្រចាំ ធ្វើយ៉ាងណាឱ្យទំនិញថៃលក់នៅកម្ពុជានោះគឺជាទំនិញដែលមានគុណភាព »។
នាយិកាក្រុមហ៊ុនផលិតនាំស្រួយលីលី អ្នកស្រី កែវ មុំ បានឲ្យដឹងដែរថា ការនាំចូលទំនិញដែលមានគុណភាព និងតម្លៃសមរម្យ គឺធ្វើឲ្យពលរដ្ឋកម្ពុជាទទួលបានទំនិញល្អ និងមិនប៉ះពាល់សុខភាពសម្រាប់ប្រើប្រាស់ ប៉ុន្តែបើគិតពីផលអវិជ្ជមានវិញ វាធ្វើឱ្យប៉ះពាល់ដល់ឧស្សាហកម្មផលិតក្នុងស្រុក ។
អ្នកស្រី កែវ មុំ ថ្លែងថា ៖« តាមទស្សនៈខ្ញុំ បើថៃនាំចូលផលិតផលដែលមានគុណភាព និងតម្លៃសមរម្យមកលក់នៅកម្ពុជា បើយើងគិតអំពីគុណសម្បត្តិ គឺពលរដ្ឋអាចប្រើប្រាស់ទំនិញមានគុណភាពដែរ តែបើគិតពីគុណវិបត្តិវិញ វាធ្វើឱ្យប៉ះពាល់ដល់ឧស្សាហកម្មក្នុងស្រុក »។ អ្នកស្រីបន្តថា ៖« ឧស្សាហកម្មនៅក្នុងស្រុកយើងផលិតបានតិច តែចំណាយថ្លៃដើមខ្ពស់ អីចឹងវាពិបាកក្នុងការប្រកួតប្រជែង ។ ទោះបីជាយ៉ាងណា បើសិនជាឧស្សាហកម្មក្នុងស្រុកខិតខំប្រឹងប្រែងធ្វើម៉េចឱ្យផលិតកម្មអាចចំណាយថ្លៃដើមទាប ផលិតផលស្របតាមស្តង់ដា, មានអនាម័យ និងតម្លៃសមរម្យនោះ យើងអាចប្រកួតប្រជែងគ្នាបាន »។
អ្នកស្រីលើកឡើងថា បច្ចុប្បន្ន លំហូរផលិតផលនាំចេញ និងនាំចូលដោយសេរី និងរួចពន្ធ ។ អីចឹង យើងមិនអាចហាមឃាត់គេបានយ៉ាងម៉េចទេ ដូច្នេះមានតែខ្លួនយើងដែលជាម្ចាស់ឧស្សាហកម្មក្នុងស្រុកហ្នឹង ខំពង្រឹងគុណភាពផលិតផល និងធ្វើឲ្យមានស្តង់ដាដែលអាចប្រកួតប្រជែងបាន »។
លោកបណ្ឌិត ម៉ី កល្យាណ ទីប្រឹក្សាឧត្តមក្រុមប្រឹក្សាសេដ្ឋកិច្ចជាតិ បានថ្លែងថា ស្ថិតក្នុងក្របខ័ណ្ឌនៃការធ្វើសមាហរណកម្មអាស៊ាន ការមានលំហូរផលិតផលឬទំនិញដោយសេរីជារឿងធម្មតាក្នុងសហគមន៍នេះ ។ ហេតុនេះផលិតករក្នុងស្រុកគួរទទួលយកបញ្ហានេះ ហើយរិះគិតរកវិធីថ្មីៗដើម្បីបង្កើនការលក់ផលិតផលរបស់ខ្លួន ព្រោះនិន្នាការទីផ្សារមិននៅមួយកន្លែងទេ វាតែងតែមានការផ្លាស់ប្តូរ ។លោកបន្តថា ៖« ការមានគំនិតច្នៃប្រឌិតថ្មី និងយុទ្ធសាស្ត្រទីផ្សារច្បាស់លាស់ជាងមុន និងបត់បែនតាមនិន្នាការសង្គម គួរតែប្រកាន់យកដោយសហគមន៍ផលិតក្នុងស្រុក »៕
ចែករំលែកព័តមាននេះ