ខេត្តសៀមរាប ៖ មេបញ្ជាការតំបន់ប្រតិបតិ្តការសឹកសៀមរាប លោកឧត្តមសេនីយ៍ទោ ឃឹម ប៊ុនសុង នឹងឡើងកាន់តំណែងជាអភិបាលខេត្តនាពេលដ៏ខ្លីខាងមុខនេះជំនួសលោកស៊ូ ភិរិន្ទ ដែលត្រូវបានដាក់ឲ្យចូលនិវត្តន៍ ។
ការប្រកាសចូលកាន់តំណែងជាផ្លូវការនឹងត្រូវធ្វើឡើងនៅថ្ងៃទី២៩ មេសា ក្រោមអធិបតីភាពលោកឧបនាយករដ្ឋមន្រ្តី ទៀ បាញ់ រដ្ឋមន្រ្តីក្រសួងការពារជាតិ ។ នេះបើតាមការប្រាប់ដោយផ្ទាល់ពីលោកឧត្តមសេនីយ៍ឃឹម ប៊ុនសុង កាលពីថ្ងៃទី២៦ មេសា ។ លោក ឃឹម ប៊ុនសុង បានបន្ថែមថា តំណែងជាមេបញ្ជាការយោធាខេត្តបច្ចុប្បន្នរបស់លោក នឹងត្រូវជំនួសដោយលោកវរសេនីយ៍ឯក គង់ ស៊ី ដែលជាមេបញ្ជាការរង និងសេនាធិការតំបន់ប្រតិបត្តិការសឹកខេត្ត ។
ទោះបីជាយ៉ាងណា នៅថ្ងៃ២៦ មេសា អ្នកនាំពាក្យក្រសួងមហាផ្ទៃ លោកឧត្តមសេនីយ៍ខៀវ សុភ័គ បានមានប្រសាសន៍ប្រាប់តាមទូរស័ព្ទថា ជុំវិញកាលបរិច្ឆេទនៃការប្រកាសចូលកាន់តំណែងជាអភិបាលខេត្តថ្មីជំនួសលោកស៊ូ ភិរិន្ទ នោះលោកនៅមិនទាន់ទទួលបានលិខិតស្នាមជាក់លាក់នៅឡើយទេ ។
សូមបញ្ជាក់ថា លោកស៊ូ ភិរិន្ទ បានផ្លាស់មកកាន់តំណែងជាអភិបាលខេត្តសៀមរាបជំនួសលោក ស៊ឹម ស៊ុន កាលពីថ្ងៃទី២៧ មីនា ឆ្នាំ ២០០៦ បើគិតត្រឹមថ្ងៃទី២៩ ខែមេសា ខាងមុខ គឺមានរយៈពេល៧ ឆ្នាំ១ខែ និង២ថ្ងៃ ។
កាលថ្ងៃទី១៨ មេសា ឆ្នាំ២០១៣ នៅក្នុងពិធីសម្ពោធអគាររដ្ឋបាលថ្មីរបស់សាលាខេត្តកំពត សម្តេចតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជាបានប្រកាសថា អភិបាលខេត្ត-រាជធានីចំនួន១០នឹងមានការផ្លាស់ប្តូរ ក្នុងនោះខ្លះដល់អាយុចូលនិវត្តន៍ ខ្លះមានបញ្ហាសុខភាព និងខ្លះត្រូវទៅឈរឈ្មោះជាតំណាងរាស្រ្តសម្រាប់ការបោះឆ្នោតជាតិនៅខែកក្កដាខាងមុខ ។
អភិបាលខេត្ត-រាជធានី ដែលត្រូវផ្លាស់ប្តូរចេញពីតំណែងនោះរួមមាន លោក កែប ជុតិមា អភិបាលរាជធានីភ្នំពេញដែលឈរឈ្មោះជាតំណាងរាស្ត្រ លោកស៊ូ ភិរិន្ទ អភិបាលខេត្តសៀមរាប លោក ឈុន ឈន់ អភិបាលខេត្តកំពង់ធំ លោកហ៊ុន ណេង អភិបាលខេត្តកំពង់ចាម លោក ឡូយ សុផាត អភិបាលខេត្តស្ទឹងត្រែង លោក ឈុន ស៊ីរុន អភិបាលខេត្តកណ្តាល លោក កង ហ៊ាង អភិបាលខេត្តកំពង់ស្ពឺ លោក ចាន់ យឿន អភិបាលខេត្តមណ្ឌលគិរី ។ រីឯលោក ប៉ិច សុខិន អភិបាលខេត្តឧត្តរមានជ័យ ក៏ត្រូវផ្លាស់ប្តូរដែរដោយមានបញ្ហាសុខភាព និងលោក អ៊ុង អឿន អភិបាលខេត្តបន្ទាយមានជ័យត្រូវឈរឈ្មោះជាតំណាងរាស្រ្ត ។
សម្រាប់រាជធានីភ្នំពេញដែលជាបេះដូងនៃព្រះរាជាណាចក្រកម្ពុជាក៏ត្រូវបានប្រភពនានាឱ្យដឹងថា ពិធីផ្ទេរតំណែងរវាងលោក កែប ជុតិមាអភិបាលចេញនិងលោក ប៉ា សុជាតិវង្សចូលនឹងបានធ្វើថ្ងៃទី៣ ឧសភា ខែក្រោយនេះ ៕
ចែករំលែកព័តមាននេះ