អភិបាលរងខេត្តស្ទឹងត្រែង ជំរុញឱ្យពន្លឿនការវាស់វែងដីធ្លីជាប្រព័ន្ធឱ្យទាន់ផែនការ ៦ខែ
- ស្ទឹងត្រែង
ខេត្តស្ទឹងត្រែង៖ អាជ្ញាធរខេត្តស្ទឹងត្រែង បាននិងកំពុងជម្រុញយ៉ាងខ្លាំងដល់មន្ត្រីជំនាញពាក់ព័ន្ធ ឱ្យបង្កើនល្បឿនចុះវាស់វែងដីធ្លីជូនប្រជាពលរដ្ឋ ក្នុងគោលដៅសម្រេចឱ្យបានតាមផែនការរយៈពេល ៦ខែ របស់ក្រសួងរៀបចំដែនដី នគរូបនីយកម្ម និងសំណង់។
នៅក្នុងកិច្ចប្រជុំគណៈកម្មការរដ្ឋបាល ស្តីពីការកំណត់ព្រំប្រទល់រដ្ឋបាល ទំហំផ្លូវ អូរ បឹង ព្រែក និងប្រឡាយ ក្នុងតំបន់វិនិច្ឆ័យចុះបញ្ជីដីធ្លីមានលក្ខណៈជាប្រព័ន្ធ កាលពីថ្ងៃទី២៨ ខែឧសភា ឆ្នាំ២០២៦ ន្លងទៅនេះ លោក ប៉ែន លីណាត អភិបាលរងខេត្តស្ទឹងត្រែង បានសង្កត់ធ្ងន់ថា ពេលវេលាដែលនៅសល់តាមផែនការគឺមានខ្លីបំផុត។ ដូចនេះ មន្ត្រីជំនាញត្រូវសហការគ្នាយ៉ាងជិតស្និទ្ធជាមួយអាជ្ញាធរមូលដ្ឋាន ដើម្បីពន្លឿនការងារនេះ សំដៅចែកប័ណ្ណកម្មសិទ្ធិ (ប្លង់រឹង)ជូនប្រជាពលរដ្ឋឱ្យបានគ្រប់ៗគ្រួសារ។
លោកអភិបាលរងខេត្ត បានណែនាំឱ្យអាជ្ញាធរមូលដ្ឋាន និងមន្ត្រីជំនាញ ត្រូវយកចិត្តទុកដាក់ខ្ពស់លើការកំណត់ដីចំណីឱ្យបានច្បាស់លាស់ មុននឹងធ្វើការចុះបញ្ជីដីធ្លី គឺត្រូវកំណត់ព្រំប្រទល់ដីចំណីអូរ បឹង ព្រែក ប្រឡាយ និងដីតាមជួរមាត់ទន្លេឱ្យបានត្រឹមត្រូវតាមអនុក្រឹត្យរបស់រាជរដ្ឋាភិបាល។ ត្រូវប្រើយុទ្ធសាស្ត្រឆ្លៀតឱកាសនេះ បើកពង្រីកផ្លូវក្នុងភូមិ និងផ្លូវអាទិភាពនានាឱ្យបានធំទូលាយតាមលទ្ធភាពជាក់ស្តែង ដើម្បីបម្រើដល់ការអភិវឌ្ឍ និងសេចក្តីត្រូវការទៅថ្ងៃអនាគត។
ពាក់ព័ន្ធទៅនឹងការងារបច្ចេកទេស លោក ឈា ប៊ុនឡា ប្រធានការិយាល័យភូមិបាលស្រុកសៀមប៉ាង បានបញ្ជាក់ថា ក្រុមការងារជំនាញបានអនុវត្តតាមច្បាប់និងអនុក្រឹត្យជាធរមាន ព្រមទាំងបានពន្យល់ណែនាំដល់ប្រជាពលរដ្ឋ ធ្វើឱ្យពួកគាត់មានការយល់ដឹងច្បាស់លាស់ និងចូលរួមសហការយ៉ាងរលូន ក្នុងការបើកផ្លូវ និងកំណត់ទីតាំងដីធ្លី។
ទាក់ទិនកិច្ចប្រឹងប្រែងការងារខាងលើ ជាលទ្ធផលនៃកិច្ចប្រជុំ គណៈកម្មការរដ្ឋបាលបានឯកភាពសម្រេចលើលទ្ធផលសិក្សាចុះបញ្ជីដីធ្លីមានលក្ខណៈជាប្រព័ន្ធ នៅក្នុងភូមិមួយចំនួននៃស្រុកសៀមប៉ាង និងស្រុកសៀមបូក ដើម្បីត្រៀមប្រកាសជាតំបន់វិនិច្ឆ័យ និងចែកប័ណ្ណកម្មសិទ្ធិជូនពលរដ្ឋក្នុងពេលឆាប់ៗខាងមុខនេះ រួមមាន៖
១. ស្រុកសៀមប៉ាង (ឃុំព្រែកមាស) ភូមិពងគ្រៀល.ភូមិខិះស្វាយ.ភូមិខិះក្រោម
២. ស្រុកសៀមបូក ឃុំអូរម្រះ៖ ភូមិកោះជ្រីម និងភូមិអូរឡង់ ឃុំសៀមបូក៖ ភូមិសៀមបូក
ទន្ទឹមនឹងនេះអាជ្ញាធរក៏បានណែនាំបន្ថែម៖សម្រាប់បងប្អូនប្រជាពលរដ្ឋរស់នៅក្នុងភូមិ-ឃុំ ខាងលើ សូមរៀបចំឯកសារពាក់ព័ន្ធ (អត្តសញ្ញាណប័ណ្ណ សៀវភៅគ្រួសារ សៀវភៅស្នាក់នៅ ឬលិខិតទិញលក់/ផ្ទេរសិទ្ធិដីធ្លីដែលមានស្រាប់) និងចូលរួមសហការជាមួយអាជ្ញាធរក្នុងការចង្អុលបង្ហាញព្រំដី ដើម្បីឱ្យដំណើរការចុះបញ្ជី និងការទទួលបានប័ណ្ណកម្មសិទ្ធិស្របច្បាប់ (ប្លង់រឹង) ប្រព្រឹត្តទៅបានលឿន និងត្រឹមត្រូវ៕
ចែករំលែកព័តមាននេះ