រាជធានីភ្នំពេញ ៖ កម្មវិធី «ដាស់ស្មារតីជាតិ-Day of Reckoning» ធ្វើឡើងក្នុងគោលបំណង ដើម្បីរំឭក និងចងចាំអំពីអតីតកាលដ៏ជូរចត់ ដែលប្រជាជនកម្ពុជាទាំងមូល បានឆ្លងកាត់រួមគ្នា ។
ព្រឹត្តិការណ៍ «ដាស់ស្មារតីជាតិ» រៀបចំឡើងដោយសហភាពសហព័ន្ធយុវជនកម្ពុជា (ស.ស.យ.ក) នៅល្ងាចថ្ងៃទី២៨ ខែឧសភា ឆ្នាំ២០២៦ គឺធ្វើឡើងចំថ្ងៃខួប១ឆ្នាំ នៃលួចការបាញ់ដោយខុសច្បាប់ ពីសំណាក់យោធាថៃ លើវីរកងទ័ពកម្ពុជា ១រូប ។
ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា បានលើកឡើងថា គោលបំណងតែមួយគត់នៃកម្មវិធី «ដាស់ស្មារតីជាតិ-Day of Reckoning» គឺនាំមកនូវការជួបជុំក្រោមដំបូលតែមួយ ដើម្បីរំឭក និងចងចាំអំពីអតីតកាលដ៏ជូរចត់ ប៉ុន្តែពោរពេញដោយមនោសញ្ចេតនា ដែលបានឆ្លុះបញ្ចាំងពីភាពអស្ចារ្យ ដែលប្រជាជនកម្ពុជាទាំងមូល បានឆ្លងកាត់រួមគ្នា ក្នុងនាមជាប្រជាជាតិមួយ ។
ឯកឧត្តម បានបន្តថា កម្ពុជាផ្តល់តម្លៃយ៉ាងជ្រាលជ្រៅចំពោះសន្តិភាព ដែលយើងសម្រេចបានដោយលំបាកនេះ។ សន្តិភាព គឺជាអ្វីដែលយើងទាំងអស់គ្នា តែងបន្តការពារ ថែរក្សា និងប្រកាន់ខ្ជាប់ជានិច្ច ព្រមជាមួយនឹងស្មារតី នៃការរួមរស់ជាមួយគ្នា ប្រកបដោយសន្តិសហវិជ្ជមាន និងកិច្ចសហប្រតិបត្តិការល្អ ដើម្បីសម្រេចឱ្យបាននូវចក្ខុវិស័យរបស់រាជរដ្ឋាភិបាល ក្នុងការប្រែក្លាយព្រះរាជាណាចក្រកម្ពុជា ទៅជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសអភិវឌ្ឍន៍នៅឆ្នាំ២០៥០ ដើម្បីឧត្តមប្រយោជន៍របស់ប្រជាពលរដ្ឋខ្មែរគ្រប់រូប ។
កម្មវិធី «ដាស់ស្មារតីជាតិ» នេះ ត្រូវបានរៀបចំឡើងក្នុងគោលបំណងជំរុញការចងចាំពីអ្វីដែលកម្ពុជាធ្លាប់បានឆ្លងកាត់ និងប្រែក្លាយការឈឺចាប់ក្នុងអតីតកាលឱ្យទៅជាកម្លាំងជំរុញទឹកចិត្តប្រជាជនក្នុងការអភិវឌ្ឍសមត្ថភាព និងការកសាងជាតិឱ្យកាន់តែរឹងមាំ ដោយបញ្ចៀសដាច់ខាតនូងទស្សនៈជ្រុលនិយម និងការគុំកួនសងសឹក ។
មិនតែប៉ុណ្ណោះ កម្មវិធី «ដាស់ស្មារតីជាតិ» ដ៏ឧឡារឹកនេះ ក៏បានផ្តល់ឱកាសដល់ប្រជាពលរដ្ឋខ្មែរ ជាពិសេសយុវជនជំនាន់ក្រោយបានយល់ពីដំណើរជាតិកម្ពុជា ដែលរួមមានការធ្លាក់ចុះ នៃសង្គមជាតិ សោកនាដកម្ម ភាពសោកសង្រេង និងការងើបឡើងវិញ ជាមួយនឹងវឌ្ឍនភាពជាបន្តបន្ទាប់ នៃប្រជាជាតិកម្ពុជាសម័យទំនើប រហូតដល់ព្រឹត្តិការណ៍ឈ្លានពានដែនអធិបតេយ្យភាពខ្មែរក្នុងឆ្នាំ២០២៥ កន្លងមកនេះ ។
នៅក្នុងកម្មវិធីដ៏មានអត្ថន័យនាថ្ងៃនេះ មានការដាក់តាំងបង្ហាញនូវផ្ទាំងគំនូរដែលលាតត្រដាងនូវការពិត ដែលកម្ពុជាបានជួបប្រទះកាលពីក្នុងឆ្នាំ២០២៥ និងមានទីតាំងគោរពវិញ្ញាណក្ខន្ធដល់កងកម្លាំង ដែលបានពលីជីវិតក្នុងការការពារជាតិ ការតាំងបង្ហាញពីសំណល់សង្គ្រាម ឯកសណ្ឋានរបស់កងកម្លាំងដែលបានពលី ទង់ជាតិកម្ពុជា ដែលត្រូវបានបំផ្លាញដោយយោធាថៃ បំណែកលំនៅឋានរបស់ប្រជាពលរដ្ឋដែលបានបែកបាក់ និងខូចខាតដោយសារសង្គ្រាម ។
បន្ថែមពីលើនេះ អ្នកចូលរួមទាំងអស់ បានបង្ហាញនូវការប្ដេជ្ញាចិត្តក្នុងការឆ្ពោះទៅមុខជាប្រជាជាតិតែមួយនៅលើផ្ទាំងមួយដែលត្រូវបានរៀបចំ ការដង្ហែទង់ជាតិ នៃព្រះរាជាណាចក្រកម្ពុជា ការចាក់ខ្សែវីដេអូ រួមទាំងការសម្ដែងទស្សនីយភាពដែលរំលេចពីអត្តសញ្ញាណ និងមោទនភាពជាតិផងដែរ ៕
ចែករំលែកព័តមាននេះ