រាជធានីភ្នំពេញ ៖ ឃ្លាំងស្តុកអ៊ីសូឡង់ និងសម្ភារផ្សេងៗរបស់រោងចក្រផលិតស័ង្កសីគាបស្នោ មួយកន្លែង ត្រូវបានភ្លើងឆាបឆេះអស់ទាំងស្រុង ដែលសង្ស័យបណ្ដាលមកពីហេតុការណ៍ឆ្លងចរន្តអគ្គិសនី ហើយអ្វីដែលគួរឲ្យមនការព្រួយបារម្ភនោះ គឺនៅក្បែរឃ្លាំងនោះមានលំនៅដ្ឋានអ្នកភូមិជាច្រើខ្នង ប៉ុន្តែភ្លាមៗនោះ ត្រូវបានអាជ្ញាធរ និងសមត្ថកិច្ច ព្រមទាំងរថយន្តពន្លត់អគ្គិភ័យបានទៅដល់ជាច្រើនគ្រឿង ជួយបាញ់ទឹកពន្លត់ ទើបមិនរាលដល់លំនៅដ្ឋានទាំងនោះឡើយ ។
ហេតុការណ៍នោះបានកើតឡើង កាលពីវេលាម៉ោង២និង២៥នាទីរសៀលថ្ងៃទី២៩ ខែឧសភា ឆ្នាំ២០២៦ ស្ថិតនៅក្នុងភូមិក្រាំង សង្កាត់ត្រពាំងក្រសាំង ខណ្ឌពោធិ៍សែនជ័យ រាជធានីភ្នំពេញ ។
ប្រជាពលរដ្ឋបាននិយាយថា រោងចក្រនេះផលិតស័ង្កសី គាបស្នោ មានចំនួន៥អគារ ប៉ុន្តែពួកគាត់មិនបានដឹងថា ឃ្លាំងស្តុកអ៊ីសូឡង់ និងសម្ភារផ្សេងៗ ដែលត្រូវភ្លើងឆេះនោះមានទំហំប៉ុន្មានម៉ែត្រការ៉េ នោះទេ រីឯមានម្ចាស់ឈ្មោះ ហុង ប៉ោម៉េង ភេទប្រុស ហើយនៅក្នុងនោះមានកម្មករធ្វើការច្រើនគួរសមដែរ ។ ដោយឡែក នៅថ្ងៃកើតហេតុ ខណៈដែលកម្មករកំពុងធ្វើការ ស្រាប់តែមានហេតុការណ៍ឆ្លងចរន្តអគ្គិសនី និងមានសម្លេងផ្ទុះ ហើយក៏មានការឆាបឆេះសម្ភារនៅក្នុងឃ្លាំង និងអគារឃ្លាំងនៅផ្នែកខាងក្រោយទាំងមូលយ៉ាងសន្ធោសន្ធៅ និងឆេះយ៉ាងឆាប់រហ័សបំផុត ព្រោះនៅទីនោះពោរពេញទៅដោយរបស់ដែលងាយឆេះដូចជាស្នោ ជាដើម ។
ប្រជាពលរដ្ឋ បានប្រាប់ទៀតថា ខណៈនោះពួកគាត់មិនអាចជួយពន្លត់ទាន់នោះទេ ដោយសារតែភ្លើងឆេះខ្លាំងពេក ហើយក៏មានការព្រួយបារម្ភបំផុត ព្រោះនៅស្ទើរតែជុំវិញរោងចក្រនោះមានលំនៅដ្ឋានជាច្រើខ្នង មិនតែប៉ុណ្ណោះភ្លើងបានឆាបឆេះវាំងននផ្ទះឈើ១ខ្នង ដែលស្ថិតនៅចម្ងាយប្រមាណ៥ទៅ៦ម៉ែត្រ ពីអគារឃ្លាំងនោះទៀតផងតែពន្លត់ទាន់ ទើបប្រញាប់រាយការណ៍ជូនអាជ្ញាធរនិងសមត្ថកិច្ចឲ្យជួយអន្តរាគមន៍ ។ បន្តិចក្រោយមកអាជ្ញាធរ និងសមត្ថកិច្ចសង្កាត់ត្រពាំង្រសាំងបានទៅដល់ ហើយក៏មានរថយន្តពន្លត់អគ្គិភ័យបានទៅដល់ជាបន្តបន្ទាប់ច្រើនគ្រឿង ធ្វើសកម្មភាពបាញ់ទឹកពន្លត់រហូតរលត់ទៅវិញ ប៉ុន្តែអគារឃ្លាំ១ខ្នងនិងសម្ភារៈនៅក្នុងនោះបានរងការខូចខាទាំងស្រុង ៕
ចែករំលែកព័តមាននេះ