ខេត្តកំពង់ធំ ៖ ភ្នំសន្ទុក ស្ថិតនៅក្បែរបណ្តោយផ្លូវជាតិលេខ០៦ នៅក្នុងភូមិស្វាយកាល់ ឃុំកកោះ ស្រុកសន្ទុក ខេត្តកំពង់ធំ បើយើងធ្វើដំណើរមកពីទីក្រុងភ្នំពេញដោយរថយន្តចម្ងាយប្រហែល១៥០គីឡូម៉ែត្រ ។
នៅខាងស្តាំដៃយើងនឹងក្លោងទ្វារវត្តមួយដាក់ឈ្មោះថា វត្តចោមចុងគិរី ហើយនៅជិតក្លោងទ្វារវត្តចោមចុងគិរីនេះក៏មានប៉ានូដ៏ធំមួយសរសេរដាក់ថា« រមណីយដ្ឋានភ្នំសន្ទុក» យើងបត់រថយន្តចូលទៅប្រហែលជាង២គីឡូម៉ែត្រ និងទៅដល់ជើងភ្នំសន្ទុក ដែលភ្នំសន្ទុកមានកម្ពស់១៨០ម៉ែត្រ បណ្តោយ១៥៥២ម៉ែត្រ ទទឹងប្រហែល១០០០ម៉ែត្រ និងខ្នងភ្នំប្រវែង៥០០ម៉ែត្រ ។
បើយើងធ្វើដំណើរឡើងទៅលើកំពូលភ្នំដោយថ្មើរជើងទៅតាមកាំជណ្តើរនោះ គឺមានចំនួន៨០៩កាំ នៅពេលដែលប្រិយមិត្តធ្វើដំណើរដោយថ្មើរជើងទៅតាមកាំជណ្តើរ ដែលអមសងខាងផ្លូវ ដែលពោរពេញទៅដោយដើមឈើតូចធំ ផ្តល់ជាម្លប់ដ៏ត្រជាក់ត្រជុំ ធ្វើឲ្យក្នុងអារម្មណ៍របស់យើង រាងហត់នឿយបន្តិចម៉ែន តែហាក់បីដូចជាបំភ្លេចចោលអស់នូវទុក្ខកង្វល់ និងជំងឺតម្កាត់ដែលមានក្នុងខ្លួន មួយសន្ទុះយើងនឹងមកដល់កន្លែងចាន់ចែរ៉ែដែលជាកន្លែងទម្លាក់កាក់បួងសួងសុំសេចក្តីសុខ យើងធ្វើដំណើរឡើងបន្តទៅដល់លើកំពូលភ្នំ យើងធ្វើដំណើរតាមគៀនព្រះវិហារដើរទៅខាងមុខនឹងឃើញនូវស្នាមព្រះបាទជាន់ទុកឡើងទៅមុខបន្តិចទៀត គេឃើញមានថ្មពីរដុំដែលមានរាងដូចសុដន់ មួយតូច មួយធំ ដែលចាស់ៗតែងនិយាយថា ថ្មមួយគូរនេះ ថ្មរាងតូចតំណាងឲ្យដោះក្រមុំ រីឯថ្មធំតំណាងឲ្យដោះសណ្តាយ ។
ប្រិយមិត្តគួរកត់សម្គាល់ផងដែរថា នៅជិតថ្មតំណាងឲ្យសុដន់នេះក៏មានរូងមួយដែលចាស់ៗបុរាណលោកតែងតែនិយាយថា រូងនេះមានជម្រៅជ្រៅណាស់ កាលពីសម័យមុន ហើយក៏គ្មានអ្នកណាដឹងថា រូងនេះមានជម្រៅដល់ណានោះដែរ ក៏គ្មានអ្នកណាបានដឹង ឬក៏បានដើរចូលទៅធ្វើការស្រាវជ្រាវនោះទេក៏ប៉ុន្តែ ដើម្បីចង់ដឹងឲ្យច្បាស់ចាស់ៗពីសម័យបុរាណលោកបាននាំគ្នាទម្លាក់ដូងទុំ ដែលគេធ្វើជាស្លាធម៌ ចូលទៅក្នុងរូងអាថ៌កំបាំងពីលើកំពូលភ្នំសន្ទុក ស្រាប់តែប៉ុន្មានថ្ងៃក្រោយមកពួកគាត់បានឃើញស្លាធម៌នេះ ទៅផុសឯទន្លេសាបឯណោះ តែរហូតមកដល់បច្ចុប្បន្ន រូងដ៏អាថ៌កំបាំងនេះនៅតែស្ថិតក្នុងភាពអាថ៌កំបាំងដដែល ដោយសាររូបភ្នំនោះត្រូវបានបិតជិត និងយកដុំថ្មធំៗវែងៗទៅតម្រៀបគ្នាពីលើមាត់រូងនេះ ហើយក៏គ្មានអ្នកណាម្នាក់បានដឹងច្បាស់ថា រូងខាងលើនេះ ត្រូវបានគេបិតផ្ចិតតាំងពីពេលណានោះដែរ ពាក់ព័ន្ធនឹងរូងភ្នំអាថ៌កំបាំងខាងលើនេះ ។
ខាងមន្ត្រីនៃមន្ទីរវប្បធម៍ ខេត្តកំពង់ធំ ប្រាប់ថា នេះគ្រាន់តែជារឿងដែលចាស់និយាយតៗគ្នាតែប៉ុណ្ណោះ តែការពិតទៅរូងនេះត្រូវបានជិតដោយសារ គេបិត ឬក៏យូរទៅដីហូរលប់ជិតក៏ថា បាន ហើយក៏មិនដែលឮថា មានអ្នកណាដើរចូលទៅធ្វើការស្រាវជ្រាវនៅក្នុងរូងនោះដែរ ។
ចំណែកលោកពូឈ្មោះ នង ហោ អាយុ៥៦ឆ្នាំ រស់នៅភូមិសន្ទុកក្នុង ឃុំកកោះ ស្រុកសន្ទុក លោកពូជាអ្នកប្រកបរបរកូតទ្រ សុំប្រាក់ចិញ្ចឹមជីវិតនៅលើភ្នំសន្ទុកប្រាប់ថា គាត់រស់នៅស្រុកនេះជាច្រើនឆ្នាំមកហើយ រឿងរូងភ្នំខាងលើនេះលោកក៏មិនបានដឹងថា គេបិតតាំងពីពេលណានោះទេ ឮតែចាស់ៗនិយាយតែឥឡូវនេះក៏មានប្រជាពលរដ្ឋជឿថា ជារូងស័ក្ដិសិទ្ធិអ្នកខ្លះនាំគ្នាទម្លាក់ប្រាក់ចូលទៅក្នុងរូងនោះបន់ស្រន់សុំសេចក្តីនៅពេលដែលលុយនៅក្នុងនោះបានច្រើនបន្តិចទើបខាងគណៈកម្មការវត្តឲ្យមនុស្សចុះទៅប្រមូលយកមកម្តង ។
លោកពូបន្តទៀតថា គាត់គ្រាន់តែធ្លាប់ដឹងថា នៅលើកំពូលភ្នំសន្ទុកនេះកាលពីសម័យរំដោះ ពួកទាហ៊ានយួនបានមករស់នៅលើនេះចៃដន្យមានថ្ងៃមួយក៏មានសត្វពស់ដ៏ធំមួយក្បាលមកបង្ហាញខ្លួននៅលើកំពូលភ្នំនេះ ហើយក៏ត្រូវបានពួកទាហានយួននាំគ្នាបាញ់សម្លាប់ពស់នោះ រួចហើយកាប់យកសាច់មកចែកគ្នាស៊ី ។
ក្រោយពីបានស៊ីសាច់ពស់នោះហើយ មិនយូរប៉ុន្មាន ទាហានយួនទាំងនោះក៏បានស្លាប់អស់ ហើយពួកគេក៏បានយកសពគ្នាវាទៅកប់ចោលនៅខាងលិចជើងភ្នំសន្ទុក ហើយរឿងនេះត្រូវបានលាក់ការណ៍សម្ងាត់ មិនឲ្យឮទៅណានោះឡើយ ហើយក្រោយមកនៅពេលថ្មីកន្លងមកនេះឆ្អឹងទាហានយួនដែលស្លាប់ដោយសារស៊ីសាច់ពស់នោះត្រូវបានពួកគេមកធ្វើការស្រាវជ្រាវ និងគាស់យកធាតុទៅស្រុកយួនវិញអស់ទៅដោយលោកមិនដឹងថា រូងភ្នំនៅលើភ្នំសន្ទុកនេះត្រូវគេបិតនៅជំនាន់ពួកយួននៅលើនោះ ឬក៏តាំងពីពេលណានោះឡើយ ៕
ចែករំលែកព័តមាននេះ