អស់ពេលច្រើនឆ្នាំ ប៉ូលិសរាប់រយនាក់រួមជាមួយកងពិសេសSwat , អេហ្វប៊ីអាយ និងបណ្តាអង្គភាពប្រឆាំងឧក្រិដ្ឋកម្មពិសេស ក្លាយជាមុខសញ្ញាត្រូវសើចចំអកដោយសារក្តឹបចោរអនាថាម្នាក់ ។ ក្តឹបចោរនោះត្រូវអ្នកក្រីក្រក្នុងតំបន់ចាត់ទុកជាRobin Hood របស់អាមេរិក រហូតអ្នកខ្លះសរសើរប្រៀបធៀបបញ្ញារបស់គេទៅនឹងAlbert EinsTien ទៀតផង ថ្វីបើខ្លួនក៏រងគ្រោះខ្លះៗដោយសារក្ដឹបចោរនោះក៏ដោយ។
កាម៉ាណូ (Camano) ជាកោះសែនស្អាតមួយរបស់រដ្ឋវ៉ាស៊ីនតោន សហរដ្ឋអាមេរិក ។ ទីនោះមានអ្នកស្រុក អ្នកភូមិដ៏ស្លូតត្រង់ ,មានពួកអាជីវកម្មស្តុកស្តម្ភជាមួយនាវាកម្សាន្ត យន្តហោះទេសចរ ភូមិគ្រឹះស្កឹមស្កៃ…។ ពិសេសកោះកាម៉ាណូ រយៈពេលចុងក្រោយនេះល្បីឈ្មោះពេញពិភពលោកដោយសារកុមារម្នាក់ឈ្មោះកុលតុន ហារិសមួរ (Colton Harris Moore ) ។
កុមារភាពរបស់កុលតុនកម្សត់ណាស់ ។ ឪពុកបោះបង់ចោលម្តាយ និងរូបគេពេលគេទើបមានអាយុ២ឆ្នាំ ។ បន្ទាប់មកអ្នកស្រីប៉ាមេឡា កុសឡឺ ម្តាយរបស់គេយកប្តីថ្មីប៉ះចំបុរសប្រមឹកខួប ។ លុះកុលតុនអាយុបាន៧ឆ្នាំ ឪពុកចុងក៏ស្លាប់ដោយសាររោគថ្លើម ។ ក្រោយពេលប្តីទីពីរស្លាប់ចោលទៀត អ្នកស្រីប៉ាមេឡា កុសឡឺ ក្លាយជាស្ត្រីមានចរិតមួម៉ៅខុសរឿង វាយដំកូនប្រុសទោលរបស់ខ្លួនអត់ត្រាប្រណី ។ ថ្ងៃមួយបន្ទាប់ពីត្រូវរំពាត់ធ្ងន់ កុលតុនសម្រេចចិត្តដើរចោលផ្ទះ ចូលរស់នៅម្នាក់ឯងក្នុងព្រៃ ។ គេប្រើប្រាស់ទូកញ្ចាស់ដែលអ្នកស្រុកបោះបង់ចោល ធ្វើកន្លែងស្នាក់អាស្រ័យ។ អាហារសម្រាប់រស់ប្រចាំថ្ងៃ គឺអាហារលួចពីចង្ក្រានបាយគ្រួសារកម្មករដែលមានផ្ទះនៅ ក្បែរជាយព្រៃ ។
អ្នកស្រុកលើកោះកាម៉ាណូមានទម្លាប់អត់ចាក់សោផ្ទះ ព្រោះពីដើមមកមិនដែលបាត់អីវ៉ាន់ ជាហេតុងាយស្រួលឱ្យកុលតុនរកអាហារចិញ្ចឹមខ្លួនឯង ។ មិនយកច្រើនពីមួយកន្លែងទេ ខ្លាចម្ចាស់ផ្ទះដឹង សុខចិត្តយកនៅផ្ទះនេះបន្តិចផ្ទះនោះបន្តិចផ្សំគ្នាចម្អែតក្រពះបាន ហេតុនេះទើបម្ចាស់ផ្ទះអត់ចាប់អារម្មណ៍បាត់ចំណីអាហារ ។ ខែរងាខ្លាំង កុលតុនលួចចូលដេកអាំងភ្លើងក្នុងផ្ទះអ្នកស្រុករហូតដល់ជិតភ្លឺទើបរត់ចូលព្រៃវិញ ដោយមិនឱ្យអ្នកណាឃើញទាំងអស់ ។ ដំបូងកុលតុនប្រព្រឹត្តកំហុសតូចតាចដូច្នេះដើម្បីរស់ពីមួយថ្ងៃទៅមួយថ្ងៃ តែក្រោយមកអំពើចោរកម្មរបស់គេមានទំហំធំឡើងផ្អើលពេញនគរ។
ពេលអាយុបាន១២ឆ្នាំ កុលតុន ត្រូវចាប់ខ្លួនជាលើកដំបូងពីបទលួចអីវ៉ាន់គេ ហើយត្រូវឃុំខ្លួន១១ថ្ងៃ និងតម្រូវឱ្យធ្វើពលកម្មបម្រើផលប្រយោជន៍សាធារណៈ១ខែ ។ ក្រោយមកកុលតុនត្រូវចាប់ខ្លួនម្តងទៀតពីបទបំផ្លិចបំផ្លាញអាជីវកម្មមួយចំនួនរបស់ពួកអាជីវករគ្រាក់ ៗ ។ លើកនេះកុលតុនត្រូវឃុំខ្លួន១០ថ្ងៃ និងត្រូវធ្វើពលកម្ម៥៦ម៉ោង ។ ស្មានថាលើកទីពីរនេះគេរាងចាលឈប់ធ្វើផ្តេសផ្តាស តែមិនអុីចឹងឯណា រំលងតែប៉ុន្មានខែមានរឿងទៀត ។ លើកទីបី កុលតុនវាយអ្នកឃ្លាំមើលប៉ោងមុខ , ត្រូវបង់ប្រាក់ពិន័យ ១០០ដុល្លារ និងធ្វើពលកម្មរហូតដល់៦ខែ ។
បទល្មើសបន្តបន្ទាប់របស់កុលតុនបន្តពីនោះគឺលួចកង់ លួចប័ណ្ណឥណទាន លួចគ្រឿងអេឡិចត្រូនិក ខណៈគេអាយុបាន១៣ឆ្នាំ ។ ពេលមានដីកាកោះហៅចូលខ្លួន កុលតុនអត់ខ្ចីចូល ។ ប៉ូលិសលើកគ្នាទៅព័ទ្ធព្រៃត្រង់ម្ដុំកុលតុនស្នាក់នៅ តែអត់ឃើញមនុស្សសោះ ឃើញតែគ្រឿងអេឡិចត្រូនិកមានតម្លៃច្រើនពាន់ដុល្លារ ។ ប៉ូលិសមានការភ្ញាក់ផ្អើលយ៉ាងខ្លាំងដែលក្មេងអនាថាម្នាក់ ហេតុម៉េចចាប់អារម្មណ៍ខ្លាំងលើបច្ចេកវិទ្យាជាន់ខ្ពស់បែបនេះ ? គេជាក្មេងឈប់រៀនតាំងពីតូច តែកន្លែងរស់នៅក្នុងព្រៃរបស់គេសុទ្ធតែសៀវភៅនិយាយពីវិទ្យាសាស្រ្ដ និងឧបករណ៍អេឡិចត្រូនិកកំរិតខ្ពស់ដែលដំឡើងដោយខ្លួនឯង ក្រៅពីកុំព្យូទ័រយួរដៃ មានឧបករណ៍បញ្ជាពីចម្ងាយ ឧបករណ៍ចាប់សញ្ញាតាមរលកធាតុអាកាស… ។
ដំណាក់កាលនេះ អំពើចោរកម្មរបស់កុលតុនលែងប៉ះពាល់អ្នកក្រហើយ មុខសញ្ញារបស់គេគឺបណ្ដាគ្រួសារមានទ្រព្យសម្បត្ដិហូរហៀរនៅជាយទីប្រជុំជន ។ ប៉ូលិសឃើញដានជើងប្រឡាក់ដីរបស់កុលតុនដិតក្រវាមៗលើគ្រែដេកធុនប្រណីតរបស់ប្ដីប្រពន្ធអ្នកមានស្ដុកស្ដម្ភមួួយគូ ។ ក្នុងផ្ទះអ្នកមាននោះ កុលតុនយកតែស្រាធុនថ្លៃមួយដប និងទស្សនាវដ្ដីសម្បូររូបស្រីៗអែនអនមួយចំនួនប៉ុណ្ណោះ ។ ដូច្នេះប៉ូលិសថា កុលតុនលែងជាក្ដឹបចោរលួចបាយស៊ីមួយពេលៗទៀតហើយ ។ គេនៅក្មេងមែន តែឈានដល់ឋានៈចោរ «សួរសុខទុក្ខ» ពួកអ្នកមានវិញ ។
អ្នកមានទ្រព្យសម្បត្ដិរាប់សិបគ្រួសារក្នុងទីប្រជុំជនត្រូវកុលតុន «សួរសុខទុក្ខ» គ្រប់គ្នា តែប៉ូលិសពុំអាចជួយអ្វីបាន ។ មានម្ដងនោះកុលតុនចូលផ្ទះអាជីវករគ្រាក់ម្នាក់ពេលម្ចាស់ផ្ទះទៅកម្សាន្ដខាងក្រៅ ។ គេយកស្រាថ្លៃរបស់ម្ចាស់ផ្ទះអង្គុយផឹកលើសាឡុង ហើយបើកភ្លេងខ្លាំងៗ ស្ដាប់ម្នាក់ឯងយ៉ាងសប្បាយ ។ អ្នកជិតខាងកើតការសង្ស័យ ទូរស័ព្ទប្រាប់ម្ចាស់ផ្ទះ និងប្ដឹងប៉ូលិស តែពេលប៉ូលិសទៅដល់បានត្រឹមតែឃើញម្ហូបអាហារពេញលើតុ និងកែវស្រាមិនទាន់ផឹកអស់ រួមជាមួយដានជើងប្រឡាក់ដីពេញផ្ទះ ចំណែកទ្វារក្រោយបើកចំហ ខណៈកុលតុនចូលព្រៃបាត់ស្រមោល ។
ឮរាល់លើកចូលផ្ទះអ្នកណាក៏ដោយ កុលតុនតែងទុកដានជើងប្រឡាក់ដីស្រមក ជាហេតុធ្វើឱ្យគេសន្និដ្ឋានថា ក្មេងច្រមក់នេះចូលចិត្ដដើរជើងទទេ ។ ប្រហែលការដើរជើងទទេជួយឱ្យមានភាពងាយស្រួលចល័តក្នុងបរិដ្ឋានដីសើមកណ្ដាលព្រៃដែលគេលាក់ខ្លួន ។ តាំងពីពេលនោះមក ប៉ូលិសផ្ដល់រហស្សនាមកុលតុនថា «កំពូលក្ដឹបចោរដើរជើងទទេ» ។
ក្រោយតាមដានជាសម្ងាត់មួយរយៈ ប៉ូលិសរកឃើញថា អ្នកស្រុកក្នុងតំបន់ឱ្យកុលតុនប្រើភ្លើងអគ្គិសនី ដើម្បីសាកថ្មកុំព្យូទ័រ និងប្រើអីុនធើរណេត ។ លុះស្រាវជ្រាវតាមអាស័យដ្ឋាន IP ក្រុុមប៉ូលិសស៊ើបអង្កេតបើកភ្នែកក្រឡង់ពេលដឹងថា កុលតុនកំពុងរាវរកអុីនធើរណេតណែនាំបច្ចេកទេសបើកយន្ដហោះ ហើយរូបគេក៏បានទិញសៀវភៅបង្រៀនរបៀបបើកយន្ដហោះដែរ។ ក្មេងអនាថាម្នាក់ អត់បានរៀនសូត្រច្រើន តែពេលនេះយល់គ្រឿងអេឡិចត្រូនិកប្រហែលវិស្វករអេឡិចត្រូនិកកំពូលម្នាក់ តើអ្នកណាមិនភ្ញាក់ផ្អើល? ប៉ូលិសចាប់ផ្ដើមវាយតម្លៃជាថ្មីថា ក្មេងប្រព្រឹត្ដបទល្មើសរូបនេះមិនធម្មតាសោះតែម្ដង គេមានឧបនិស្ស័យពីធម្មជាតិខ្ពស់មែនទែនជាមួយវិទ្យាសាស្រ្ដ ទើបហ៊ានស្វែងយល់បច្ចេកទេសបើកយន្ដហោះ ដូច្នេះមិនយូរទេគេនឹងឈានដល់កម្រិតដែលគេចង់បានយ៉ាងពិតប្រាកដ ។
ប៉ុន្មានឆ្នាំក្រោយកុលតុនមានមិត្ដស្រីឈ្មោះ Makayla ជាជនជាតិកាណាដា អាយុច្រើនជាងគេ២ឆ្នាំ ។ ពួកគេទាំងពីរនាក់ស្គាល់គ្នាតាមរយៈអីុនធើរណេត ។ កុលតុនរៀបរាប់ប្រាប់មិត្ដស្រីពីទេសភាពត្រកាលរបស់កោះកាម៉ាណូ ដែលគេកំពុងរស់នៅ ពីតំបន់ព្រៃសេរីភាពរបស់គេ ពីពួកប៉ូលិសដែលត្រូវគេធ្វើឱ្យវិលក្បុង ។ Makayla ស្តាប់ការរៀបរាប់យ៉ាងជក់ចិត្ត ។ នាងរំភើបដល់ក ក្នុងចិត្តស្រេកឃ្លានចង់នៅក្បែរប្រុសស្នេហ៍មុខស្រស់មានបញ្ញាដាច់គេរូបនេះ នៅកណ្តាលទេសភាពត្រកាលកោះកាម៉ាណូ តែបំណងនាងប្រហែលពិបាកសម្រេចបានព្រោះកន្លែងរស់នៅរបស់នាងនៅឃ្លាតពីកោះកាម៉ាណូរាប់ពាន់គីឡូម៉ែត្រ ណាមួយចង់ទៅកោះនោះទាល់តែជិះយន្តហោះ ឬនាវាល្បឿនលឿន ។ កុលតុន យល់ច្បាស់ពីភាពអន្ទះសារបស់មិត្តស្រីគេប្តេជ្ញាចិត្តរកឱ្យបានយន្តហោះមួយគ្រឿងផ្គាប់ចិត្តនាង ។
ក្រោយខិតខំរៀនម្នាក់ឯងពីរបៀបបើកយន្តហោះតាមសៀវភៅផង អុីនធើេរណេតផង កុល តុន លួចយន្តហោះមួយគ្រឿងដើម្បីបើកសាកល្បង ។ មុខសញ្ញាគឺយន្តហោះទេសចរណ៍ម៉ាក Cessna 182 របស់អាជីវករគ្រាក់ម្នាក់ ។ ប៉ុន្តែពេលលួចបានសម្រេចដូចបំណងហើយ កុល តុន ភ្លេចត្រួតពិនិត្យប្រេងឥន្ធនៈក្នុងម៉ាស៊ីនដែលនៅសល់តែបន្តិច ។ ហោះហើរបានតែប៉ុន្មាននាទីយន្តហោះអស់សាំង កុល តុន ត្រូវបញ្ជាយន្តហោះចុះដីវិញយ៉ាងប្រថុចញ៉ុចបំផុត ហើយលោតចេញក្រៅពេញកម្លាំង ។ ភ្លាមនោះយន្តហោះក្លាយជាគំនរដែកអេតចាយ ចំណែកអ្នកបើកគ្រាន់តែរលាត់ដៃជើងតិចតួចប៉ុណ្ណោះ ។ នេះបានជាចិត្តថ្លើមធំពាសមេឃមែន ។
ក្រោយបរាជ័យលើកទីមួយ កុល តុន តាមដានយន្តហោះមួយគ្រឿងទៀត ។ លើកនេះទៅចាប់អារម្មណ៍ពិនិត្យប្រេងឥន្ធនៈមុនបង្អស់ ។ គេបើកយន្តហោះឆ្លងព្រំដែនប្រទេសកាណាដាទៅដឹកនាង Makayla នាំទៅកម្សាន្តនៅតំបន់ឆ្ងាយៗពីរបីថ្ងៃ រួចបើកយន្តហោះទៅសងម្ចាស់ដើមវិញ ដោយចតស្ងៀមស្ងាត់ឆ្ងាយពីផ្ទះម្ចាស់ដើមត្រឹម១០០ម៉ែត្រប៉ុណ្ណោះ ។
តាំងពីពេលនោះ មិនថាយន្តហោះទេសចរណ៍ ឬនាវាកម្សាន្ត ឬក៏រថយន្តទំនើបទេ កុលតុន ត្រូវការមួយណាបានមួយនោះ រួចហើយយកទៅចតចោលនៅកន្លែងផ្សេង ធ្វើឱ្យម្ចាស់ដើមតាមរកវិលក្បុង ។ កុលតុនត្រូវការកម្សាន្តជាមួយមិត្តស្រ្តីតាមបែបពួកអ្នកមានគ្រាក់ៗ ។ សកម្មភាពរបស់គេធ្វើឱ្យពួកអ្នកមាន និងក្រុមហ៊ុនទេសចរណ៍ផ្សេងៗជ្រួលច្របល់ពេញកោះកាម៉ាណូ តែប៉ូលិសពុំអាចជួយអ្វីបាន ព្រោះទោះពួកអ្នកយាមមានជំនាញប៉ុនណា ក៏គ្មានអ្នកណាឃើញកុលតុនលួចពីអង្កាល់ និងចេញដំណើរតាមណា ហើយយកមកសងវិញពីអង្កាល់ ។
បន្ទាប់ពីត្រូវ កុល តុន អុកឡុកបង្កភាពជ្រួលច្របល់ខ្លាំងឡើងៗ ផែនការព័ទ្ធចាប់មួយត្រូវសមត្ថកិច្ចគូសវាសយ៉ាងល្អិតល្អន់ ដើម្បីកុំឱ្យក្មេងអនាធិបតេយ្យរូបនេះធ្វើព្យុះធ្វើភ្លៀងបានទៀត ។ ផែនការនោះប្រើប៉ូលិសរាប់រយនាក់ និងមានការជួយកម្លាំងពីកងពិសេស Swat បុគ្គលិកអេហ្វប៊ីអាយ បុគ្គលិកអង្គភាពប្រឆាំងឧក្រិដ្ឋកម្មពិសេស ឆ្កែស្រង់ក្លិន និងក្រុមឯកទេសចិត្តសាស្ត្រផង ។ ពួកគេធ្វើដំណើរសំដៅគោលដៅតាមយុទ្ធវិធីដែលបានគូសវាសម៉ត់ចត់ច្រើនថ្ងៃមកហើយ ។ ដឹងអីពេលចូលកៀកចំណុចសង្ស័យ កុល តុន រស់នៅ ម្នាក់ៗបានត្រឹមតែឃើញស្រមោលមនុស្សម្នាក់រត់កាត់ពីមុខលឿនដូចព្រួញ រួចបាត់ឈឹងដូចព្រលឹងខ្មោច សូម្បីក្រុមឆ្កែស្រង់ក្លិនក៏ឈរមិងមាំង ព្រោះស្រង់ក្លិនអត់បាន ។ ទីបំផុត អេហ្វប៊ីអាយ បង្ខំចិត្តប្រកាសផ្តល់រង្វាន់១០.០០០ដុល្លារដល់អ្នកណាអាចផ្តល់ព័ត៌មានពិតប្រាកដពីកន្លែងលាក់ខ្លួនរបស់ កុល តុន ។
ក្រោយបរាជ័យលើកនោះ ប៉ូលិសបាក់មុខសឹងថាម្នាក់ៗអត់ហ៊ានចេញពីផ្ទះឱ្យគេឃើញ ព្រោះត្រូវសើចចំអកពេញនគរ ។ ចំណែក កុលតុន បានមជ្ឈដ្ឋានអ្នកក្រនៅលើកោះលើកតម្កើងប្រៀបដូច Rolin Hood របស់អាមេរិក ។ ពួកគេបង្កើតក្លឹបអ្នកពេញចិត្ត កុល តុន ដែលមានសមាជិក៤.៥០០នាក់ ហើយបោះពុម្ភរូប កុល តុន លើអាវយកទៅលក់គ្រប់ទីកន្លែង ។ ពេលនោះ កុលតុន ទើបតែមានអាយុ១៦ឆ្នាំប៉ុណ្ណោះ។
ទោះបីការតាមចាប់របស់សមត្ថកិច្ចគគ្រឹកគគ្រេងយ៉ាងនេះក្តី កុលតុននៅតែអាចគេចខ្លួនបានយ៉ាងស្រួលគ្មានបន្សល់ស្លាកស្នាមអ្វីទាំងអស់ ។ ចុងក្រោយប៉ូលិសនឹកឃើញដល់នាង MaKayla មិត្តស្រីរបស់កុលតុនក៏ទៅរកនាងដើម្បីសួរនាំក្រែងរកឃើញតម្រុយថ្មី តែ Makayla អះអាងថា នាង និងកុលតុនអាក់អន់ចិត្តគ្នា ឈប់ទាក់ទងគ្នាយូរហើយ ដូច្នេះមិនអាចផ្តល់ព័ត៌មានអ្វីបានឡើយ ។ តាំងពីពេលនោះ មកដោយហេតុកុលតុន លែងឃើញធ្វើសកម្មភាពទៀត រឿងរ៉ាវកុលតុន ក៏ស្ងប់បន្តិចម្តងៗតាមពេលវេលា ហាក់ដូចមិនយូរប៉ុន្មានទៀតនឹងត្រូវគេបំភ្លេចចោល ។
ប៉ុន្តែជាការស្មានមិនដល់សោះ ថ្ងៃទី១១ កក្កដា ឆ្នាំ២០១០ ស្រាប់តែកុលតុន បង្ហាញមុខយ៉ាងព្រហើន ហើយត្រូវចាប់បាននៅប្រទេសដែនកោះដ៏តូចបាហាម៉ា (Bahamas) សមុទ្រអាត្លង់ទិក ទីដែលគេចាត់ទុកជាឋានសួគ៌ទេសចរណ៍ដ៏ប្រណីត ។ ប្រទេសដែនកោះបាហាម៉ាឃ្លាតឆ្ងាយពីកោះកាម៉ាណូរហូតដល់៥.០០០គីឡូម៉ែត្រ ជាហេតុធ្វើឱ្យកុលតុនយល់ថា គ្មានអ្នកណាស្គាល់ខ្លួនឡើយ ។ មូលហេតុត្រូវប៉ូលិសចាប់បានមកពីកុលតុនលួចអូប៊័រមួយគ្រឿងបើកឆាបទៅមកសើចលេងដាក់ពួកស្រីស្អាតតាមមាត់សមុទ្រ ។ ពេលម្ចាស់អូប៊័រឆោឡោឡើង ប៉ូលិសបើកអូប៊័រដេញចាប់ចោរលើផ្ទៃសមុទ្ររូបនេះ ។ ការប្រដេញប្រើពេលជាងមួយម៉ោងទម្រាំចាប់បាន បន្ទាប់ពីប៉ូលិសសម្រេចចិត្តបាញ់ចំម៉ាស៊ីនអូប៊័រដែលកុលតុនបើក បើមិនសម្រេចចិត្តបែបនេះ ម៉្លេះគ្មានអ្នកណាអាចចាប់កុលតុនបានឡើយ។
ដំបូងប៉ូលិសអត់ដឹងកុលតុនជាអ្នកណាទេ ម្នាក់ៗបានត្រឹមតែឆ្ងល់ថា អាចោរម្នាក់នេះមកពីណាពូកែបើកអូប៊័រម៉្លេះ ។ ទាល់តែនាំខ្លួនមកដល់ដីគោកទើបម្នាក់ៗបើកភ្នែកធំៗ…កណ្តុំឆែប កំពូលចោរធ្វើឱ្យប៉ូលិសអាមេរិកវិលក្បុងជាង១០ឆ្នាំនោះតើ ។ ជននេះ ពេលប៉ូលិសបើកប្រតិបត្តិការដោយប្រើកម្លាំងរាប់រយនាក់ នៅតែអត់ចាប់បាន ឥឡូវអស់លក្ខណ៍ត្រូវចាប់បានក្នុងហេតុការណ៍ក្រឡុញឆឹកទៅវិញ ។
ដំណឹងចាប់បានកំពូលចោរកុលតុន ផ្សព្វផ្សាយចេញក្រៅយ៉ាងឆាប់រហ័ស ។ សហរដ្ឋអាមេរិកគ្រាន់តែដឹងដំណឹងភ្លាមសុំធ្វើបត្យាប័ននាំខ្លួនកុលតុនទៅអាមេរិកវិញភ្លាម ។ កំពូលចោររូបនេះ ត្រូវចោទប្រកាន់ពីបទប្រព្រឹត្តចោរកម្មរាប់រយករណី ក្នុងនោះ៣ករណីលួចយន្តហោះ រាប់ករណីលួចរថយន្តទំនើប រាប់សិបករណីលួចនាវាកម្សាន្ត មួយករណីលួចកាំភ្លើង…។ ក្រោយក្រឡុកមជ្ឈដ្ឋានអ្នកមានទ្រព្យឱ្យវិលក្បុងច្រើនឆ្នាំ កុលតុនពេលត្រូវចាប់ខ្លួនមានអាយុ១៩ឆ្នាំ ។
មជ្ឈដ្ឋានពួកអ្នកមានទ្រព្យធនចង់ឱ្យតុលាការកាត់ទោសដាក់គុកកុលតុនអស់មួយជីវិត ។ ប៉ុន្តែមជ្ឈដ្ឋានអ្នកក្រចង់ឱ្យតុលាការដោះលែងកុលតុនវិញ ។ កុលតុនក្លាយជាមូលហេតុនៃការជជែកវែកញែកពេញរដ្ឋវ៉ាស៊ីនតោន ។ ម្តាយកុលតុនប្រាប់អ្នកកាសែតថា កុលតុនមានគម្រោងរកប្រាក់ឱ្យបានច្រើនដើម្បីបើកមជ្ឈមណ្ឌលសង្គ្រោះសត្វព្រៃ ។ គាត់និយាយទៀតថា កុលតុនពេលខ្លះប្រាប់គាត់ថា គេធ្លាប់ត្រួតពិនិត្យ IQ ខ្លួនឯង ឃើញចាញ់ Albert Einstein តែ៣ពិន្ទុប៉ុណ្ណោះ ។
ហេតុម៉េចកំពូលចោរម្នាក់មានមនុស្សជាច្រើនពេញចិត្តយ៉ាងនេះ ។ លោកមេបញ្ជាការប៉ូលិស Mark C Brown យល់ឃើញថាពួកអ្នកមានទ្រព្យសម្បត្តិពីតំបន់នានាទៅកោះកាម៉ាណូ បោះទុនវិនិយោគសាងសង់រោងចក្រយ៉ាងច្រើន អ្នកខ្លះទៀតស្ថាបនាតំបន់ទេសចរណ៍ ជាហេតុបំផ្លាញបរិស្ថានរស់នៅតាមបែបប្រពៃណី បង្កភាពកខ្វក់ធ្ងន់ បណ្តាលឱ្យប្រជាជនខឹងខ្លាំង ។ លើភាពជាក់ស្តែង កុលតុនប្រព្រឹត្តកំហុសមែន តែប្រព្រឹត្តចំពោះមជ្ឈដ្ឋានដែលអ្នកស្រុកមិនពេញចិត្ត ។ សកម្មភាពរបស់គេជួយឱ្យអ្នកស្រុកធូរទ្រូង ដូច្នេះហើយទើបម្នាក់ៗស្រឡាញ់កុលតុន ចាត់ទុកកុលតុនជាវីរបុរសទៀតផង ៕ តាមឯកសារបរទេស
ចែករំលែកព័តមាននេះ