រាជធានីភ្នំពេញ ៖ បុរសជាកម្មករសំណង់២នាក់ត្រូវជាមេជាង និងកូនជាងចេញពីធ្វើការជិះម៉ូតូត្រលប់ទៅផ្ទះជួលវិញជិតដល់ដល់ផ្លូវចូលផ្ទះបានទាក់ដៃចង្កូតគ្នាជាមួយរថយន្តធន់ធំមួយគ្រឿងដែលធ្វើដំណើរស្របទិសគ្នាបណ្តាលអោយដួលចូលក្រោមកង់រថយន្តកិនអូសទាំងម៉ូតូ និងមនុស្សជាង១០ម៉ែត្របណ្តាលអោយអ្នកបើកម៉ូតូដែលជាមេជាងស្លាប់ភ្លាមៗនៅកន្លែងកើតហេតុ ចំណែកកូនជាងអង្គុយពីក្រោយដួលចូលក្រោមរថយន្តសំណាងល្អរងរបួសស្រាល ។
ហេតុការណ៍នេះដែរបានកើតឡើងកាលពីវេលាម៉ោង៧និង៣០នាទីយប់ ថ្ងៃទី២៣ ខែសីហា ឆ្នាំ២០១៨ នៅតាមបណ្តោយមហាវិថីព្រះមុនី្នរ៉េត(ផ្លូវ២១៧) ភូមិឫស្សី២ សង្កាត់ស្ទឹងមានជ័យ៣ ខណ្ឌមានជ័យ ។
សពជនរងគ្រោះមានឈ្មោះ ប៉ុន នី ភេទប្រុស អាយុ៣០ឆ្នាំ មុខរបរមេជាងសំណង់ ស្នាក់នៅផ្ទះជួលភូមិឬស្សី សង្កាត់ស្ទឹងមានជ័យ ខណ្ឌមានជ័យ មានស្រុកកំណើតនៅភូមិព្រែកហ្លួង ស្រុកខ្សាច់កណ្តាល ខេត្តកណ្តាល និងម្ចាស់ម៉ូតូម៉ាកហុងដាឌ្រីម ពណ៌ខ្មៅ ពាក់ផ្លាកលេខភ្នំពេញ 1AU-7684 មានប្រពន្ធឈ្មោះ សាត ស៊ីណា អាយុ២៧ឆ្នាំ មុខរបរកម្មការិនីរោងចក្រ ។
ចំណែកអ្នករួមដំណើរម្នាក់ទៀតរងរបួសស្រាលមានឈ្មោះ ចន វី ភេទប្រុស មុខរបរជាងសំណង់ ជាកូនជាងរបស់សពរងគ្រោះស្នាក់នៅផ្ទះជួលជិតគ្នាមានស្រុកកំណើតនៅស្រុករំដួល ខេត្តស្វាយរៀង ។ ដោយឡែកអ្នកបើករថយន្តបង្កមានឈ្មោះ ឯក រ៉ាត់ ភេទប្រុស អាយុ៤០ឆ្នាំ មុខរបរបើកបររថយន្តអោយក្រុមហ៊ុនដឹកជញ្ជូន L.M.H មានស្រុកកំណើតភូមិផុង ឃុំផុង ស្រុកបសេដ្ឋ ខេត្តកំពង់ស្ពី ។
បើតាមប្រភពព័ត៌មានពីកូនជាងសំណង់បានរៀបរាប់ប្រាប់ថា មុនកើតហេតុរូបគាត់ និងសពរងគ្រោះទើបនឹងចេញពីធ្វើសំណង់នៅម្តុំជិតវិមានឯករាជ្យ លុះដល់ម៉ោងកើតហេតុនាំគ្នាត្រលប់មកបន្ទប់ជួលវិញនៅភូមិឬស្សីដោយធ្វើដំណើរតាមផ្លូវ២១៧ទិសដៅពីជើងទៅត្បូងដោយសារស្ថានភាពផ្លូវរៀងស្ទះបន្ទិចផងនោះមេជាងបានបើកម៉ូតូជ្រៀតរកផ្លូវទៅមុខស្របទិសគ្នាជាមួយរថយន្តបង្កមកដល់ចំណុចស្តុបមុខហាងផ្ទះស្រាបៀរជាកន្លែងកើតហេតុក៏បត់ឆ្វេងឆ្លងបញ្ច្រាសទិសដៅចរាចរណ៍បត់ទៅផ្លូវចូលបន្ទប់ជួលក៏ទាក់ដៃចង្កូតជាមួយរថយន្តខាងលើ បណ្តាលអោយម៉ូតូដួលចូលក្រោមរថយន្តកិនជាប់មេជាង និងម៉ូតូអូសជាង១០ម៉ែត្របណ្តាលអោយបែកសាច់ដៃខាងស្តាំខ្ទេចដាច់ខ្យល់ស្លាប់ភ្លាមៗនៅនឹងកន្លែងកើតហេតុ ។
ចំណែករូបគាត់ដែលជាកូនជាងបានបន្តថា គាត់មិនដឹងថា ខ្លួនគាត់ដួលខ្ទាតយ៉ាងម៉េចទេ បានជាចូលក្រោមរថយន្តផុតកង់រថយន្តទាំង២ទើបមិនមានរងរបួសអ្វីធ្ងន់ធ្ងរទេ ។ ភ្លាមៗនោះអ្នកបើកបររថយន្តបម្រុងរត់គេចខ្លួនតែត្រូវសមត្ថកិច្ច និងប្រជាពលរដ្ឋឃាត់ខ្លួនបាន ។
ចំណែកអ្នកបើកបររថយន្តវិញបាននិយាយប្រាប់ទាំងទឹកមុខក្រៀមក្រំថា គាត់ជាអ្នកបើករថយន្តធន់ធំដឹកឥវ៉ាន់មែនតែគាត់មិនដែលមានគំនិតចង់បង្កគ្រោះថ្នាក់ដល់នរណាម្នាក់ដែលធ្វើដំណើរនៅតាមផ្លូវជាមួយគ្នានោះទេ ហើយក្នុងហេតុការណ៍នេះដែលគឺមុនកើតហេតុរថយន្តគាត់បើកស្របគ្នាជាមួយម៉ូតូរងគ្រោះរហូតពេលជិតមកដល់កន្លែងកើតហេតុម៉ូតូនោះបើកកៀបនឹងក្បាលរថយន្តទើបធ្វើអោយគាត់ពិបាកមើលម៉ូតូនោះណាស់ ។
លុះមកដល់កន្លែងកើតហេតុស្រាប់តែម៉ូតូបត់ឆ្វេងឆ្លងផ្លូវមិនផុតក៏ត្រូវរថយន្តគាត់បុក និងកិនជាប់អូសជាង១០ម៉ែត្រទើបគាត់ជាន់ហ្វ្រាំងជាប់ និងចុះពីលើរថយន្តទៅមើលឃើញសភាពម្ចាស់ម៉ូតូរងគ្រោះដេកស្លាប់ក្នុងថ្លុកឈាមទៅហើយ គាត់បានព្យាយាមរត់គេចខ្លួនពីកន្លែងកើតហេតុដែរតែត្រូវសមត្ថកិច្ចមូលដ្ឋានដែលសម្រួលចរាចរណ៏នៅចំណុចនោះ និងប្រជាពលរដ្ឋនៅកន្លែងកើតហេតុដេញចាប់នឹងឃាត់ខ្លួនបានភ្លាមៗតែម្តងយកទៅសួរនាំនៅប៉ុស្តិ៍នគរបាលស្ទឹងមានជ័យ៣ ទុកប្រគល់អោយសមត្ថកិច្ចជំនាញចរាចរណ៏ចាត់ការបន្ត ៕
ចែករំលែកព័តមាននេះ