ខេត្តកំពង់ស្ពឺ ៖ សម្រាប់ការប្រឡងសញ្ញាបត្រមធ្យមសិក្សាទុតិយភូមិនាថ្ងៃទី២០ សីហា នៅខេត្តកំពង់ស្ពឺ មានមណ្ឌលប្រឡងចំនួន១០ អ្វីដែលធ្វើឱ្យមានការកត់សម្គាល់នោះ គឺនៅមណ្ឌលបឋមសិក្សាវល្លិ៍ស បន្ទប់លេខ១៣ ដែលជាមណ្ឌលមួយស្ថិតក្នុងខេត្តកំពង់ស្ពឺ មានតែបេក្ខជនម្នាក់គត់ ចូលរួមប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) ឆ្នាំនេះ ខណៈដែលលោកទេសរដ្ឋមន្ត្រី ឱម យិុនទៀង ប្រធានអង្គភាពប្រឆាំងអំពើពុករលួយ ចុះពិនិត្យផ្ទាល់តែម្តង ។
ប្រធានមន្ទីអប់រំយុវជន និងកីឡាខេត្ត លោក ថន ថារិន បានឱ្យដឹងនៅព្រឹកថ្ងៃ២០ សីហា ថាបេក្ខជនរូបនេះឈ្មោះ សេម វិចិត្រ អាយុ១៩ឆ្នាំ រស់នៅភូមិក្រាំងខ្នងឃុំស្តុកស្រុកគងពិសី ។
គេរៀននៅវិទ្យាល័យទ័ពមានជ័យ មានមិត្តភក្តិរួមថ្នាក់ធម្មតាហើយពេលប្រឡងសញ្ញាបត្រមធ្យមសិក្សាបឋមភូមិ (ឌីប្លូម) ក៏ប្រឡងធម្មតា បន្ទប់១ មានបេក្ខជន២៥នាក់ដូចគេឯងដែរ តែដោយឡែក សម្រាប់ការប្រឡងសញ្ញាបត្រ មធ្យម សិក្សា ទុតិយភូមិនេះ រូបគេត្រូវបានដាក់ឱ្យប្រឡងតែម្នាក់ឯង ។
បញ្ហានេះ រូបគេមិនតូចចិត្តនោះទេ ថ្វីត្បិតរូបគេជាមនុស្សពិការ (ជើងឆ្វេង) ហើយមានជំងឺសើស្បែកជាជំងឺឆ្លងទៀតផង ។ ដោយឡែក លោកប្រធានមន្ទីរអប់រំបានប្រាប់ថា បានជាតម្រូវដាក់ឱ្យបេក្ខជនរូបនេះប្រឡងបន្ទប់១ម្នាក់ឯង ដោយសារតែគេជ្រើសរើសយកភាសាបារាំង ។
ការលើកឡើងរបស់លោកប្រធានមន្ទីរ ត្រូវបានបេក្ខជនរូបនេះច្រានចោលហើយប្រាប់ថា ការប្រឡងនេះគេជ្រើសរើសយកភាសាអង់គ្លេស ដូចបេក្ខជនផ្សេងទៀតដែរ ទោះបីជាបែបណា រូបគេសង្ឃឹម៧០ភាគរយ គឺជាប់ ។
ចែករំលែកព័តមាននេះ