រាជធានីភ្នំពេញ ៖ មន្ត្រីជាន់ខ្ពស់រាជរដ្ឋាភិបាលកម្ពុជាបានថ្លែងថា រយៈពេល៧ខែឆ្នាំនេះ វិនិយោគិនចិន បានវិនិយោគនៅកម្ពុជាមានទឹកប្រាក់រហូតដល់៥ពាន់លានដុល្លារ ដែលជាចំនួនដ៏ច្រើន បើធៀបនឹងវិនិយោគិនអន្តរជាតិដទៃទៀត ។
លោកឧបនាយករដ្ឋមន្ត្រី ហោ ណាំហុង បានមានប្រសាសន៍កាលពីព្រឹកថ្ងៃទី១៨ សីហានៅក្នុងពិធីបើកការដ្ឋានសាងសង់មជ្ឈមណ្ឌលពាណិជ្ជកម្ម Morgan Tower ថា គិតចាប់ពីខែមករា ដល់ខែកក្កដាកន្លងមកនេះ អ្នកវិនិយោគចិនបានបោះទុនវិនិយោគនៅកម្ពុជាក្នុងទំហំទឹកប្រាក់៥ពាន់លានដុល្លារ ហើយបើគិតពីឆ្នាំ២០១៣ ដល់ឆ្នាំ២០១៨ អ្នកវិនិយោគចិនបានបោះទុនវិនិយោគរហូតដល់២១ពាន់លានដុល្លារ ហើយចិនបានកសាងផ្លូវជាតិចំនួន៣ពាន់គីឡូម៉ែត្រ និងស្ពានចំនួន៧នៅកម្ពុជា ។ គម្រោងវិនិយោគរបស់ចិននៅកម្ពុជាភាគច្រើនគឺផ្តោតលើវិស័យចម្បងៗដូចជា វិស័យវាយនភ័ណ្ឌ សំណង់ វារីអគ្គិសនី គមនាគមន៍ និងវិស័យទេសចរណ៍ ។
លោកឧបនាយករដ្ឋមន្ត្រី បានបន្ដថា រាជរដ្ឋាភិបាលកម្ពុជា សូមអរគុណដល់រដ្ឋាភិបាល និងប្រជាជនចិន ដែលបានឧបត្ថម្ភលើគ្រប់វិស័យ ទាំងវិស័យនយោបាយ សេដ្ឋកិច្ច និងសង្គម ។ លោកសង្កត់ធ្ងន់ថា ៖« ការអភិវឌ្ឍដ៏អស្ចារ្យរបស់កម្ពុជាលើគ្រប់វិស័យដែលស្តែងឲ្យឃើញសព្វថ្ងៃនេះ មិនអាចកាត់ផ្តាច់នូវការរួមចំណែកពីជំនួយ ការគាំទ្រ និងការវិនិយោគរបស់អ្នកវិនិយោគចិននោះទេ »។
អ្នកស្រាវជ្រាវសេដ្ឋកិច្ចនៃរាជបណ្ឌិត្យសភាកម្ពុជា លោកបណ្ឌិត ហុង វណ្ណៈ បានមានប្រសាសន៍ថា ការវិនិយោគរបស់ចិននៅកម្ពុជា មិនមែនកើតឡើងដោយចៃដន្យនោះទេ ។ លោកថ្លែងថា ៖« វាបានកើតឡើងដោយសារហេតុផលមួយចំនួនដូចជា ទី១ គោលនយោបាយផ្លូវសូត្រ ឬ ខ្សែក្រវាត់មួយ ផ្លូវមួយ របស់ចិន ដែលឆ្ពោះមកកាន់តំបន់អាស៊ី ហើយកម្ពុជាយើងជាប្រទេសដែលបានទទួលផលច្រើនជាងគេ ដោយសារទំនាក់ទំនងដ៏ល្អជាប្រវត្តិសាស្ត្រ និងរវាងប្រមុខរដ្ឋាភិបាលនៃប្រទេសទាំងពីរ និងទី២ ដោយសារកត្តាផ្ទៃក្នុងកម្ពុជា ដែលសម្រេចបាននូវសន្តិភាព ស្ថិរភាពនយោបាយ និងកំណើនសេដ្ឋកិច្ចរឹងមាំ »។
អ្នកឧកញ៉ា ពុង ឃាវសែ ប្រធានក្រុមហ៊ុន OCIC ដែលគ្រប់គ្រងទីក្រុងកោះពេជ្របានថ្លែងថា មិនយូរប៉ុន្មានទៀតទេ កម្ពុជានឹងមានអគារខ្ពស់ៗរាប់រយម៉ែត្រ ដែលនេះព្រោះតែកម្ពុជាមានស្ថិរភាពនយោបាយល្អប្រសើរ ក្រោមការដឹកនាំរបស់ប្រមុខរដ្ឋាភិបាល សម្តេចតេជោហ៊ុន សែននាយករដ្ឋមន្ត្រីនៃពកម្ពុជា ។
ប្រទេសចិនជាដៃគូយុទ្ធសាស្ត្រគ្រប់ជ្រុងជ្រោយដែលមិនអាចខ្វះបានក្នុងការរួមចំណែកអភិវឌ្ឍន៍ប្រទេសកម្ពុជា ។ បច្ចុប្បន្នមិនត្រឹមតែទំហំទឹកប្រាក់វិនិយោគ និងទំហំពាណិជ្ជកម្មប៉ុណ្ណោះទេដែលឈានមុខគេ ក្នុងនោះទេសចរចិនមកទស្សនានៅកម្ពុជាក៏ស្ថិតក្នុងចំណាត់ថ្នាក់លេខ១ផងដែរ ។
យោងតាមរបាយការណ៍ក្រសួងទេសចរណ៍ រយៈពេល៥ខែដើមឆ្នាំ២០១៨នេះ ភ្ញៀវទេសចរចិនមកទស្សនានៅកម្ពុជាមានចំនួន៧៨៨.៣៧៨នាក់ ស្មើនឹង៣០,៥%នៃចំនួនភ្ញៀវទេសចរអន្តរជាតិសរុប កើនឡើង៧៨,៧% ៕
ចែករំលែកព័តមាននេះ