ខេត្តស្វាយរៀង ៖ បុរសម្នាក់ត្រូវគេសង្ស័យបែកថ្នាំ បានដើរកាន់ដាវសាម៉ូរ៉ៃ និងកាំភ្លើងខ្លី (ដែលតាមពិតកាំភ្លើងជ័រសោះ) បង្កឱ្យមានការភ័យខ្លាចដល់ប្រជាពលរដ្ឋ ត្រូវបានសមត្ថកិច្ចនគរបាលប៉ុស្តិ៍រដ្ឋបាលឃុំថ្នាធ្នង់ចាប់ឃាត់ខ្លួនកាលពីថ្ងៃទី១៨ ខែសីហា ឆ្នាំ២០១៨…
ខេត្តស្វាយរៀង ៖ បុរសម្នាក់ត្រូវគេសង្ស័យបែកថ្នាំ បានដើរកាន់ដាវសាម៉ូរ៉ៃ និងកាំភ្លើងខ្លី (ដែលតាមពិតកាំភ្លើងជ័រសោះ) បង្កឱ្យមានការភ័យខ្លាចដល់ប្រជាពលរដ្ឋ ត្រូវបានសមត្ថកិច្ចនគរបាលប៉ុស្តិ៍រដ្ឋបាលឃុំថ្នាធ្នង់ចាប់ឃាត់ខ្លួនកាលពីថ្ងៃទី១៨ ខែសីហា ឆ្នាំ២០១៨ នៅភូមិធ្នង់ ឃុំថ្នាធ្នង់ ស្រុករំដួល។
តាមសមត្ថកិច្ចបានឱ្យដឹងថា បុរសត្រូវចាប់ខ្លួនខាងលើឈ្មោះ ង៉ែត តារា ភេទប្រុស អាយុ២៨ឆ្នាំ មានស្រុកកំណើតនៅភូមិតាសូ ឃុំឧត្តមសូរីយា ស្រុកត្រាំកក់ ខេត្តតាកែវ មានប្រពន្ធឈ្មោះសុខ សាខន អាយុ២០ឆ្នាំ នៅភូមិធ្នង់ ឃុំថ្នាធ្នង់ ស្រុករំដួល ខេត្តស្វាយរៀង។
ក្រោយពីឃាត់ខ្លួនជនសង្ស័យខាងលើ សមត្ថកិច្ចបានឆែកឆេររកឃើញកាំភ្លើងជ័រ១ដើម ដាវសាម៉ូរ៉ៃ១ដើមខ្នោះដៃ១គូ លុយដុល្លារ (លុយសែន) សរុប១៨៤០ដុល្លារ និងអត្តសញ្ញាណប័ណ្ណ២សន្លឹក សំបុត្រកំណើត១សន្លឹក និងកាតគ្រីម៉ូតូ១។
សមត្ថកិច្ចក៏បានពិនិត្យទឹកនោមជនសង្ស័យខាងលើរកឃើញថា ជនសង្ស័យជាអ្នកប្រើប្រាស់គ្រឿងញៀន ដែលជាហេតុនាំឱ្យមានការសន្និដ្ឋានថា រូបគេជាមនុស្សបែកថ្នាំផងដែរ។ បច្ចុប្បន្នជនសង្ស័យត្រូវបានឃាត់ខ្លួន និងកសាងសុំណុំរឿងបញ្ជូនមកស្នងការដ្ឋាននគបាលខេត្តស្វាយរៀងចាត់ការបន្តតាមនីតិវិធី៕
ចែករំលែកព័តមាននេះ