ខេត្តបន្ទាយមានជ័យ ៖ ជនសង្ស័យប្រុសស្រី៤នាក់ ត្រូវបានកម្លាំងកងរាជអាវុធហត្ថឃាត់ខ្លួន ចោទប្រកាន់ពីបទជួញដូរ និងប្រើប្រាស់គ្រឿងញៀនខេទឹកកកចំនួន០៨កញ្ចប់ ស្មើ៥០.៤ក្រាម និងរថយន្ត១គ្រឿងត្រូវបញ្ជូនទៅសាលាដំបូងខេត្តបន្ទាយមានជ័យ ដើម្បីចាត់ការតាមច្បាប់នៅថ្ងៃទី១៨ ខែសីហា ឆ្នាំ២០១៨ ។
ជនសង្ស័យប្រុសស្រី៤នាក់ មានទី១- ឈ្មោះ ឆាយ ករុណា ហៅរ័ត្ន ភេទប្រុស អាយុ៣៣ឆ្នាំ(ជួញដូរ) ទី២- ឈ្មោះ ឡា ប៊ុនហុង ភេទប្រុស អាយុ៣៥ឆ្នាំ ទី៣ – ឈ្មោះ អ៊ិន ស៊ីណា ភេទស្រីអាយុ៣៩ឆ្នាំ ទី៤- ឈ្មោះ ឌឿន រដ្ឋា ភេទប្រុស អាយុ៣៥ឆ្នាំ ជនសង្ស័យស្នាក់នៅក្រុងសិរីសោភ័ណ ខេត្តបន្ទាយមានជ័យ ។
លោកវរសេនីយ៍ឯក ស ប៊ុនសឿង មេបញ្ជាការរងកងរាជអាវុធហត្ថខេត្តបន្ទាយមានជ័យបានប្រាប់ថា នៅពេលឃាត់ខ្លួនជនសង្ស័យ គឺកម្លាំងជំនាញកងរាជអាវុធហត្ថខេត្តបន្ទាយមានជ័យបានធ្វើការស្រាវជ្រាវ និងកំណត់មុខសញ្ញាហើយបានចុះបង្ក្រាបឃាត់ខ្លួនជនសង្ស័យប្រុសស្រី៤នាក់ និងដកហូតវត្ថុតាងមានរថយន្ត១គ្រឿងជាមធ្យោបាយធុនតូច ពណ៌ស្ករ ពាក់ស្លាក់លេខ បាត់ដំបង 2A- 9806 និងគ្រឿងញៀនប្រភេទមេតំហ្វេតាមីន (ខេទឹកកកចំនួន៨កូនថង់)ស្មើ៥០.៤ក្រាម យ៉ាម៉ាចំនួន៤គ្រាប់ និងជញ្ជីងថ្លឹងគ្រឿងញៀន១គ្រឿង ទូរស័ព្ទដៃ០៤គ្រឿង ដែលឃាត់កាលពីថ្ងៃទី១៦ ខែសីហា ឆ្នាំ២០១៨ នៅចំណុចភូមិ សង្កាត់កំពង់ស្វាយ ក្រុងសិរីសោភ័ណ ។
លោកឧត្តមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្តបន្ទាយមានជ័យបានប្រាប់ថា នៅពេលឃាត់ខ្លួនជនសង្ស័យប្រុសស្រី៤នាក់ និងវត្ថុតាងរថយន្ត១គ្រឿង និងគ្រឿងញៀនប្រភេទតំហ្វេតាមីនហៅខេទឹកកកចំនួន០៨ថង់តូច ស្មើ៥០.៤ក្រាម យ៉ាម៉ា៤គ្រាប់ ដោយយោងតាមវត្ថុតាង និងចម្លើយសារភាពបានកសាងសំណុំរឿងបញ្ចូនទៅសាលាដំបូងខេត្តដើម្បីចាត់ការតាមច្បាប់ ។
ដោយមានការណែនាំពីលោកឧបនាយករដ្ឋមន្ត្រី កែ គឹមយ៉ាន ប្រធានអាជ្ញាធរជាតិប្រយុទ្ធប្រឆាំងគ្រឿងញៀនដាក់វិធានការលុបបំបាត់ឲ្យអស់នៅបទល្មើសគ្រឿងញៀនក្នុងខេត្ត ដើម្បីការពារសន្តិសុខ និងសណ្តាប់ធ្នាប់ភូមិ- ឃុំមានសុវត្ថិភាពជូនប្រជាពលរដ្ឋ ៕
ចែករំលែកព័តមាននេះ