រាជធានីភ្នំពេញ ៖ អគារ Gold Tower42 បន្ទាប់ពីបន្ដការសាងសង់ឡើងវិញយ៉ាងសកម្មនោះ ក្រុមហ៊ុនបានប្រកាសថា នឹងបញ្ចប់ការសាងសង់នៅចុងឆ្នាំនេះ ហើយនឹងដាក់ឲ្យដំណើរការនៅចុងឆ្នាំ២០១៩ខាងមុខ ។…
រាជធានីភ្នំពេញ ៖ អគារ Gold Tower42 បន្ទាប់ពីបន្ដការសាងសង់ឡើងវិញយ៉ាងសកម្មនោះ ក្រុមហ៊ុនបានប្រកាសថា នឹងបញ្ចប់ការសាងសង់នៅចុងឆ្នាំនេះ ហើយនឹងដាក់ឲ្យដំណើរការនៅចុងឆ្នាំ២០១៩ខាងមុខ ។
អគារនេះ កាលពីដើមឡើយសម្រេចបាន៣១ជាន់រួចហើយ មុនពេលផ្អាករយៈពេលស្ទើរ១ទសវត្សរ៍ ប៉ុន្តែបន្ទាប់ពីប្រកាស និងចាប់ផ្តើមសាងសង់ឡើងវិញ ក្រុមហ៊ុនសាងសង់សម្រេចបានសមិទ្ធផលរបស់ខ្លួន ដោយសាងសង់បាន៧ជាន់បន្ថែម ដែលធ្វើឲ្យកម្ពស់អគារនេះឡើងដល់៣៨ជាន់ ។ ដូច្នេះ នៅសល់៤ជាន់ទៀតប៉ុណ្ណោះ ការសាងសង់គ្រោងអគារនេះនឹងបញ្ចប់តាមផែនការ ។
ក្រុមហ៊ុនវិនិយោគ YUNWOO Cambodia សហការជាមួយក្រុមហ៊ុន Hongtao Decoration Co., Ltd និង HTWM Engineering Cambodia Co., Ltd ដែលអគ្គនាយកក្រុមហ៊ុនHongtal Decoration Co., Ltd ប្រកាសថា គ្រោងអគារនេះ នឹងបញ្ចប់នៅចុងឆ្នាំនេះ ហើយនឹងដាក់ឲ្យដំណើរការនៅចុងឆ្នាំ២០១៩ខាងមុខ ។
លោក Liu Nianxin អគ្គនាយកក្រុមហ៊ុន Hongtao Decoration Co., Ltd និងHTWM Engineering Cambodia Co., Ltd បានលើកឡើងក្នុងពិធីប្រកាសបើកការដ្ឋានសាងសង់អគារGold Tower42 ឡើងវិញ ថា ការសម្រេចចិត្តដាក់ទុនវិនិយោគបន្តលើគម្រោងអគារ៤២ជាន់ គឺមានចំណុចសំខាន់៤ ដូចជា ៖ ទី១-ក្រុមហ៊ុន Hongtao មានបទពិសោធន៍ក្នុងរយៈពេលជាង៣០ឆ្នាំ ទៅលើគម្រោងសាងសង់អគារខ្ពស់ៗ ដែលល្បីៗបំផុតក្នុងប្រទេសចិន ។
ទី២-គោលនយោបាយផ្លូវមួយ ខ្សែក្រវាត់មួយ ដែលជាគោលការណ៍របស់ប្រទេសចិន លោកជឿជាក់ថា គោលការណ៍ខាងលើនេះ នឹងធ្វើឲ្យអគារ៤២ជាន់សម្រេចបានជោគជ័យ ។ ទី៣-ទីតាំងអគារ៤២ជាន់នេះ ជាទីតាំងមានហាងឆេងល្អ ស្ថិតនៅចំកណ្តាលរាជធានីភ្នំពេញ និងស្ថិតនៅទីប្រជុំរវាងមហាវិថីធំៗចំនួន២ គឺមហាវិថីព្រះមុនីវង្ស និងមហាវិថីព្រះសីហនុ និងជាតំបន់ពាណិជ្ជកម្មកណ្តាលរាជធានីភ្នំពេញ និងទី៤-សំណង់អគារ៤២ជាន់នេះរឹងមាំ និងមានគុណភាពខ្ពស់ស្របតាមស្តង់ដាអន្តរជាតិ ។
លោក Liu Nianxin បានបន្តថា ៖« ខ្ញុំសោកស្តាយមែនទែន នៅពេលឃើញអគារមួយនេះត្រូវបានគេបោះបង់ចោល ។ ដូចនេះ ទើបក្រុមហ៊ុនរបស់ខ្ញុំត្រឡប់មកសហការគ្នា ដើម្បីសាងសង់អគារនេះឡើងវិញ ជាពិសេស រំពឹងខ្ពស់ថា ក្រុមហ៊ុនទាំងពីរនឹងអាចរកប្រាក់កម្រៃយ៉ាងច្រើនពីអគារមួយនេះ » ។
លោក Kim Tae Yeon អគ្គនាយកក្រុមហ៊ុនYUNWOO Cambodia Co., LTD បានថ្លែងឲ្យដឹងថា ក្រុមហ៊ុនបានបន្ថែមទុន១៤០លានដុល្លារលើគម្រោង Golden Tower មួយនេះ បន្ទាប់ពីបានបោះទុនចំនួន១០០លានដុល្លាររួចមកហើយ ។
លោកបន្តថា បន្ទាប់ពីអគារ Gold Tower 42 នេះសម្រេចការសាងសង់ជាស្ថាពរ វានឹងក្លាយជាសមិទ្ធផលអគារពាណិជ្ជកម្មថ្មីមួយទៀត ស្ថិតនៅកណ្តាលរាជធានីភ្នំពេញ ដែលនេះជាការឆ្លុះបញ្ចាំងពីការអភិវឌ្ឍរីកចម្រើន ព្រមទាំងបានរួមចំណែកក្នុងកំណើនសេដ្ឋកិច្ចកម្ពុជាតទៅអនាគត ៕
ចែករំលែកព័តមាននេះ