រាជធានីភ្នំពេញ ៖ គម្រោងផ្លូវល្បឿនលឿនពីភ្នំពេញ-ខេត្តព្រះសីហនុ ដែលរាជរដ្ឋាភិបាលបានប្រកាសគ្រោងបើកការដ្ឋានសាងសង់នៅខែវិច្ឆិកានោះ ពេលនេះបានដឹងពីទីតាំងនៃចំណុចចាប់ផ្ដើម និងចំណុចដែលត្រូវឆ្លងកាត់ហើយ ។ អ្នកនាំពាក្យក្រសួងសាធារណការ និងដឹក ជញ្ជូនលោក…
រាជធានីភ្នំពេញ ៖ គម្រោងផ្លូវល្បឿនលឿនពីភ្នំពេញ-ខេត្តព្រះសីហនុ ដែលរាជរដ្ឋាភិបាលបានប្រកាសគ្រោងបើកការដ្ឋានសាងសង់នៅខែវិច្ឆិកានោះ ពេលនេះបានដឹងពីទីតាំងនៃចំណុចចាប់ផ្ដើម និងចំណុចដែលត្រូវឆ្លងកាត់ហើយ ។
អ្នកនាំពាក្យក្រសួងសាធារណការ និងដឹក ជញ្ជូនលោក វ៉ាស៊ឹម សុរិយា បានមានប្រសាសន៍តាមទូរស័ព្ទនាព្រឹកថ្ងៃទី១៧ សីហា ម្សិលមិញថា ផ្លូវល្បឿនលឿនភ្នំពេញ-ព្រះសីហនុ នឹងចាប់ផ្ដើមចេញពីតំបន់អូរដឹមនៃចំណុចប្រសព្វរវាងផ្លូវទៅទំនប់កប់ស្រូវ និងអូសកាត់ផ្នែកខាងស្តាំដៃនៃផ្លូវជាតិលេខ៤។
លោកបន្តថា ៖« ចេញពីរាជធានីភ្នំពេញទៅ ផ្លូវនេះនឹងស្ថិតនៅផ្នែកខាងស្តាំផ្លូវជាតិលេខ៤ប្រមាណ៣០គីឡូម៉ែត្រ ទើបងាកមកខាងឆ្វេងដៃវិញរហូតដល់ស្រុកព្រៃនប់ ទើបងាកមកខាងស្តាំដៃរហូតដល់ក្រុងព្រះសីហនុតែម្ដង »។
លោកបន្តថា ៖« ផ្លូវដ៏សំខាន់នេះនឹងសាងសង់នៅខែវិច្ឆិកាខាងមុខនេះហើយ ដែលតាមការប្រកាសរបស់លោកទេសរដ្ឋមន្ត្រី ស៊ុន ចាន់ថុលរដ្ឋមន្ត្រីក្រសួងសាធារណការ និងដឹក
ជញ្ជូន »។
លោកបញ្ជាក់ថា ៖« ផ្លូវនេះប្រវែងជាង១៩០គីឡូម៉ែត្រ និងចំណាយថវិកាសាងសង់ប្រមាណ១.៩០០លានដុល្លារ ដោយប្រើពេលសាងសង់រយៈពេល៤ឆ្នាំ ហើយផ្លូវនេះនឹងមានរបងបិទជិតទាំងសងខាង ដើម្បីកុំឲ្យមានការរំខានពីការធ្វើចរាចរណ៍ឆ្លងកាត់ច្រើន »។
លោក វ៉ាស៊ឹម សូរិយា បានបន្តថា ក្រសួងសេដ្ឋកិច្ចនិងហិរញ្ញវត្ថុ កំពុងដោះស្រាយផលប៉ះពាល់ប្រជាពលរដ្ឋលើគម្រោងនេះ ប៉ុន្តែការបញ្ចប់នៅពេលណានោះ លោកមិនទាន់ដឹងនៅឡើយ ហេតុនេះការសាងសង់ប្រហែលជាត្រូវធ្វើបណ្តើរ ដោះស្រាយបណ្តើរ ។
បើតាមអគ្គនាយកបច្ចេកទេសនៃក្រសួងសាធារណការ និងដឹកជញ្ជូន លោក នូ វឌ្ឍនៈ គម្រោងផ្លូវល្បឿនលឿននេះមានប្រវែង១៩០,៦៣គីឡូម៉ែត្រ មានទំហំទទឹង២៤ម៉ែត្រ ជាផ្លូវ៤គន្លង ក្រាលកៅស៊ូAC មានសួនច្បារចំកណ្តាល មានផ្លូវបំបែកប្តូរទិស មានទីតាំងឈប់សម្រាក មានរបងសងខាងផ្លូវ និងហេដ្ឋារចនាសម្ព័ន្ធសំណង់សេវាគាំទ្រជាច្រើនទៀត ដូចជាស្ពានវែង និងមធ្យមចំនួន៥កន្លែង, ស្ពានខ្លី៣៣កន្លែង, ស្ពានរំលងឬផ្លោះផ្លូវ៣២១កន្លែង និងមានកន្លែងឈប់សម្រាកចំនួន៣កន្លែង ។
លោកបណ្ឌិតម៉ី កល្យាណ ប្រធានក្រុមប្រឹក្សាវិទ្យាស្ថានសិក្សាការអភិវឌ្ឍបានថ្លែងថា បញ្ហាហេដ្ឋារចនាសម្ព័ន្ធជារឿងប្រឈមមួយក្នុងការអភិវឌ្ឍសេដ្ឋកិច្ចកម្ពុជា ប៉ុន្តែរដ្ឋាភិបាលក្នុងប៉ុន្មានឆ្នាំចុងក្រោយនេះបានរៀបចំគោលនយោបាយ និងវិនិយោគលើហេដ្ឋារចនាសម្ព័ន្ធ យ៉ាងច្រើន ដើម្បីជំរុញកំណើនសេដ្ឋកិច្ចជាតិ ។
លោកបន្តថា អ្វីដែលរាជរដ្ឋាភិបាលបានធ្វើ គឺស្ថិតក្នុងទិសដៅត្រឹមត្រូវមួយហើយ ប៉ុន្តែលោកស្នើសុំឲ្យមានការពន្លឿនការវិនិយោគលើហេដ្ឋារចនាសម្ព័ន្ធបន្ថែមទៀត ដើម្បីកាត់បន្ថយតម្លៃដើមនៃការដឹកជញ្ជូន ។
លោកបន្តថា ៖« វាជារឿងចាំបាច់ដែលត្រូវកសាងហេដ្ឋារចនាសម្ព័ន្ធ ដើម្បីរុញសេដ្ឋកិច្ចកម្ពុជាទៅកាន់ដំណាក់កាលថ្មីមួយទៀត ព្រោះបើចង់ឲ្យសេដ្ឋកិច្ចកម្ពុជាកើនឡើង និងឈានទៅកាន់លំដាប់ថ្មី កម្ពុជាត្រូវការវិនិយោគលើហេដ្ឋារចនាសម្ព័ន្ធបន្ថែមទៀត »។
ប្រមុខរាជរដ្ឋាភិបាលកម្ពុជា សម្ដេចតេជោ ហ៊ុន សែន នាយករដ្ឋមន្ត្រី បានថ្លែងបញ្ជាក់កន្លងមកថា ៖« ផ្លូវល្បឿនលឿននេះ គឺមានសារសំខាន់ខ្លាំងណាស់សម្រាប់កម្ពុជា ក្នុងការជំរុញកំណើនសេដ្ឋកិច្ច ពិសេសគឺភ្ជាប់រវាងប៉ូលសេដ្ឋកិច្ចភ្នំពេញ និងខេត្តព្រះសីហនុ »៕
ចែករំលែកព័តមាននេះ