រាជធានីភ្នំពេញ ៖ ចៅក្រមស៊ើបសួរសាលាដំបូងរាជធានីភ្នំពេញ កាលពីថ្ងៃទី១៧ សីហា បានសម្រេចឃុំខ្លួនជនសង្ស័យប្រុសស្រី២នាក់ ដាក់ពន្ធនាគារជាបណ្តោះអាសន្ន ក្រោមការចោទប្រកាន់ពីបទ លួច និងក្លែងឯកសារសាធារណៈ។ ជនសង្ស័យទី១ឈ្មោះ ស សេងហុង ភេទប្រុស អាយុ២២ឆ្នាំ មុខរបរលក់គ្រឿងបន្លាស់រថយន្ត មានទីលំនៅផ្ទះលេខ២៥ ផ្លូវបេតុង សង្កាត់ឃ្មួញ ខណ្ឌព្រែកព្នៅ រាជធានីភ្នំពេញ។ និងម្នាក់ទៀតឈ្មោះ ស ធីតា ភេទស្រី អាយុ៣២ឆ្នាំ មុខរបរ លក់គ្រឿងបន្លាស់រថយន្ត ស្នាក់នៅផ្ទះលេខ២១ ផ្លូវបេតុង សង្កាត់ឃ្មួញ ខណ្ឌព្រែកព្នៅ រាជធានីភ្នំពេញ។
ទាក់ទិននឹងការបញ្ជូនខ្លួនអាជីវករលក់គ្រឿងបន្លាស់ពីរនាក់ ទៅកាន់សាលាដំបូងរាជធានីភ្នំពេញនេះ ត្រូវបានសមត្ថកិច្ចនគរបាលបានបង្ហើបឲ្យដឹងថា ជាការធ្វើឡើងតាមពាក្យបណ្តឹងរបស់លោកអនុសេនីយ៍ឯក ប៉ាត សំណាត នាយនគរបាលប៉ុស្តិ៍រដ្ឋបាលសង្កាត់បឹងព្រលឹត ខណ្ឌ៧មករា។ ក្នុងពាក្យបណ្តឹងបានបញ្ជាក់ថា កាលពីវេលាម៉ោង៤ទៀបភ្លឺ ថ្ងៃទី១៦ កក្កដា ២០១៨ មានករណីបាត់ស្លាកលេខរថយន្តម៉ាក HighIander ពណ៌ទឹកមាស ស្លាកលេខ ភ្នំពេញ ២AS-៣២៣១ ទាំងមុខក្រោយ នៅចំណុចផ្ទះលេខ២៦៣អឺ០ ផ្លូវលេខ១០៧ សង្កាត់បឹងព្រលឹត ដែលមានជនរងគ្រោះឈ្មោះ ប៉ាត សំណាត ភេទប្រុស អាយុ៥២ឆ្នាំ។
លុះវេលាម៉ោង៩យប់ ថ្ងៃទី១២ សីហា ២០១៨ ដើមបណ្តឹងគឺលោក ប៉ាត សំណាត បានទៅព្រលានយន្តហោះអន្តរជាតិភ្នំពេញ ដើម្បីទទួលបងប្អូនមកពីក្រៅប្រទេស ពេលនោះស្រាប់តែបានឃើញស្លាកលេខរថយន្តរបស់ខ្លួន (ភ្នំពេញ ២AS-៣២៣១ ពាក់ជាប់នៅរថយន្តម៉ាក Audi Q7 ផលិតឆ្នាំ២០០៩ ពណ៌ស នៅទីនោះទៅវិញ។ ពេលឃើញស្លាកលេខរថយន្ត របស់ខ្លួនភ្លាម ដើមបណ្តឹងដែលជាមេប៉ុស្តិ៍១រូប បានរាយការណ៍ទៅសមត្ថកិច្ចមូលដ្ឋាន និងបានស្នើសុំកម្លាំងឲ្យជួយអន្តរាគមន៍ឃាត់រថយន្ត និងម្ចាស់ ដើម្បីធ្វើការសាកសួរពាក់ព័ន្ធយកស្លាកលេខរថយន្តស្របច្បាប់របស់លោក ដែលចោរលួចយកទៅបាត់ មកពាក់លើរថយន្តអូឌីនោះវិញ។
សមត្ថកិច្ចឲ្យដឹងទៀតថា ពេលនោះនគរបាលមូលដ្ឋានក៏បានចុះទៅ ឃាត់មនុស្ស២ទៅ៣នាក់ ដែលជាគ្រួសារតែមួយ និងជាអាជីវករលក់គ្រឿងបន្លាស់រថយន្ត ដែលទៅចាំទទួលសាច់ញាតិមកពីក្រៅប្រទេសដែរ។ ពេលឃាត់ខ្លួនមនុស្ស៣នាក់ និងរថយន្តអូឌី ១គ្រឿង ក៏ត្រូវបានសមត្ថកិច្ចនាំទៅកាន់អធិការដ្ឋាននគរបាលខណ្ឌ៧មករា ដើម្បីសាកសួររកមុខចោរលួច ស្លាកលេខរថយន្តរបស់លោក ប៉ាត សំណាត នោះ។ នៅពេលសាកសួរជនទាំង៣នាក់មានម្នាក់ មិនពាក់ព័ន្ធករណីលួចទេ សមត្ថកិច្ចក៏បានអនុញ្ញាតឲ្យទៅវិញ ដោយមានការឯកភាពពីសំណាក់ ស្ថាប័នអយ្យការសាលាដំបូងរាជធានីភ្នំពេញផងដែរ។
ដូច្នោះមានតែឈ្មោះ ស ធីតា និងឈ្មោះ ស សេងហុង ដែលត្រូវបានឃាត់ខ្លួន និងកសាងសំណុំរឿងបញ្ជូនទៅកាន់សាលាដំបូងរាជធានីភ្នំពេញ តាមនីតិវិធី។ តែទោះជាយ៉ាងណាក្តីចម្លើយជនសង្ស័យឈ្មោះ ស ធីតា ឆ្លើយនៅសមត្ថកិច្ចថា រថយន្ត និង ស្លាកលេខនោះខ្លួនបានទិញពីមនុស្សម្នាក់ក្នុងតម្លៃ១៦.៧០០ដុល្លារអាមេរិក។ ចំណែកចម្លើយឈ្មោះ ស សេងហុង បានបញ្ជាក់ដែរថា ពេលនោះថៅកែខ្លួនបានប្រើឲ្យខ្លួនបើករថយន្តអូឌី ទៅព្រលានយន្តហោះ អន្តរជាតិភ្នំពេញ ដើម្បីទទួលភ្ញៀវមកពីប្រទេសកូរ៉េ លុះពេលទៅដល់ព្រលានយន្តហោះស្រាប់តែ ត្រូវបានសមត្តកិច្ចឃាត់ខ្លួនតែម្តង៕
ចែករំលែកព័តមាននេះ