ចិន ៖ កាលពី​ថ្ងៃ​ទី​១០ ខែសីហា កន្លង​មកនេះ ស្ត្រី​ម្នាក់​បាន​អះអាង​ថា មាន​គ្រាប់បែក​លើ​យន្តហោះ​មួយ​នៅ​អាកាសយានដ្ឋាន​អន្តរជាតិ Nanning Wuxu នៅ Guangxi ប៉ុន្តែ​វា​ជា​ការ​កុហក​ប៉ុណ្ណោះ ព្រោះ​ស្ត្រី​រូប​នេះ​បាន​កក់​សំបុត្រ​យន្តហោះ​នៅ​ថ្ងៃ​ខុស ទើប​ចង់​ឲ្យ​មានការ​ពន្យា​ពេល​ឡើង​យន្តហោះ​។

ស្ត្រី​ដែល​មានត្រកូល Na រូប​នេះ បាន​ធ្វើ​ដំណើរ​ទៅ​កាន់​អាកាសយានដ្ឋាន ដើម្បី​ឡើង​យន្តហោះ​ទៅ​កាន់​ទីក្រុង Harbin​។ ដោយ​យោង​ទៅ​តាម​សារព័ត៌មាន​ក្នុងស្រុក CCTV បាន​ឲ្យ​ដឹង​ថា ស្ត្រី​រូប​នេះ ត្រូវ​បាន​ហាមឃាត់​មិន​ឲ្យ​ឡើង ព្រោះតែ​នាង​បាន​ទិញ​សំបុត្រ​យន្តហោះ​សម្រាប់​ថ្ងៃ​ទី​១១ ខែសីហា មិនមែន​ថ្ងៃ​ទី​១០​ឡើយ​។

បន្ទាប់​ពី​នាង​ដឹង​ថា នាង​មិន​អាច​ដូរ​សំបុត្រ​បាន ស្ត្រី​រូប​នេះ​បាន​ព្យាយាម​អះអាង​ថា មាន​គ្រាប់បែក​លើ​យន្តហោះ​ធ្វើ​ឲ្យ​បុគ្គលិក​អាកាសយានដ្ឋាន​ប្រញាប់​ទាក់ទង​ទៅ​ខាង​ប៉ូលិស​។

អ្នក​ធ្វើ​ដំណើរ​ប្រមាណ​១៧២​នាក់​លើ​យន្តហោះ​ត្រូវ​បាន​នាំ​ចេញ ហើយ​យន្តហោះ​នោះ​ត្រូវ​បាន​ត្រួតពិនិត្យ​យ៉ាង​ដិត​ដល់​។ ចុង​ក្រោយ អាកាសយានដ្ឋាន​បាន​ឲ្យ​ដឹង​ថា មិន​មាន​វត្តមាន​គ្រាប់បែក​ណាមួយ​លើ​យន្តហោះ​នោះ​ឡើយ​។ ការ​ត្រួតពិនិត្យ​បាន​បង្ក​ឲ្យ​មាន​ការ​ពន្យា​ការ​ហោះហើរ​ច្រើន​ជាង​២​ម៉ោង​ទៅ​ទៀត​។

ប៉ូលិស​បាន​ប្រទះ​ឃើញ​ស្ត្រី​ម្នាក់​ខឹងសម្បា​លើ​ឥដ្ឋ ដោយ​មាន​អ្នក​រួម​ដំណើរ​ព្យាយាម​លួងលោម​។ ស្ត្រី​ខាងលើ​បាន​ទទួលកំហុស និង​បាន​ប្រាប់​ដល់​ប៉ូលិស​ថា «​ខ្ញុំ​គ្រាន់តែ​ចង់​បញ្ឈប់​យន្តហោះ​មិន​ឲ្យ​ហោះហើរ​ប៉ុណ្ណោះ​»​។

ជា​លទ្ធផល ស្ត្រី​ត្រកូល Na ត្រូវ​បាន​ជាប់​ឃុំ​អស់​៥​ថ្ងៃ​ទុកជា​ទណ្ឌកម្ម​សម្រាប់​ការ​ភូតភរ និង​បង្ក​ភាព​ចលាចល​៕ វីដេអូ​ឃ្លីប​ដក​ស្រង់​ចេញពី ៖ 抖音快手秒拍短视频精选短视频

https://www.youtube.com/watch?v=i4_VjnBJLFc