ខេត្តបាត់ដំបង ៖ អាជ្ញាធរខេត្តនិងមន្ទីរជំនាញ នៅព្រឹកថ្ងៃទី១៦សីហា នេះ បានចាត់ទុកជំនន់ទឹកភ្លៀងក្នុងស្ទឹងសង្កែ ដែលកំពុងហក់ឡើងខ្លាំងនាពេលនេះ គឺជាការប្រកាសអាសន្នហើយ និងបានអំពាវនាវដល់ប្រជាពលរដ្ឋដែលរស់នៅតាមដងស្ទឹងសង្កែ ឱ្យមានការប្រុងប្រយ័ត្នខ្ពស់…
ខេត្តបាត់ដំបង ៖ អាជ្ញាធរខេត្តនិងមន្ទីរជំនាញ នៅព្រឹកថ្ងៃទី១៦សីហា នេះ បានចាត់ទុកជំនន់ទឹកភ្លៀងក្នុងស្ទឹងសង្កែ ដែលកំពុងហក់ឡើងខ្លាំងនាពេលនេះ គឺជាការប្រកាសអាសន្នហើយ និងបានអំពាវនាវដល់ប្រជាពលរដ្ឋដែលរស់នៅតាមដងស្ទឹងសង្កែ ឱ្យមានការប្រុងប្រយ័ត្នខ្ពស់ ខណៈទឹកជំនន់នេះ កំពុងហូរហៀរវាយលុកចូលក្នុងផ្សារបឹងឈូក លិចកំណាត់ផ្លូវ និងលិចលង់លំនៅឋានប្រជាពលរដ្ឋមួយចំនួន ដែលរស់នៅតាមដងស្ទឹងសង្កែ។
អភិបាលខេត្តបាត់ដំបង លោកងួន រតនៈ ដែលបានដឹកនាំមន្ត្រីនានា និងកម្លាំងចម្រុះ ចុះពិនិត្យតាមគោលដៅដែលប្រឈមនឹងការលិចលង់ បានមានប្រសាសន៍ថា ស្ថានភាពទឹកជំនន់ក្នុងស្ទឹងសង្កែនាពេលនេះ បានឡើងដល់ចំណុចប្រកាសអាសន្នហើយ ។
បើគិតត្រិមម៉ោង១២ថ្ងៃត្រង់ថ្ងៃដដែលនេះ ទឹកស្ទឹងបានឡើងដល់កម្ពស់១៣,៧៥ម៉ែត្រ បានលិចលំនៅឋានប្រជាពលរដ្ឋជាច្រើនខ្នង ដែលរស់នៅជាប់នឹងដងស្ទឹងសង្កែ ។ មិនតែប៉ុណ្ណោះ ទឹកស្ទឹងពេលនេះ បាននិងកំពុងហូរហៀរចេញតាមប្រព័ន្ធលូនានា នាំឱ្យលិចកំណាត់ផ្លូវមួយចំនួន នៅក្នុងក្រុងបាត់ដំបងទៀត ។
បើតាមមន្ត្រីធនធានទឹកនិងឧតុនិយមខេត្ត ដែលចុះតាមដានសន្ទុះទឹកជាប្រចាំបានឲ្យដឹងថា ទឹកស្ទឹងសង្កែ ដែលមានសន្ទុះខ្លាំងនាពេលនេះ គឺបានចាប់ផ្ដើមឡើងតាំងពីយប់ថ្ងៃទី១៤ សីហា ដោយសារមានភ្លៀងធ្លាក់ខ្លាំងជាបន្តបន្ទាប់នាប៉ុន្មានថ្ងៃមុននេះ នៅប៉ែកខាងលើនៃដងស្ទឹង ។
ជាពិសេសនៅក្នុងភូមិសាស្ត្រនានា នៅស្រុកសំឡូត តែទឹកស្ទឹងបានហក់ឡើងខ្លាំងនៅថ្ងៃទី១៥ និង១៦សីហានេះ ។ ដោយសារទឹកស្ទឹងឡើងហូរហៀរខ្លាំង ទើបបណ្ដាលឲ្យហូរចេញតាមប្រព័ន្ធលូ ចូលក្នុងក្រុងលិចកំណាត់ផ្លូវមួយចំនួននៅម្ដុំផ្សារបឹងឈូក និងម្ដុំរង្វង់មូលសេះ.ស ។
ប្រធានមន្ទីរធនធានទឹកនិងឧតុនិយមខេត្ត លោកឡុង ផល្គុន បានប្រាប់កោះសន្តិភាពថា ទឹកក្នុងស្ទឹងសង្កែ ដែលកំពុងហក់ឡើងយ៉ាងខ្លាំងនេះ គឺជាជំនន់ទឹកភ្លៀងដែលបានធ្លាក់ខ្លាំងជាបន្តបន្ទាប់នៅស្រុកសំឡូត នាប៉ុន្មានថ្ងៃមុននេះ។ លោកថា ពេលនេះកម្ពស់ទឹកស្ទឹង នៅត្រង់កំណាត់ចាប់ពីទំនប់កង្ហត ដល់ទំនប់ពហុបំណង ហាក់បានធូរស្បើយបន្តិចហើយ តែកម្ពស់ទឹកហាក់នៅខ្លាំងចាប់ពីកំណាត់ទំនប់កង្ហត មកដល់ក្រុងបាត់ដំបង ។
ដូច្នេះ ក្រុងបាត់ដំបង និងស្រុកឯកភ្នំ ដែលស្ថិតនៅផ្នែកខាងក្រោម នៃដងស្ទឹង អាចប្រឈមនឹងជំនន់នេះ ជាច្រើនម៉ោងទៀត ទម្រាំសន្ទុះទឹកហូរអស់សម្រុងពីប៉ែកខាងលើ ។
ចែករំលែកព័តមាននេះ