នៅក្នុងចំណោមឯកអគ្គរដ្ឋទូតអាមេរិកថ្មីប្រចាំប្រទេសនានា ដែលលោកប្រធានាធិបតី ដូណាល់ ត្រាំ បានប្រកាសតែងតាំង គឺមានឯកអគ្គរដ្ឋទូតអាមេរិកថ្មីប្រចាំនៅកម្ពុជា ក្រោយទំនេរតាំងពីថ្ងៃទី១៨ ខែឧសភា ឆ្នាំ២០២៤មក ។
ឯកអគ្គរដ្ឋទូតថ្មីដែលលោកត្រាំ បានតែងតាំងមកកាន់កម្ពុជានោះ គឺលោក គ្រីស្តូហ្វ័រ អេនឌឺសុន (Christopher Anderson) ។
លោក អេនឌីសុន អាចនឹងក្លាយជាឯកអគ្គរដ្ឋទូតអាមេរិកថ្មីមកកម្ពុជា ក្រោយលោកទទួលការយល់ព្រមពីព្រឹទ្ធសភាបន្តពីលោក ប៉ាទ្រិក មួហ្វី (Patrick Murphy) ដែលចប់អណត្តិតាំងពីថ្ងៃទី១៨ ខែឧសភា ឆ្នាំ ២០២៤មក ។
គួររំលឹកថា មុនពេលលោក មួហ្វី ចប់អណត្តិ លោកប្រធានាធីបតីអាមេរិក ចូ បៃដិន បានតែងតាំងឯកអគ្គរដ្ឋទូតដែរ គឺលោក រ៉ូបឺត វីលៀម ហ្វ័ដេន (Robert William Forden) ប៉ុន្តែលោកមិនបានមក បំពេញមុខងារនេះទេរហូតដល់មានការតែងតាំងពីសេតវិមាន នៅថ្ងៃទី១ ខែមិថុនា ដោយលោក ត្រាំ ។
លោក អេនឌឺសុន ត្រូវបានគេដឹងថា ជាពលរដ្ឋអាមេរិកមានម្តាយ ជាជនជាតិស៊ុយអែត និងឪពុកជាជនជាតិអាមេរិក ។ លោក កើតនៅអ៊ីរ៉ង់ រហូតដល់អាយុ៦ឆ្នាំ រួចប្ដូរទៅដាណឺម៉ាក ទើបបានមកធំធាត់នៅទឹកដីអាមេរិក ។
លោក ជាអ្នកការទូតដែលមានបទពិសោធន៍តាំងឆ្នាំ២០០៥ ហើយធ្លាប់បម្រើការងារនៅរុស្ស៊ី អាម៉េនី ម៉ុងហ្គោលី និងអ៊ុយក្រែនជាដើម ៕
ចែករំលែកព័តមាននេះ