អាថ៌កំបាំងរោងចក្របារីចិន នៅកំបូល ! គ្រាន់តែសួរនាំព័ត៌មានស្រាប់តែប្រញាប់រើអីវ៉ាន់រត់
- ភ្នំពេញ
រាជធានីភ្នំពេញ ៖ បន្ទាប់ពីកម្មវិធីព័ត៌មាន FireBuzz បានទទួលបានព័ត៌មានអំពីទុក្ខវេទនារបស់ប្រជាពលរដ្ឋភូមិត្រិប សង្កាត់កំបូល ជុំវិញបញ្ហាក្លិនពុលសាយភាយចេញពីរោងចក្រចិន «សានហ៊ី-ឃីងឌាន ឯ.ក» ភ្លាមៗនោះ អាជ្ញាធរខណ្ឌកំបូលបានចេញមុខមកបកស្រាយហើយ ប៉ុន្តែការបកស្រាយនេះបែរជាបង្កើតជាមន្ទិលសង្ស័យកាន់តែធំ ។
ពាក់ព័ន្ធនឹងបញ្ហាប្រឈមខាងលើនេះ លោក ឃឹម ស៊ុនសូដា អភិបាលនៃគណៈអភិបាលខណ្ឌកំបូល កាលពីរសៀលថ្ងៃទី ២ ខែមិថុនា ឆ្នាំ ២០២៦ មកនេះ បានប្រាប់ក្រុមការងារយើងឱ្យដឹងថា រោងចក្រខាងលើនេះមិនមានការផលិតបារីនោះទេ គឺជារោងចក្រចំហុយសន្លឹកថ្នាំជក់ ហើយរោងចក្រនេះគឺមានច្បាប់អនុញ្ញាតត្រឹមត្រូវ ។
ទោះជាយ៉ាងណា ចំពោះបញ្ហាដែលជះក្លិនអាក្រក់រំខាន និងធ្វើឱ្យប៉ះពាល់ដល់សុខភាពប្រជាពលរដ្ឋជារៀងរាល់ថ្ងៃនោះ លោកអភិបាលខណ្ឌបានបញ្ជាក់ថា «លោកមិនបានដឹងនោះទេ» ប៉ុន្តែលោកនឹងចាត់មន្ត្រីជំនាញចុះទៅពិនិត្យមើលជាបន្ទាន់ ។
ជាលទ្ធផល បន្ទាប់ពីមានការចុះពិនិត្យផ្ទាល់ពីមន្ត្រីជំនាញ នាល្ងាចថ្ងៃដដែលនោះ លោកអភិបាលខណ្ឌបានបន្តបញ្ជាក់ប្រាប់ថា រោងចក្រចំហុយសន្លឹកថ្នាំជក់នេះ ត្រូវបានគេរៀបចំរើអីវ៉ាន់ចេញជិតអស់ទៅហើយ ដោយបច្ចុប្បន្ននៅសល់តែឧបករណ៍ផ្សេងៗមួយចំនួនទៀតប៉ុណ្ណោះ ដែលនឹងត្រូវដឹកជញ្ជូនចេញពីទីតាំងដែលបង្កផលប៉ះពាល់ក្លិនស្អុយដល់ប្រជាពលរដ្ឋ ។
មហាជន និងអ្នកភូមិដាក់ការសង្ស័យថា បើមានច្បាប់ត្រឹមត្រូវ ហេតុអ្វីត្រូវរត់ទាំងយប់អាធ្រាត្រ ? ការឆ្លើយតប និងទិដ្ឋភាពជាក់ស្តែងនៅទីតាំងរោងចក្រ បានធ្វើឱ្យមានចម្ងល់យ៉ាងខ្លាំងពីសំណាក់មហាជន ក៏ដូចជាអ្នកសារព័ត៌មាន ។
មហាជនលើកជាចម្ងល់ថា រោងចក្រខ្នាតធំបែបនេះ បើកដំណើរការរាប់ឆ្នាំ បង្កផ្សែងពុលជះក្លិនស្អុយធ្វើទុក្ខបុកម្នេញពលរដ្ឋ រហូតអ្នកភូមិខ្លះរត់ចោលផ្ទះទៅជួលផ្ទះគេរស់នៅទៅហើយ បែរជាអាជ្ញាធរមូលដ្ឋានមិនដែលដឹង ឬមិនដែលឮសោះ ? ទាល់តែអ្នកសារព័ត៌មានសួរដេញដោល ទើបដឹងភ្ញាក់ផ្អើល ។
ចំណុចដែលគួរឱ្យសង្ស័យបំផុតនោះគឺ លុះពេលដែលអ្នកសារព័ត៌មានសួរនាំ ដេញដោលរករបាយការណ៍ EIA (វាយតម្លៃផលប៉ះពាល់បរិស្ថាន) ស្រាប់តែរោងចក្រនោះប្រញាប់ប្រញាល់រើអីវ៉ាន់ចេញទាំងតក់ក្រហល់ទៅវិញ ។
មហាជនដាក់ការសង្ស័យជាខ្លាំងថា ប្រហែលជារោងចក្រនេះ «គ្មានច្បាប់អនុញ្ញាតពិតប្រាកដ» ឬមួយក៏ «ហួសសុពលភាពច្បាប់» ទៅហើយ ទើបបានជាគ្រាន់តែឮសូរអាជ្ញាធរចុះទៅ ស្រាប់តែប្រញាប់ប្រមូលបង្វិចរត់ ដើម្បីគេចវេសពីការទទួលខុសត្រូវ និងការផាកពិន័យបែបនេះ? គិតត្រឹមថ្ងៃទី ៣ ខែមិថុនា ឆ្នាំ ២០២៦ នេះ មិនទាន់មានការបញ្ជាក់ជាថ្មីពីលោកអភិបាលខណ្ឌ ឃឹម ស៊ុនសូដា នៅឡើយទេ ថាតើរោងចក្រចំហុយថ្នាំជក់ចិនមួយនេះ បានរើអីវ៉ាន់ចេញអស់ពីភូមិត្រិបហើយឬនៅ ហើយអ្វីដែលសំខាន់បំផុតនោះ «តើពួកគេផ្លាស់ប្តូរទីតាំងទៅកាន់តំបន់ណា?» ។
នេះជាក្តីបារម្ភថ្មីមួយទៀត ពីព្រោះថា ប្រសិនបើរោងចក្រដែលខ្វះបច្ចេកទេសចម្រោះខ្យល់ និងខ្វះការទទួលខុសត្រូវមួយនេះ គ្រាន់តែរើប្តូរទីតាំងពីភូមិមួយទៅភូមិមួយ ឬពីខណ្ឌមួយទៅខណ្ឌមួយទៀតនោះ ប្រជាពលរដ្ឋស្លូតត្រង់ដែលរស់នៅជិតទីតាំងថ្មីនោះ ច្បាស់ជាត្រូវទទួលរងគ្រោះ ហិតក្លិនពុលស្អុយចំហុយថ្នាំជក់ ធ្លាក់ខ្លួនឈឺ និងរត់ចោលផ្ទះសម្បែង មិនខុសពីពលរដ្ឋនៅភូមិត្រិបឡើយ ។
តើការរើចេញនេះ ជាការរើដើម្បីបិទអាជីវកម្មទាំងស្រុង ឬគ្រាន់តែជាល្បិចលាក់ខ្លួនផ្ទេរទីតាំងបំពុលទៅកន្លែងផ្សេង? តើអាជ្ញាធរពាក់ព័ន្ធ ជាពិសេសក្រសួងបរិស្ថាន នឹងមានចំណាត់ការផ្លូវច្បាប់ពិនិត្យលើប្រព័ន្ធច្បាប់ចាស់របស់ក្រុមហ៊ុននេះបែបណា? កម្មវិធី FireBuzz នឹងបន្តស្វែងរកការពិត និងស៊ើបអង្កេតលើករណីនេះជម្រាបជូនទស្សនិកជនជាបន្តបន្ទាប់ទៀត ៕ ដោយ ៖ មាស តុលា
ចែករំលែកព័តមាននេះ