ទុក្ខលំបាកជាង៤ទសវត្សរ៍៖ ពលរដ្ឋស្រុកសៀមបូក រៃអង្គាសប្រាក់សង់ស្ពានឈើបណ្ដោះអាសន្នឆ្លងអូរ ខណៈរង់ចាំកញ្ចប់ថវិការដ្ឋ
- ស្ទឹងត្រែង
ខេត្តស្ទឹងត្រែង ៖ ការធ្វើដំណើរ និងការដឹកជញ្ជូនកសិផលរបស់ប្រជាពលរដ្ឋនៅក្នុងឃុំសៀមបូក ស្រុកសៀមបូក នៅតែជាឧបសគ្គចម្បងក្នុងជីវភាពរស់នៅ បន្ទាប់ពីតំបន់នោះប្រឈមនឹងការខ្វះខាតស្ពានឆ្លងកាត់អូរធម្មជាតិសំខាន់ៗចំនួន៣មកអស់រយៈពេលជាង៤ទសវត្សរ៍ ។
ដើម្បីដោះស្រាយបញ្ហាចំពោះមុខ នាដើមខែមិថុនា ឆ្នាំ២០២៦ នេះ ប្រជាពលរដ្ឋនៅក្នុងភូមិអូរក្រាក់ និងភូមិអូរឡង់ បានសម្រេចចិត្តរួមគ្នារៃអង្គាសថវិកា និងប្រមូលឈើមកសាងសង់ស្ពានបណ្តោះអាសន្នមួយឆ្លងកាត់ចំណុចអូរឈ្លីក ដើម្បីសម្រួលដល់ការធ្វើដំណើរឆ្លងកាត់ប្រចាំថ្ងៃ ។ លោកស្រី សែម ពាង ពលរដ្ឋរស់នៅភូមិអូរឡង់ បានរៀបរាប់ពីការលំបាកថា ទោះបីជារដូវប្រាំងអាចធ្វើដំណើរឆ្លងកាត់បានខ្លះមែនពិត ប៉ុន្តែនៅរដូវវស្សា អូរនេះ មានទឹកហូរខ្លាំងគួរឱ្យខ្លាច ដែលបង្ខំឱ្យពលរដ្ឋត្រូវប្រើប្រាស់ទូកដចម្លង ដោយត្រូវចំណាយប្រាក់២,០០០រៀលក្នុងម្នាក់ៗ (រួមទាំងម៉ូតូ)។
ពលរដ្ឋនៅក្នុងតំបន់នេះ សំណូមពរយ៉ាងទទូចដល់អាជ្ញាធរពាក់ព័ន្ធ មេត្តាជួយសិក្សា និងផ្តល់ជាស្ពានដែក ឬស្ពានបេតុងរឹងមាំ ដើម្បីបញ្ចប់ទុក្ខលំបាកដែលអូសបន្លាយច្រើនទសវត្សរ៍មកហើយ។ពាក់ព័ន្ធនឹងបញ្ហានេះ លោក សួង ហ៊ី អភិបាលស្រុកសៀមបូកបានទទួលស្គាល់ថា ផ្លូវកាត់អូរនេះ គឺជាសរសៃឈាមសេដ្ឋកិច្ចដ៏សំខាន់ដែលតភ្ជាប់ទំនាក់ទំនងរវាងភូមិ និងភូមិ រហូតទៅដល់ទីរួមខេត្ត ។
លោកបានកោតសរសើរចំពោះស្មារតីសាមគ្គីភាពរបស់ប្រជាពលរដ្ឋ ប៉ុន្តែបានបញ្ជាក់ថា គម្រោងសាងសង់ស្ពានស្តង់ដារនៅចំណុចនេះ ត្រូវការកញ្ចប់ថវិកាធំធេង ដែលលើសពីលទ្ធភាពរបស់រដ្ឋបាលឃុំ ។បច្ចុប្បន្ន អាជ្ញាធរស្រុកបានដាក់សំណើ និងសហការជាមួយមន្ទីរអភិវឌ្ឍន៍ជនបទរួចរាល់ហើយ ដើម្បីចុះសិក្សាស្វែងរកដំណោះស្រាយ តែរហូតមកទល់ពេលនេះ មិនទាន់ទទួលបានព័ត៌មានត្រឡប់មកវិញនៅឡើយ ។
គួររំលឹកផងដែរថា នៅក្នុងភូមិសាស្ត្រឃុំសៀមបូក មានអូរធំៗចំនួន៣ ដែលកំពុងរាំងស្ទះដល់ការធ្វើដំណើររបស់ពលរដ្ឋ រួមមាន៖ អូរឈ្លីក, អូររនាម, អូឡង់, អូរទាំងបីនេះ មិនទាន់មានស្ពានត្រឹមត្រូវឡើយ ដែលធ្វើឱ្យការដឹកជញ្ជូនផលដំណាំកសិកម្មរបស់ប្រជាកសិករមានការកកស្ទះ និងជួបការលំបាកខ្លាំងនៅរដូវវស្សា ។
ចែករំលែកព័តមាននេះ