បួងសួងនៅលើកំពូលភ្នំដោះក្រមុំសុំសេចក្តីសុខដល់វីរកងទ័ពជួរមុខ និងប្រជាពលរដ្ឋ
- មណ្ឌលគិរី
ខេត្តមណ្ឌលគិរី ៖ រដ្ឋបាលខេត្តមណ្ឌលគិរី បានរៀបចំពិធីបួងសួងសុំសេចក្តីសុខសន្តិភាព នៅបរិវេណមជ្ឈមណ្ឌលវប្បធម៌ភ្នំដោះក្រមុំ ដែលជាទីតាំងជំនឿដ៏សក្តិសិទ្ធិ និងជាទីគោរពសក្ការៈរបស់ប្រជាពលរដ្ឋ នៅក្រុងសែនមនោរម្យ នាព្រឹកថ្ងៃទី៣ ខែមិថុនា ឆ្នាំ២០២៦ ។
ពិធីនោះប្រារព្ឋឡើងក្រោមវត្តមានរបស់ឯកឧត្តមម៉ែន ង៉ុយ ប្រធានក្រុមប្រឹក្សាខេត្ដ និងឯកឧត្តមគង់ គឹមនី អភិបាលខេត្ដមណ្ឌលគិរី ។ មានការចូលរួមពីលោក-លោកស្រីអភិបាលរងខេត្ត ថ្នាក់ដឹកនាំមន្ទីរ-អង្គភាពជុំវិញខេត្ត មន្ត្រីរាជការស៊ីវិលគ្រប់លំដាប់ថ្នាក់ យុទ្ធជន-យុទ្ធនារី នៃកងកម្លាំងទាំងបីប្រភេទ ចាស់ព្រឹទ្ធាចារ្យ តំណាងជនជាតិដើមភាគតិច ព្រមទាំងប្រជាពលរដ្ឋយ៉ាងច្រើនកុះករ ។
ឯកឧត្តមគង់ គឹមនី អភិបាលខេត្តមណ្ឌលគិរី បានសម្តែងនូវការដឹងគុណយ៉ាងជ្រាលជ្រៅបំផុត និងស្ញប់ស្ញែងចំពោះភាពអង់អាចក្លាហាន និងកិច្ចខិតខំប្រឹងប្រែងរបស់វីរកងទ័ពជួរមុខទាំងអស់ ។ ឯកឧត្តមថ្លែងថា «បងប្អូនកងកម្លាំងប្រដាប់អាវុធនៅតាមព្រំដែន គឺជាខឿនការពារជាតិដ៏រឹងមាំ ដែលបានលះបង់ទាំងកម្លាំងកាយចិត្ត សេចក្តីសុខផ្ទាល់ខ្លួន និងក្រុមគ្រួសារ ឈរជើងយាមល្បាតទាំងយប់ទាំងថ្ងៃ ទោះជាត្រូវប្រឈមនឹងអាកាសធាតុប្រែប្រួល ឬការលំបាកយ៉ាងណាក៏ដោយ ដើម្បីការពារសន្តិសុខ សុវត្ថិភាព និងស្ថិរភាពជូនមាតុភូមិ និងប្រជាពលរដ្ឋនៅផ្ទៃក្នុងប្រទេសឱ្យរស់នៅដោយភាពសុខសាន្ត» ។
ចំពោះពិធីបួងសួងនោះ ឯកឧត្តមគង់ គឹមនី ចាត់ទុក គឺជានិមិត្តរូប និងជាការស្តែងចេញនូវការតាំងចិត្តយ៉ាងមុតមាំបំផុតរបស់រដ្ឋបាលខេត្ត ក្នុងការបន្តរក្សា និងថែរក្សាសុខសន្តិភាព ស្ថិរភាពនយោបាយ និងសណ្តាប់ធ្នាប់សង្គមជូនប្រជាពលរដ្ឋ ។ ការរួមគ្នារវាងសាសនា និងប្រពៃណីនាពេលនេះ មិនត្រឹមតែជាការគោរពតាមទំនៀមទម្លាប់ដ៏ថ្លៃថ្លារបស់ដូនតាយើងប៉ុណ្ណោះទេ ប៉ុន្តែវាបានក្លាយជាស្ពានចម្លងក្នុងការបង្កើនស្មារតីសាមគ្គីភាពធ្លុងមួយដ៏រឹងមាំ រវាងរដ្ឋបាលខេត្ត កងកម្លាំងប្រដាប់អាវុធ និងប្រជាពលរដ្ឋគ្រប់ជាតិសាសន៍ ដើម្បីឱ្យមហាគ្រួសារខ្មែររស់នៅប្រកបដោយសេចក្តីសុខរមនា ។
ថ្នាក់ដឹកនាំខេត្ត បានប្រសិទ្ធពរជ័យ ជូនចំពោះកងកម្លាំងប្រដាប់អាវុធ និងប្រជាពលរដ្ឋទាំងអស់ក្នុងខេត្តមណ្ឌលគិរី ឱ្យជួបតែសេចក្តីសុខចម្រើន និងទទួលបានជោគជ័យគ្រប់ភារកិច្ច ដើម្បីរួមចំណែកជាមួយរាជរដ្ឋាភិបាលក្នុងការអភិវឌ្ឍខេត្តឱ្យកាន់តែមានការរីកចម្រើនជឿនលឿនខ្លាំងក្លាថែមទៀត ៕
ចែករំលែកព័តមាននេះ