រាជធានីភ្នំពេញ ៖ កម្មករកម្មការិនីសិប្បកម្មកាត់ដេរសម្លៀកបំពាក់ខ្នាតតូចយីហោ «ឆេង យ័ន ខេមបូឌា
ព្រីនធ័រហ្គាម៉ិន» បាននាំគ្នាផ្អើលឈុល និងតវ៉ាទាមទាររកយុត្តិធម៌ និងសុំឱ្យថៅកែជនជាតិចិនគោរពច្បាប់ការងារ បន្ទាប់ពីថៅកែរូបនោះចេញសេចក្ដីប្រកាសយ៉ាងដាច់ណាត់មួយថា ចំពោះកម្មករណាម្នាក់ឈប់១ថ្ងៃត្រូវកាត់លុយស្មើនឹង១អាទិត្យ ។ ទោះបីជាមានច្បាប់ ឬគ្មានច្បាប់ក៏ដោយ គឺត្រូវតែកាត់លុយទាំងអស់ ម្យ៉ាងទៀតហាមមិនឱ្យនរណាម្នាក់តវ៉ានោះឡើយ ហើយចំពោះអ្នកដែលមិនពេញចិត្តសូមអញ្ជើញឈប់តែម្ដងទៅអត់ទ្រ អត់ខ្វល់ឡើយ។
ការតវ៉ានោះបានផ្ទុះឡើងកាលពីវេលាម៉ោង៥ល្ងាចថ្ងៃទី១៥ ខែសីហា ឆ្នាំ២០១៨ នៅមុខសិប្បកម្មកាត់ដេរមួយកន្លែងយីហោ «ឆេង យ័ន ខេមបូឌា ព្រីនធ័រ ហ្គាម៉ិន» មានទីតាំងស្ថិតនៅតាមផ្លូវលំ ក្នុងភូមិព្រៃព្រីងត្បូង២ សង្កាត់ចោមចៅ៣ ខណ្ឌពោធិ៍សែនជ័យ រាជធានីភ្នំពេញ។
តាមប្រភពព័ត៌មានបានឲ្យដឹងថា សិប្បកម្មកាត់ដេរខាងលើនោះមានកម្មករកម្មការិនីបម្រើការងារចំនួន៧៨នាក់ប៉ុណ្ណោះ ចំណែកអ្នកដែលប្រមូលផ្តុំគ្នាធ្វើការតវ៉ាមានចំនួនប្រមាណមិនដល់៥០នាក់ឡើយ ។
នៅមុនពេលកើតហេតុការណ៍កូដកម្មខាងលើនេះ ថៅកែបានប្រកាសប្រាប់កម្មករដោយមាត់ទទេ គ្មានក្រដាសស្នាមថា ចំពោះកម្មករកម្មការិនីណាដែលឈប់សម្រាក ទោះជាមានច្បាប់ក្ដី អត់ច្បាប់ក្ដីគឺត្រូវទទួលរងនូវការកាត់ប្រាក់ឈ្នួលទាំងអស់ ។ ប្រសិនបើឈប់១ថ្ងៃគឺត្រូវកាត់ប្រាក់ឈ្នួលស្មើនឹង១អាទិត្យ ហើយហាមតវ៉ាដាច់ខាត បើនរណាមិនពេញចិត្តទេ សូមអញ្ជើញឈប់តែម្ដងទៅ។
កម្មករបាននិយាយថា ចូលមកដល់ក្នុងខែសីហានេះ ថៅកែជនជាតិចិនខាងលើហាក់មានអាកប្បកិរិយា និងចរិតខុសប្លែកពីខែមុនៗច្រើនណាស់ ដោយសារតែដាក់កំហិតមិនឲ្យកម្មករឈប់ ។ ធម្មតាមនុស្សម្នាក់ៗមិនដែលថាសុទ្ធតែទៀងទាត់ ឬមិនមានធុរៈចាំបាច់ត្រូវសុំច្បាប់ឈប់សម្រាកនោះទេ គឺតែងតែមានហើយ បើថៅកែចេញបម្រាមបែបនេះគឺជាការរំលោភសិទ្ធិកម្មករខ្លាំងណាស់។
ប្រសិនបើពួកគេមានជំងឺសម្រាកច្រើនថ្ងៃនោះប្រាក់ឈ្នួលនឹងត្រូវថៅកែកាត់អស់មិនខាន ដូច្នេះហើយទើបគ្រាន់តែឮថៅកែប្រកាសភ្លាម ពួកគេក៏ផ្ទុះការតវ៉ាបែបនេះតែម្ដង។ ប៉ុន្តែនៅមិនទាន់មានដំណោះស្រាយនៅ
ឡើយ ចំណែកខាងអាជ្ញាធរខណ្ឌពោធិ៍សែនជ័យ និងសង្កាត់ចោមចៅ៣បានចុះទៅធ្វើការសម្របសម្រួលដែរ តែមិនមានដំណោះស្រាយឡើយ ហើយពួកគេនឹងបន្តការតវ៉ានៅថ្ងៃបន្ទាប់ទៀត៕
ចែករំលែកព័តមាននេះ