រឿងហេតុដែលប្រពន្ធចាក់ប្តី១០កាំបិតនៅមុខកូនប្រុសទាំងកំរោលនេះ…

ថ្ងៃទី ១៦ ខែ សីហា ឆ្នាំ ២០១៨
ម៉ោង ០៩:០០
ច័ន្ទ រស្មី

ខេត្តសៀមរាប ៖ មន្ត្រីនគរបាលប៉ុស្តិ៍សង្កាត់គោកចកមួយរូប បានត្រូវឃាតករតាមចាក់សម្លាប់ ខណៈកំពុងជិះម៉ូតូនៅសល់តែចម្ងាយប្រមាណ២០០ម៉ែត្រទៀតប៉ុណ្ណោះដល់ផ្ទះ ។ ឃាតករបានប្រើកូនកាំបិតចិតបន្លែចុងស្រួចចំនួន២ចាក់សម្លាប់ជាច្រើនកន្លែង ។

ហេតុការណ៍ចាក់សម្លាប់នេះ ភ្លាមៗ ត្រូវបានសង្ស័យថា ជាគំនុំដោយសារទាំងម៉ូតូនិងទ្រព្យសម្បត្តិជាប់ខ្លួននៅទាំងអស់់ ទើបមានការភ្ញាក់ផ្អើល នាវេលាព្រឹកព្រលឹមថ្ងៃទី១៥ សីហា នៅតាមផ្លូវក្រួសក្រហម ចម្ងាយពីផ្លូវជាតិប្រមាណ៤០០ម៉ែត្រ ស្ថិតក្នុងភូមិធ្លកអណ្តូង សង្កាត់ស្លក្រាម ក្រុងសៀមរាប ។ តាមការពិនិត្យរបស់សមត្ថកិច្ច គឺជនរងគ្រោះត្រូវឃាតករចាក់ចំពីមុខ៩កាំបិត និងខ្នង១កាំបិត ។

តាមសាក្សីនៅកន្លែងកើតហេតុឱ្យដឹងថា កាលពីយប់ខណៈពួកគាត់កំពុងសម្រាកនៅក្នុងផ្ទះ ស្រាប់តែឮសំឡេងម៉ូតូ និងឮសម្លេងឈ្លោះគ្នា ហើយមួយសន្ទុះ ក៏ស្ងាត់ឈឹងទៅ ។ បន្ទាប់ពីស្ងាត់សម្រែកមនុស្ស ពួកគាត់ក៏នាំគ្នាចេញមកក្រៅមើល ស្រាប់តែឃើញមនុស្សម្នាក់ស្លាប់នៅលើផ្លូវ គឺជាមន្ត្រីនគរបាលឈ្មោះ ហ៊ឹម វណ្ណរ៉ូ ដែលមានផ្ទះនៅចម្ងាយប្រហែល២០០ម៉ែត្រពីកន្លែងកើតហេតុ ។ នៅពេលឃើញបែបនេះ ពួកគាត់ក៏រាយការណ៍ទៅសមត្ថកិច្ច ហើយនគរបាលប៉ុស្តិ៍សង្កាត់ស្លក្រាម និងនគរបាលក្រុងនិងខេត្ត ក៏បានមកដល់កន្លែងកើតហេតុភ្លាមៗដែរ ។

ប្រភពពីមន្ត្រីនគរបាលមួយរូបឲ្យដឹងថា លោក ហ៊ឹម វណ្ណរ៉ូ អាយុ២៧ឆ្នាំ ឋានន្តរស័ក្តិព្រិន្ទបាលឯក ជាមន្ត្រីនគរបាលប៉ុស្តិ៍សង្កាត់គោកចក ក្រុងសៀមរាប និងមានទីលំនៅក្នុងភូមិធ្លកអណ្តូង សង្កាត់ស្លក្រាម ក្រុងសៀមរាប ។ នៅយប់ថ្ងៃ១៤ សីហា ជនរងគ្រោះបានជិះម៉ូតូទៅលេងផ្ទះបងធម៌ដូចសព្វដង នៅក្នុងកស្សិណអង្គរ ហើយធ្លាប់ដេកនៅទីនោះផងដែរ តែនៅយប់កើតហេតុ ដោយសារមិនត្រូវចំវេនប្រចាំ
ការ ជនរងគ្រោះក៏ជិះម៉ូតូមកផ្ទះទាំងយប់ តាមផ្លូវក្រាលក្រួសក្រហម ។ លុះជិតដល់ផ្ទះទៅហើយ ស្រាប់តែមានជនសង្ស័យ ដេញតាមចាក់សម្លាប់នាវេលារំលងអធ្រាត្រ ឈានចូលថ្ងៃទី១៥ សីហា ដោយប្រើកូន កាំបិតចុងស្រួចចំនួន២ និងបានបោះចោលក្បែរសព ។

ក្រោយពេលកើតហេតុ មន្ត្រីជំនាញបានចុះទៅពិនិត្យនិងធ្វើកោសល្យវិច័យ ហើយសន្និដា្ឋនថា ជនរងគ្រោះពិតជាត្រូវក្រុមឃាតករចាក់សម្លាប់ ដោយប្រើកូនកាំបិតមែន ហើយករណីនេះ ប្រហែលជារឿងគំនុំ ព្រោះទ្រព្យសម្បត្តិឃើញនៅទាំងអស់ មិនបានបាត់បង់ទេ ។ សពជនរងគ្រោះត្រូវបានសមត្ថកិច្ចប្រគល់ឱ្យក្រុមគ្រួសារយកទៅបូជានៅវត្តត្រាំនាគ ស្ថិតក្នុងភូមិធ្លកអណ្តូង សង្កាត់ស្លក្រាម ក្រុងសៀមរាប នាព្រឹកថ្ងៃដដែលនោះ ។ ចំណែកឃាតករ សមត្ថកិច្ចកំពុងធ្វើការស្រាវជ្រាវដើម្បីចាប់ខ្លួនយកមកផ្តន្ទាទោស ។

ព័ត៌មានច្បាស់ការណ៍ចុងក្រោយឱ្យដឹងថា ឃាតករដែលយកកាំបិតចិតបន្លែចាក់សម្លាប់មន្ត្រីប៉ូលិសប៉ុស្តិ៍គោកចកនោះ ត្រូវបានប៉ូលិសព្រហ្មទណ្ឌក្រុងចាប់ខ្លួនបានហើយ គឺជាប្រពន្ធរបស់ជនរងគ្រោះ ។ ចំពោះមូលហេតុ គឺដោយសាររឿងទំនាស់ផ្ទៃក្នុងគ្រួសារ និងប្រចណ្ឌថា «ប្តីមានស្រីថ្មី» ។ ហេតុការណ៍ឃាត់ខ្លួនស្ត្រីជនសង្ស័យនោះ បានធ្វើឡើងនៅវេលាម៉ោង០១ និង៣០នាទីរសៀលថ្ងៃទី១៥ សីហា ស្ថិតនៅក្នុងអធិការដ្ឋានក្រុង បន្ទាប់ពីនាំយកមកសាកសួរ ។

តាមលោកវរសេនីយ៍ទោ នួនសក្កិ ចំរើនរិទ្ធ អធិការរងទទួលផែនបទល្មើសព្រហ្មទណ្ឌក្រុងបានប្រាប់ថា បន្ទាប់ពីឃាតករបានចាក់សម្លាប់ជនរងគ្រោះរួចមក កម្លាំងជំនាញក៏បានស៊ើបសួរនៅជុំវិញកន្លែងកើតហេតុ ក៏ឈានទៅនាំខ្លួនស្ត្រី ដែលត្រូវជាប្រពន្ធជនរងគ្រោះតាំងពីវេលាម៉ោង៩ព្រឹក រហូតដល់ម៉ោង១រសៀលថ្ងៃទី១៥ សីហា មកកាន់អធិការក្រុង ដើម្បីសួរនាំ ទើបស្ត្រីរូបនេះបានសារភាព ។

លោកបានបន្តថា ស្ត្រីជនសង្ស័យជាប្រពន្ធឈ្មោះ សុខ លីនី អាយុ២៦ឆ្នាំ មុខរបរសំអាងការនៅផ្សារជ្រាវ មានស្រុកកំណើតនៅភូមិដើមចាន់ សង្កាត់ច្បារអំពៅ ខណ្ឌច្បារអំពៅ រាជធានីភ្នំពេញ បច្ចុប្បន្ន រស់នៅភូមិធ្លកអណ្តូង សង្កាត់ស្លក្រាម ក្រុងសៀមរាប មានកូនប្រុសម្នាក់ អាយុជាង៣ឆ្នាំនៅក្នុងបន្ទុក ។

តាមសម្តីសារភាពរបស់ស្ត្រីជនសង្ស័យបានប្រាប់សមត្ថកិច្ចថា មុនពេលកើតហេតុ រូបគាត់បានខលទៅប្តី ដើម្បីឱ្យមកជួយមើលកូន ព្រោះកូនក្អកធ្លាក់ឈាម ដល់ពេលគាត់ខលទៅ ស្រាប់តែប្តីរបស់គាត់បានប្រាប់ថា ឱ្យឌុបមកពេទ្យគន្ធបុប្ផាទៅ គាត់មកដល់ឥឡូវហើយ ។

លុះចាំបាត់ៗ ស្ត្រីជនសង្ស័យក៏យកកូនចេញពីពេទ្យមកឈរនៅចាំពីមុខពេទ្យ មួយសន្ទុះក្រោយមក ក៏ឃើញប្តីជិះម៉ូតូមកដល់ ក៏នាំគ្នាជិះទៅផ្ទះ ។ ស្ត្រីជនសង្ស័យជាប្រពន្ធបានរៀបរាប់បន្តថា ដល់ពេលឡើងជិះម៉ូតូមកផ្ទះ ក៏មានទំនាស់ពាក្យសម្តីតាមផ្លូវរហូត គ្រាន់តែគាត់ថា «បងជួយមកមើលកូនផង» ខណៈពេលនោះប្តីឌុបបណ្តើរ និយាយបណ្តើរថា «អញជាប់យាម» ។

ប៉ុន្តែប្រពន្ធចោទថា មកពីមានស្រីបានជាមិនគិតកូន-ប្រពន្ធ ។ និយាយបាន៤ទៅ៥ម៉ាត់ ជិះម៉ូតូមកជិតដល់ផ្ទះ ប្រពន្ធក៏ឱ្យប្តីឈប់ម៉ូតូឱ្យគាត់ចុះ ប៉ុន្តែជនរងគ្រោះជាប្តីមិនព្រមឈប់ បែរជាផ្តួលម៉ូតូធ្វើឱ្យធ្លាក់គាត់ជាប្រពន្ធនិងកូន តែត្រូវបានប្រពន្ធអោបកូនជាប់ ហើយជនរងគ្រោះ ស្រាប់តែដកកូនកាំបិតចិត្តបន្លែបំរុងចាក់ប្រពន្ធនិងកូន ។

ប្រពន្ធអះអាងថា គាត់គ្រវាសដៃប៉ះចំទ្រូងជនរងគ្រោះក៏ដួល ហើយជនរងគ្រោះបំរុងងើបឡើង ក៏ជនសង្ស័យចាក់បន្ថែមរហូតលែងដឹងខ្លួន ក៏នាំកូនរត់ទៅផ្ទះធ្វើព្រងើយ ។ ខណៈពេលនោះ ស្ត្រីជនសង្ស័យមិននឹកស្មានថា សមត្ថកិច្ចដឹងថាគាត់ជាអ្នកចាក់សម្លាប់ប្តីរបស់ខ្លួនសោះ ។ ក្រោយសួរនាំស្ត្រីជនសង្ស័យរួចមកសមត្ថកិច្ចក៏បានទៅផ្ទះ ដើម្បីឆែករកមើលក៏ឃើញវត្ថុតាងរួមមាន៖ ទូរស័ព្ទសរុបចំនួន៤គ្រឿង រួមជាមួយរបស់ជនរងគ្រោះ, កាំបិត២ដើមនៅកន្លែងកើតហេតុ, សម្លៀកបំពាក់២កំប្លេរ, សាំង១ដបទឹកសុទ្ធ, ស្បែកជើង២គូ ក្នុងនោះរបស់ជនរងគ្រោះ១គូ ។

បច្ចុប្បន្ន ជនសង្ស័យនិងវត្ថុតាង ត្រូវបានកម្លាំងជំនាញកំពុងរៀបចំកសាងសំណុំរឿងបញ្ជូនខ្លួនទៅតុលាការខេត្ត នៅថ្ងៃទី១៦ សីហា ដើម្បីចាត់ការទៅតាមផ្លូវច្បាប់ ។