ខេត្តបាត់ដំបង ៖ កិច្ចប្រជុំពិគ្រោះយោបល់ កែសម្រួលឯកសារប្រវត្តិសាស្ត្រ ប្រតិបត្តិការនយោបាយឈ្នះ.ឈ្នះ និងការបញ្ចប់សង្គ្រាមស៊ីវិលនៅកម្ពុជា របស់សម្តេចតេជោ ហ៊ុន សែន នៅទិសយោធភូមិភាគទី៥ ក្នុងឆ្នាំ(១៩៩៦ដល់១៩៩៨) វេលាព្រឹកថ្ងៃទី១៤ ខែសីហា ឆ្នាំ២០១៨ លោកឧត្តមសេនីយ៍ឯក ប៊ុន សេង មេបញ្ជាការរងកងទ័ពជើងគោក មេបញ្ជាការយោធភូមិភាគទី៥ បានបើកកិច្ចប្រជុំនៅទីបញ្ជាការយោធភូមិភាគទី៥ ទីក្រុងបាត់ដំបង។
ដើម្បីចូលរួមស្តាប់ ពិគ្រោះយោបល់រកការឯកភាពបំពេញបន្ថែម លើពង្រាងខ្លឹមសារប្រវត្តិសាស្ត្រ ប្រតិបត្តិការនយោបាយឈ្នះ.ឈ្នះ(១៩៩៦-១៩៩៨) របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នៅទិសយោធភូមិភាគទី៥ ចូលរួមចំណែក ជូនប្រទេសកម្ពុជាយើង ដែលធ្លាប់តែបែកបាក់ ហែកហួរដោយសង្គ្រាមផ្ទៃក្នុង អស់រយៈពេលជិត៣ ទសវត្ស(១៩៧០-១៩៩៨)កន្លងទៅ។
អង្គប្រជុំជារួមផ្តោតលើនយោបាយឈ្នះ.ឈ្នះ របស់សម្តេចតេជោ ហ៊ុន សែន ជាឱសថទិព្វបញ្ចប់បានដោយ ជោគជ័យសង្គ្រាមផ្ទៃក្នុងកម្ពុជា នាំមកនូវសុខសន្តិភាព ឯកភាពជាតិ ស្ថិរភាពសង្គម ទាំងស្រុង។ ហើយក្នុងនេះផងដែរ ក៏បានផ្លាស់នូវបរិយាកាសសង្គមបង្កឲ្យមានលទ្ធិប្រជាធិបតេយ្យសេរីពហុបក្ស នៅកម្ពុជា រហូតមកដល់ពេលបច្ចុប្បន្ននេះ ដើម្បីដាក់ជូនថ្នាក់លើពិនិត្យ និងសម្រេច យកជាផ្លូវការ តម្កល់ទុកក្នុងសារ:មន្ទីរជាតិ<វិមានឈ្នះ.ឈ្នះ> នៅរាជធានីភ្នំពេញ ដែលនឹងសម្ពោធជាផ្លូវការនៅថ្ងៃទី២៩ ខែធ្នូ ឆ្នាំ២០១៨ខាងមុខ។
លោកឧត្តមសេនីយ៍ឯកបានលើកឡើងថា នេះគឺជាលើកទី៥ ហើយសម្រាប់ការបើកកិច្ចប្រជុំពិគ្រោះយោបល់កែសម្រួលលើឯកសារមួយនេះ ដោយបានអញ្ជើញ ឯកឧត្តម អស់លោក ដែលជាអតីតប្រតិបត្តិករ (អតីតមេទ័ពខាងខ្មែរក្រហម អតីតខាងគណបក្សហ្វ៊ុនស៊ិនប៉ិច ស៊ឺនសាន។ល។) ចូលរួមអនុវត្តន៍ផ្ទាល់ តាមនយោបាយឈ្នះ.ឈ្នះ កន្លងមក តាមបណ្តាទិសអង្គភាព ដែលជានាយទាហាននៃកងយោពលខេមរភូមិន្ទ និងអតីតមេដឹកនាំខ្មែរក្រហមកម្ពុជាប្រជាធិបតេយ្យ រណសិរ្សតំបន់៩០៩សំឡូត ខេត្តបាត់ដំបង,តំបន់ស្រុកវាលវែងខេត្តពោធិសាត់, ៤១៥តំបន់ខេត្តប៉ៃលិន,២៥០,តំបន់ម៉ាឡៃខេត្តបន្ទាយមានជ័យ និងទិសទន្លេសាបក្នុងខេត្តបាត់ដំបង ព្រមទាំងមានការចូលរួមពីឯកឧត្តម អស់លោកមេបញ្ជាការរង សេនាធិការរង ក្រុមការងារស្រាវជ្រាវ ប្រវត្តិសាស្ត្រយោធារបស់យោធភូមិភាគទី៥ផងដែរ សរុបរួមចំនួន៤៨ រូប។
លោកឧត្តមសេនីយ៍ឯក ប៊ុន សេង បានបញ្ជាក់ទៀតថា ទិសយោធភូមិភាគទី៥ នេះគឺជាចំណែកមួយធំនៃការបញ្ចប់សង្គ្រាមពីភាគីទាំង៤ កាលពីសម័យមានសង្គ្រាមជាមួយគ្នាកន្លងមក ហើយយើងបានរួមរស់សុខទុក្ខ ថែររក្សាបានសុខសន្តិភាព ជាមួយគ្នារហូតមកដល់ថ្ងៃនេះ។ ក្នុងកិច្ចប្រជុំអតីត និងបច្ចុប្បន្នជាមេទ័ព ដែលមានលោក នី កន លោក ជាភួង ភិរម្យ លោក សុខ គង់ លោក អៀង ផាន លោក ឈឿន សារិទ្ធ លោក គុយ ច័ន្ទមុន្នី និងច្រើនរូបទៀតបានចូលរួមផ្តល់មតិយោបល់ ផ្ទៀងផ្ទាត់ កែសម្រួល បំពេញបន្ថែម យ៉ាងសស្រាក់សស្រាំពីសំណាក់សមាជិកនៃកិច្ចប្រជុំ ឈរលើការពិតជាក់ស្តែង និងទំនួលខុសត្រូវក្នុងន័យស្ថាបនា។
ពីព្រោះ នេះជាឯកសាររស់ ជាឯកសារប្រវត្តិសាស្ត្រពិត ដែលមានសម្តេចតេជោ ហ៊ុន សែន ជាស្ថាបនិក ដ៏ឧត្តុង្គឧត្តម ដែលមិនអាចកាត់ថ្លៃបាន នៅក្នុងប្រវត្តិសាស្ត្រសម័យថ្មី នៃប្រទេសកម្ពុជាយើង សម្រាប់យកទៅតម្កល់ទុកជូនប្រជាជាតិ ក៏ដូចជាសម្រាប់ឲ្យកូនចៅខ្មែរយើងជំនាន់ក្រោយៗ រៀនសូត្រ ដកបទពិសោធន៍ សិក្សាស្រាវជ្រាវ ស្វែងយល់ បន្តៗរាប់ជំនាន់ តទៅមុខទៀតយូរអង្វែងកាល និងដើម្បីចូលរួមក្នុងមហាបុព្វហេតុដ៏ពិសិដ្ឋបំផុត ការពារជាតិ បូរណភាពដែនដី ថែរក្សាការពារស្ថិរភាព សន្តិភាពសន្តិសុខសង្គម និងដើម្បីការអភិវឌ្ឍជាតិ ឈានឆ្ពោះទៅកាន់អារ្យប្រទេស ឲ្យបានឆាប់ៗនៅពេលខាងមុខទាន់បណ្តាប្រទេសជឿនលឿននានា នៅក្នុងតំបន់ក៏ដូចជានៅលើពិភពលោកផងដែរ៕
ចែករំលែកព័តមាននេះ