រាជធានីភ្នំពេញ ៖ បុរសម្នាក់បានប៉ើងរំលងសួនច្បារបោកក្បាលស្លាប់នៅនឹងកន្លែង ខណៈពេលដែល ជិះម៉ូតូសណ្តោងរ៉ឺម៉កមួយគ្រឿង ហើយត្រូវរថយន្តដឹកទំនិញមួយគ្រឿង បើកជ្រែមកបុកពីក្រោយ ពេញទំហឹង។ គ្រោះថ្នាក់ចរាចរណ៍ដ៏រន្ធត់នេះបានកើតឡើង កាលពីវេលាម៉ោងប្រមាណ៤រសៀល…
រាជធានីភ្នំពេញ ៖ បុរសម្នាក់បានប៉ើងរំលងសួនច្បារបោកក្បាលស្លាប់នៅនឹងកន្លែង ខណៈពេលដែល ជិះម៉ូតូសណ្តោងរ៉ឺម៉កមួយគ្រឿង ហើយត្រូវរថយន្តដឹកទំនិញមួយគ្រឿង បើកជ្រែមកបុកពីក្រោយ ពេញទំហឹង។ គ្រោះថ្នាក់ចរាចរណ៍ដ៏រន្ធត់នេះបានកើតឡើង កាលពីវេលាម៉ោងប្រមាណ៤រសៀល ថ្ងៃទី១៤ ខែសីហា នៅតាមផ្លូវជាតិលេខ៥ មុខវត្តជេដ្ឋាឧត្តម ហៅវត្តគ្រួស ក្នុងភូមិគ្រួស សង្កាត់សំរោង ខណ្ឌព្រែកព្នៅ។
ជនរងគ្រោះដែលបានស្លាប់នោះឈ្មោះ គង់ ពិសិដ្ឋ អាយុ៤២ឆ្នាំ មុខរបរ ទិញលក់ក្រដាស មានលំនៅផ្ទះលេខ១១៩ ផ្លូវជាតិលេខ៥ ក្នុងភូមិមិត្តភាព សង្កាត់ឫស្សីកែវ ខណ្ឌឫស្សីកែវ បានបោកក្បាលស្លាប់នៅកន្លែង។ រថយន្តបង្កគ្រោះថ្នាក់ម៉ាកគា ពណ៌ស ពាក់ស្លាកលេខ ភ្នំពេញ ២AU-៥៥១៣ ជារថយន្តដឹកទំនិញឃ្លុប បើកបរដោយបុរសម្នាក់គេចខ្លួនបាត់។ តាមព័ត៌មានឲ្យដឹងថា នៅមុនពេលកើតហេតុ ជនរងគ្រោះបានជិះម៉ូតូសណ្តោងរ៉ឺម៉កដឹកក្រដាស យកទៅលក់នៅឃុំព្រែតាទែន ស្រុកពញាឮ ខេត្តកណ្តាល។
នៅពេលត្រឡប់ មកវិញធ្វើដំណើរ ពីជើងទៅត្បូង ដល់ស្ពានគ្រួស ស្រាប់តែរថយន្តបង្កបានបើក មកពីក្រោយក្នុងទិសដៅស្របគ្នា ជែង គេឯងមកបុករ៉ឺម៉កជនរងគ្រោះពីក្រោយពេញទំហឹងតែម្តង។ តាមសាក្សីបានឲ្យដឹងទៀតថា នៅក្នុង គ្រោះថ្នាក់រថយន្ត បានបុកពេញទំហឹងបណ្តាលឲ្យរ៉ឺម៉កប៉ើងក្រឡាប់ជាច្រើនត្រឡប់ ហើយ ជនរងគ្រោះបានប៉ើងរំលងសួនច្បារខណ្ឌចែកផ្លូវជាតិលេខ៥ បោកក្បាលស្លាប់នៅនឹងកន្លែង។
ភ្លាមៗនោះ អ្នកបើកបររថយន្តបានចុះរត់គេចខ្លួនបាត់ស្រមោល។ សពត្រូវបានគ្រួសារនាំ យកទៅតម្កល់នៅវត្ត ទួលសន្តិវ័ន ហៅវត្តទួលអស់លោក ធ្វើបុណ្យតាមប្រពៃណី។ ចំណែករថយន្ត និងម៉ូតូ រ៉ឺម៉ក ត្រូវបាន នគរបាលបញ្ជូនទៅកាន់ការិយាល័យចរាចរណ៍ផ្លូវគោក ដើម្បីដោះស្រាយ។ គួរបញ្ជាក់ថា នៅចំណុច នោះជាកន្លែងជើងកប ដែលតែងតែកើតមានគ្រោះថ្នាក់ចរាចរណ៍ បណ្តាលឲ្យ មនុស្សជាច្រើននាក់បានស្លាប់ និងរងរបួស៕
https://youtu.be/IcYPCtu5j-o
ចែករំលែកព័តមាននេះ