រាជធានីភ្នំពេញ ៖ រដ្ឋមន្ត្រីក្រសួងទេសចរណ៍ លោក ថោង ខុន បានថ្លែងថា ក្នុងរយៈពេល៦ខែដើមឆ្នាំនេះ កម្ពុជាទទួលបានភ្ញៀវទេសចរអន្តរជាតិប្រមាណ៣លាននាក់ កើនឡើង១៣% ធៀបរយៈពេលដូចគ្នាកាលពីឆ្នាំមុន ។
លោករដ្ឋមន្ត្រីបានមានប្រសាសន៍បែបនេះ ក្នុងពិធីបើកការដ្ឋានសាងសង់កំពង់ផែទេសចរណ៍អន្តរជាតិក្នុងខេត្តកំពត កាលពីថ្ងៃទី៨ សីហា កន្លងមក ។
លោករដ្ឋមន្ត្រីបញ្ជាក់ថា ៖« រយៈពេល៦ខែដើមឆ្នាំ២០១៨នេះ កម្ពុជាទទួលបានភ្ញៀវទេសចរអន្តរជាតិប្រមាណ៣លាននាក់ កើនឡើង១៣% ហើយជាការរំពឹងទុកពេញមួយឆ្នាំ២០១៨ កម្ពុជានឹងទទួលបានទេសចរ៦,២លាននាក់ ។ ក្នុងនោះ កំណើនទេសចរចិនរំពឹងនឹងកើនឡើងជាង២លាននាក់នៅឆ្នាំ២០២០ ខណៈគោលដៅកម្ពុជា គ្រោងនឹងទទួលបានភ្ញៀវទេសចរចិន ត្រឹម២លាននាក់ប៉ុណ្ណោះ » ។
លោកបន្ដថា កម្ពុជាមានសុខសន្តិភាពពេញលេញ មានការអភិវឌ្ឍ និងរីកចម្រើនលើគ្រប់វិស័យ ក្នុងនោះវិស័យទេសចរណ៍ដែលជា «ទេសចរណ៍វប្បធម៌ និងធម្មជាតិ» ត្រូវបានរាជរដ្ឋាភិបាលកម្ពុជាចាត់ទុកជា «មាសបៃតង» បានរួមចំណែកយ៉ាងសកម្មក្នុងការអភិវឌ្ឍសេដ្ឋកិច្ច-សង្គម បង្កើតឱកាសមុខរបរ និងបង្កើនឱកាសការងារ បង្កើនប្រាក់ចំណូល លើកកម្ពស់ជីវភាពរស់នៅរបស់ពលរដ្ឋ រួមចំណែកយ៉ាងសកម្មក្នុងការអភិរក្សបេតិកភណ្ឌវប្បធម៌ និងធនធានធម្មជាតិ ជាពិសេស រួមចំណែកកាត់បន្ថយភាពក្រីក្ររបស់ប្រជាពលរដ្ឋសហគមន៍មូលដ្ឋាន ។
លោកបន្តថា ៖« កំណើនភ្ញៀវទេសចរបានផ្តល់កាលានុវត្តភាពយ៉ាងសំខាន់ក្នុងការជំរុញកំណើនសេដ្ឋកិច្ចជាតិ ដោយវិស័យនេះបានរួមចំណែកក្នុងផលទុនជាតិសរុប១១,៨% កាលពីឆ្នាំមុន » ។
តាមការព្យាករ នៅឆ្នាំ២០២០ កម្ពុជានឹងទទួលភ្ញៀវទេសចរអន្តរជាតិ៧លាននាក់ ជាមួយនឹងចំណូលប្រមាណជាង៥ពាន់លានដុល្លារ និងបង្កើតការងារដោយផ្ទាល់ប្រមាណ១លាននាក់ និងការងារដោយប្រយោលរាប់លាននាក់បន្ថែមទៀត ។
ទីប្រឹក្សាសមាគមទីភ្នាក់ងារទេសចរណ៍កម្ពុជាលោក ហូ វណ្ឌី បានបដិសេធមិនអត្ថាធិប្បាយទាក់ទងនឹងកំណើននេះទេ ប៉ុន្តែលោកបានមានប្រសាសន៍ថា ចំនួនភ្ញៀវទេសចរដែលយើងទទួលបាន នឹងកំណត់ ឬអាចជឿជាក់បាននៅពេលដំណាច់ឆ្នាំនេះ ខណៈនិន្នាការភ្ញៀវទេសចរចិនឆ្នាំនេះ កើនឡើងរហូតដល់៧៨% ធៀបរយៈពេលដូចគ្នាកាលពីឆ្នាំមុន ប៉ុន្តែភ្ញៀវមកពីតាមបណ្តាប្រទេសក្នុងតំបន់អាស៊ាន និងភ្ញៀវទេសចរមកពីតំបន់អឺរ៉ុបបានថយចុះ ។ លោកបន្តថា ៖« ទោះជាយ៉ាងណា យើងរីករាយនឹងកំណើនភ្ញៀវដែលកម្ពុជាទទួលបាន ពិសេសភ្ញៀវទេសចរចិន តាមរយៈកំណើននៃការតភ្ជាប់ផ្នែកអាកាសចរណ៍ » ។
ប្រធានសមាគមទីភ្នាក់ងារទេសចរណ៍កម្ពុជា លោកស្រី ឆាយ ស៊ីវលីន បានឲ្យដឹងថា ការកើនឡើងនូវចំនួនភ្ញៀវទេសចរ គឺឆ្លុះបញ្ចាំងពីទំនុកចិត្ត ដោយសារកត្តាសុខសន្តិភាព និងស្ថិរភាពនយោបាយដែលកម្ពុជាសម្រេចបាន ។ លោកស្រីបន្តថា ៖« យើងនៅតែមានសុទិដ្ឋិនិយមចំពោះទីផ្សារនេះ ហើយយើងឃើញទីផ្សារកម្ពុជានៅតែមានភាពទាក់ទាញ » ។
ជាមួយគ្នានោះដែរ ប្រធានសមាគមទេសចរណ៍អាស៊ីប៉ាស៊ីហ្វិក លោក ធួន ស៊ីណាន បានមានប្រសាសន៍ដែរថា ភ្ញៀវទេសចរមកពីបណ្តាប្រទេសក្នុងតំបន់នៅតែបន្តកើនឡើងល្អប្រសើរ បើទោះជាភ្ញៀវមកពីអាមេរិក និងអឺរ៉ុបមួយចំនួនមានសញ្ញាទ្រឹងក្តី ឬថយចុះតិចតួចក្ដី ប៉ុន្តែជារួម គឺលំហូរភ្ញៀវអន្តរជាតិនៅតែបន្តកើនឡើង ។ លោកបន្តថា ៖« អ្វីដែលកាន់តែគួរឲ្យចាប់អារម្មណ៍ គឺភ្ញៀវអន្តរជាតិហាក់មិនបានសួរនាំពីស្ថានភាពនៅកម្ពុជាច្រើនទេ មានន័យថា ពួកគេជឿជាក់លើស្ថិរភាព និងសុខសន្តិភាពរបស់កម្ពុជា » ៕
ចែករំលែកព័តមាននេះ