ទ្រឹស្តីព្រះពុទ្ធសាសនាបានពន្យល់ បង្ហាត់ បង្ហាញច្រើនណាស់អំពីអហិង្សា រហូតដល់អ្នកប្រាជ្ញក្នុងពិភពលោកឱ្យនាមថាជាសាសនាសន្តិភាព សាសនានិយមសេចក្តីស្ងប់ សាសនាសាន្តត្រាណ សាសនានិព្វាន…ជាសាសនាដែលមិននិយមប្រើហិង្សាឡើយ។ គេមិនដែលឃើញសង្គ្រាមកើតឡើង ព្រោះតែក្នុងនាមពុទ្ធសាសនាទេ។
សេចក្តីនេះក៏មានបញ្ជាក់នៅក្នុងគម្ពីរធម្មបទដ្ឋកថាត្រង់ចំណុចដែលព្រះអង្គសម្តែងអំពីរឿងការចរចាយ៉ាងពិសេសដែលមនុស្សធម្មតាមិនអាចធ្វើបាន ខណៈ ដែលព្រះអង្គទៅចរចាជាមួយក្រុមញាតិដែលគិតធ្វើសង្គ្រាមនឹងគ្នា ព្រោះតែរឿងចែកទឹកធ្វើស្រែមិនត្រូវគ្នា ដោយព្រះអង្គទ្រង់ឈរនៅចំកណ្តាលញាតិទាំងពីរពួក ហើយអប់រំ បង្ហាញពីទោសនៃការប្រើហិង្សា បង្ហាញពីផលនៃអហិង្សា រួមនឹងតម្លៃនៃមនុស្សជាតិដូចជាត្រង់ឃ្លាថា តម្លៃទឹកដែលអ្នកទាំងឡាយកំពុងឈ្លោះដណ្តើមគ្នានេះ និងតម្លៃក្សត្រ មួយណាថ្លៃជាងជាដើម រហូតដល់មនុស្សទាំងពីរពួកស្តាប់បាន បោះអាវុធចោល ហើយក៏ឈប់ធ្វើសង្គ្រាម បំបែកគ្នាចេញអស់ទៅ ។
ទាក់ទងនឹងរឿងនេះដែរព្រះអង្គបានទូន្មានដល់ភិក្ខុទាំងឡាយថា បើមានគេត្មះតិះដៀលព្រះពុទ្ធ ព្រះធម៌ ព្រះសង្ឃ ភិក្ខុមិនគប្បីក្រោធខឹងតបតអ្វីទេ តែគួរពន្យល់ដោះស្រាយបង្ហាញឱ្យឃើញការពិត ឱ្យគេទទួលស្គាល់ការពិតដើម្បីរម្ងាប់ពាក្យចចាមអារ៉ាម ។
ព្រះបរមសាស្តាក៏បានសម្តែងពីការឈ្នះចាញ់ ដោយការឱ្យឈ្នះ បើគេក្រោធដោយការមិនក្រោធតបតវិញទេ ឬពៀររមែងរម្ងាប់ដោយការមិនចងពៀរជាដើម។ ទាំងអស់នេះសុទ្ធតែជាទ្រឹស្តីដែលនាំឱ្យបានសុខ សន្តិភាពនៅក្នុងសង្គមមនុស្ស ដែលលោកបញ្ជាក់ថា អហិង្សាជាគំនិតចម្បងនៅក្នុងទ្រឹស្តីព្រះពុទ្ធសាសនា ។
ចែករំលែកព័តមាននេះ