ខេត្តរតនគិរី ៖ សង្ស័យជារឿងគំនុំ ដែលជនមិនស្គាល់មុខបានលួចកាត់ដើមស្វាយចន្ទីអស់ប្រមាណ១២០ដើម កាលវេលារំលងអធ្រាត្រឈានចូលថ្ងៃទី៥ ខែសីហា នៅក្នុងភូមិសាយ៉សលើ ឃុំកាឡែង ស្រុកលំផាត់។
បើតាមរបាយការណ៍របស់នគរបាលប៉ុស្តិ៍ឃុំកាឡែងបានឱ្យដឹងថា ម្ចាស់ចម្ការស្វាយចន្ទីនេះ ឈ្មោះ អ៊ូន
យ៉េង ភេទប្រុស អាយុ៤២ឆ្នាំ ជាកសិករ រស់នៅក្នុងភូមិ ឃុំខាងលើ ប៉ុន្តែមិនបានស្នាក់នៅចម្ការទេ ព្រោះមានផ្ទះមួយទៀត នៅចម្ងាយពីចម្ការជាង១គីឡូម៉ែត្រ ដោយទុកឱ្យកម្មករចៀរជ័រកៅស៊ូ៥ទៅ៦នាក់នៅចាំចម្ការ ។
បើតាមម្ចាស់ចម្ការបានឱ្យសមត្ថកិច្ចដឹងថា ដីចម្ការរបស់គាត់ទាំងអស់មានជាង១០ហិកតា ដាំស្វាយចន្ទីជាង៥ហិកតា កំពុងទទួលផលបេះផ្លែលក់ជារៀងរាល់ឆ្នាំ ស្រាប់តែនៅយប់កើតហេតុនោះ មានជនខិលខូចលួចកាត់បំផ្លាញអស់១២០ដើម ។
បើតាមការស៊ើបអង្កេតរបស់នគរបាលប៉ុស្តិ៍ឃុំកាឡែងឱ្យដឹងថា ជនខិលខូចបានយកម៉ាស៊ីនត្រង់សឺន័រខ្នាតតូចសំឡេងម៉ាស៊ីនឮតិចៗ គួបផ្សំនៅរដូវវស្សាមានភ្លៀងធ្លាក់ខ្លាំង ជារៀងរាល់យប់ផង ទើបមិនឮសំឡេងដល់កម្មករដែលដេកចាំចម្ការ ហើយជនខិលខូចមានឱកាសកាត់បំផ្លាញ ។ ម្ចាស់ចម្ការនិយាយថា ដើមស្វាយចន្ទីរបស់គាត់មានអាយុជាង១០ឆ្នាំហើយ ក្នុង១ហិកតាទទួលផលលក់ផ្លែបានលុយ៣ទៅ៤ពាន់ដុល្លារ ។
ម្ចាស់ចម្ការបានត្អូញត្អែរថា គាត់មានការសោកស្ដាយដើមស្វាយចន្ទីគាត់យ៉ាងខ្លាំង ហើយពេលនេះសមត្ថកិច្ចកំពុងស្រាវជ្រាវរកមុខសញ្ញាជនខិលខូចចាប់ឱ្យខាងតែបាន ដើម្បីនាំយកមកផ្តន្ទាទោសតាមផ្លូវច្បាប់ ។ សមត្ថកិច្ចសនិ្នដ្ឋានថា រឿងជនខិលខូចលួចកាប់ដើមស្វាយចន្ទីនេះអាចជារឿងគំនុំ ៕
ចែករំលែកព័តមាននេះ