រាជធានីភ្នំពេញ ៖ ការរីកចម្រើននៃសេដ្ឋកិច្ចកម្ពុជា និងបរិយាកាសវិនិយោគកាន់តែប្រសើរ បានទាក់ទាញវិនិយោគិនជាតិ និងអន្តរជាតិមកបណ្តាក់ទុនលើវិស័យឧស្សាហកម្មយ៉ាងច្រើន ។ ជាក់ស្ដែង គិតត្រឹមខែមិថុនា ឆ្នាំ២០១៨នេះ…
រាជធានីភ្នំពេញ ៖ ការរីកចម្រើននៃសេដ្ឋកិច្ចកម្ពុជា និងបរិយាកាសវិនិយោគកាន់តែប្រសើរ បានទាក់ទាញវិនិយោគិនជាតិ និងអន្តរជាតិមកបណ្តាក់ទុនលើវិស័យឧស្សាហកម្មយ៉ាងច្រើន ។ ជាក់ស្ដែង គិតត្រឹមខែមិថុនា ឆ្នាំ២០១៨នេះ កម្ពុជាមានរោងចក្របើកថ្មីចំនួន៧៤ ដែលធ្វើឲ្យកម្ពុជាមានរោងចក្រកើនដល់ជិត១.៦០០ និងកំពុងស្រូបយកកម្លាំងពលកម្មជាង១លាននាក់ ។ នេះបើតាមអគ្គនាយករងឧស្សាហកម្ម នៃក្រសួងឧស្សាហកម្ម និងសិប្បកម្ម បានឲ្យដឹងនាព្រឹកថ្ងៃទី៣ សីហា កន្លងមក ។
លោក ហ៊ត ផេង អគ្គនាយករងរូបនេះបានបន្ដថា ការចុះបញ្ជីឧស្សាហកម្ម គិតពីដើមខែមករា មកដល់ខែមិថុនា ឆ្នាំ២០១៨ នៅកម្ពុជាមានរោងចក្របង្កើតថ្មីចំនួន៧៤ ដែលធ្វើឲ្យកម្ពុជាមានរោងចក្រសរុបទាំងអស់ជិត១.៦០០ ខណៈដែលឆ្នាំ២០១៣ មានរោងចក្រត្រឹមតែ១.១០៨ ប៉ុណ្ណោះ ។ លោកបន្តថា ៖« ការកើនឡើងរោងចក្រពីមួយឆ្នាំទៅមួយឆ្នាំ បានធ្វើឲ្យវិស័យនេះកំពុងមានសក្តានុពលស្រូបយកកម្លាំងពលកម្មយ៉ាងខ្លាំង ។ ជាក់ស្តែង គិតមកដល់ខែមិថុនា ឆ្នាំ២០១៨នេះ វិស័យឧស្សាហកម្មកាត់ដេរ និងស្បែកជើង មានកម្លាំងអតិពលកម្មសរុបជាង៨០ម៉ឺននាក់ » ។
លោកបន្តថា ៖« បើបូករួមជាមួយផ្នែកផ្សេងទៀត កម្ពុជាមានកម្លាំងពលកម្មសរុបជាង១លាននាក់ ខណៈនៅក្នុងឆ្នាំ២០១៣ កម្លាំងពលកម្មបម្រើក្នុងវិស័យការងារមានត្រឹមជាង៦០ម៉ឺននាក់ប៉ុណ្ណោះ » ។
វិស័យឧស្សាហកម្មកម្ពុជាកាន់តែធ្វើពិពិធកម្ម ដោយសារការដាក់ចេញនូវគោលនយោបាយអភិវឌ្ឍន៍វិស័យឧស្សាហកម្មឆ្នាំ២០១៥-២០២៥ របស់រាជរដ្ឋាភិបាល ដើម្បីប្រែក្លាយកម្ពុជាជាប្រទេសឧស្សាហកម្ម ដែលអាចបង្កើតនិងទាញយកតម្លៃបន្ថែមបានកាន់តែច្រើន ដោយផ្លាស់ប្តូរទីផ្សារការងារពីអតិពលកម្ម ទៅជាការងារប្រើប្រាស់កម្លាំងជំនាញ ដែលទាញយកតម្លៃបន្ថែមកាន់តែច្រើន ។
លោកបណ្ឌិត ម៉ី កល្យាណ ទីប្រឹក្សាជាន់ខ្ពស់ឧត្តមប្រឹក្សាសេដ្ឋកិច្ចជាតិ បានថ្លែងថា វិស័យឧស្សាហកម្មកម្ពុជាកំពុងរីកចម្រើន តាមរយៈការធ្វើពិពិធកម្មផលិតផលនាំចេញបានកាន់តែច្រើន ប៉ុន្តែវិស័យវាយនភ័ណ្ឌកាត់ដេរ និងស្បែកជើង នៅតែជាមូលដ្ឋានសំខាន់សម្រាប់ទ្រទ្រង់សេដ្ឋកិច្ចជាតិ ហើយក៏ជាមូលដ្ឋានឬជាជន្ទល់សំខាន់មួយ ដើម្បីឲ្យកម្ពុជាឈានឡើងទៅកាន់កម្រិតថ្មីមួយ ។ លោកបន្តថា ៖« ទាំងអ្នកជំនាញ និងរដ្ឋាភិបាលនៅតែមើលឃើញឧស្សាហកម្មកាត់ដេរមានភាពសំខាន់ ដែលត្រូវថ្នាក់ថ្នម ។ ហេតុនេះ ទើបរាជរដ្ឋាភិបាលកំពុងរៀបចំគោលនយោបាយអភិវឌ្ឍន៍វិស័យវាយនភ័ណ្ឌ ដើម្បីធ្វើយ៉ាងណា ឲ្យកម្មករ និយោជិត និយោជក និងភាគីពាក់ព័ន្ធ អាចធ្វើការជាមួយគ្នាប្រកបដោយភាពសុខដុម » ៕
ចែករំលែកព័តមាននេះ