រាជធានីភ្នំពេញ ៖ មន្ត្រីជំនាញក្រសួងសាធារណការ និងដឹកជញ្ជូន បានឲ្យដឹងថា ស្ពានមិត្តភាពកម្ពុជា-ជប៉ុន ជ្រោយចង្វា បាននិងកំពុងជួសជុល និងសាងសង់ឡើងវិញលឿនជាងផែនការ ដែលនឹងបញ្ចប់នៅមុនពិធីបុណ្យចូលឆ្នាំប្រពៃណីជាតិខ្មែរខាងមុខនេះ…
រាជធានីភ្នំពេញ ៖ មន្ត្រីជំនាញក្រសួងសាធារណការ និងដឹកជញ្ជូន បានឲ្យដឹងថា ស្ពានមិត្តភាពកម្ពុជា-ជប៉ុន ជ្រោយចង្វា បាននិងកំពុងជួសជុល និងសាងសង់ឡើងវិញលឿនជាងផែនការ ដែលនឹងបញ្ចប់នៅមុនពិធីបុណ្យចូលឆ្នាំប្រពៃណីជាតិខ្មែរខាងមុខនេះ ។
លោក ឈឹម ផល្លា ប្រធាននាយកដ្ឋានផ្លូវថ្នល់នៃក្រសួងសាធារណការ និងដឹកជញ្ជូន ទទួលបន្ទុកគម្រោងជប៉ុន បានមានប្រសាសន៍តាមទូរស័ព្ទនាព្រឹកថ្ងៃទី៣ សីហា ថា រហូតមកទល់ពេលនេះ ការជួសជុល និងសាងសង់ស្ពាននេះឡើងវិញ សម្រេចបានជិត៥០%ហើយ ។
លោកបន្ដថា ការស្ថាបនា និងជួសជុលឡើងវិញនេះ ធ្វើបានលឿនជាងផែនការគ្រោងទុក ដែលអាចនឹងបញ្ចប់នៅមុនចូលឆ្នាំខ្មែរ ប៉ុន្តែការដាក់ឲ្យដំណើរការមិនទាន់ប្រាកដនោះទេ ព្រោះក្រោយជួសជុលចប់ អាចនឹងទុកមួយរយៈមុនពេលដាក់ឲ្យដំណើរ ការ ដោយសារលក្ខខណ្ឌសុវត្ថិភាព ។
លោកបន្តថា ៖« ស្ពាននេះត្រូវសាងសង់ថ្មីនៅគល់ស្ពានទាំងសងខាង ប៉ុន្តែចំណុចកណ្តាលស្ពាននៅមានភាពល្អ និងជាប់មាំ ។ ហេតុនេះ ក្រុមការងារជប៉ុនមិនសាងសង់ឡើងវិញទេ គ្រាន់តែជួសជុលឡើងវិញតាមលក្ខខណ្ឌបច្ចេកទេសពិសេស » ។
លោកបន្តថា ៖« ការសាងសង់ស្ពានឡើងវិញនេះ ជាជំនួយឥតសំណងរបស់រដ្ឋាភិបាលជប៉ុន ដែលចំណាយទឹកប្រាក់៣០លានដុល្លារអាមេរិក » ។
សូមបញ្ជាក់ថា គម្រោងជួសជុលកែលម្អស្ពានជ្រោយចង្វានេះ នឹងប្រើរយៈពេលជាង២២ខែឬ២ឆ្នាំ ដែលមានបណ្តោយប្រវែង៧០៩ម៉ែត្រ បានកសាងឡើងនៅសម័យសង្គមរាស្ត្រនិយមក្នុងឆ្នាំ១៩៦៦ ក្រោយមក ត្រូវបានកាត់ផ្តាច់នៅឆ្នាំ១៩៧២ ដោយសារការដាក់បង្កៃគ្រាប់មីននៅក្នុងរថយន្ត បន្ទាប់មកទៀត បានជួសជុលឡើងវិញ និងសម្ពោធដាក់ឲ្យប្រើប្រាស់នៅថ្ងៃទី២៦ ខែកុម្ភៈ ឆ្នាំ១៩៩៤ ក្រោមជំនួយឥតសំណងរបស់រដ្ឋាភិបាលជប៉ុន រហូតមកដល់ពេលនេះ ៕
ចែករំលែកព័តមាននេះ