ខេត្ដប៉ៃលិន ៖ តាមសេចក្តីរាយការណ៍បានឱ្យដឹងថា យុវជនម្នាក់បានរងរបួសធ្ងន់ ហើយត្រូវគេបញ្ជូនទៅសង្គ្រោះនៅមន្ទីរពេទ្យបង្អែកខេត្តទាំងយប់ ខណៈជិះម៉ូតូដើរលេងជាមួយមិត្តភក្តិ ស្រាប់តែមានជនសង្ស័យ១ក្រុមហៅឱ្យឈប់ រួចក៏ស្ទុះយកដែកឆាបទៅចាក់ចំ.ពោះ បណ្តាលឱ្យរងរបួសធ្ងន់តែម្តង ។
ហេតុការណ៍អំពើហិង្សាខាងលើនេះបានកើតឡើងកាលពីវេលាម៉ោង៨និង៤០នាទីយប់ថ្ងៃថ្ងៃទី១ ខែសីហា ឆ្នាំ២០១៨ ស្ថិតនៅចំណុចក្នុងសាលាឆទានមួយ នៅក្នុងភូមិសួនអំពៅកើត សង្កាត់ប៉ៃលិន ក្រុងប៉ៃលិន ខេត្តប៉ៃលិន ។
ប្រភពព័ត៌មានបានឱ្យដឹងថា ជនរងគ្រោះឈ្មោះ ដូត ចំរើន ភេទប្រុស អាយុ១៨ឆ្នាំ ជាកសិករ មានទីលំនៅបច្ចុប្បន្នក្នុងភូមិបរតាំងស៊ូ សង្កាត់បរយ៉ាខា ក្រុងប៉ៃលិន ខេត្តប៉ៃលិន ។ ចំណែកជនសង្ស័យមានគ្នា៣នាក់ ក្នុងនោះប្រុស២នាក់ និងស្រីម្នាក់ តែមិនទាន់ស្គាល់អត្តសញ្ញាណនៅឡើយទេ ។
បើតាមលោក យ៉ែម សារិទ្ធិ អធិការនគរបាលក្រុងប៉ៃលិន បានឱ្យដឹងថា រហូតមកដល់ពេលនេះកម្លាំងនគរបាលកំពុងតាមដានករណីប្រើអំពើហិង្សាចាក់ប្រហារនេះ មិនទាន់ដឹងថា មកពីមូលហេតុអ្វីនោះទេ
ខណៈជនរងគ្រោះជិះម៉ូតូសុខៗ ស្រាប់តែហៅឱ្យឈប់រួចស្ទុះយកដែកឆាបមកចាក់ត្រូវចំ.ពោះ បណ្តាលឱ្យជនរងគ្រោះរងរបួសធ្ងន់ ។ ក្រោយពេលបង្កហេតុ ជនសង្ស័យប្រុសស្រីទាំងនោះបាននាំគ្នារត់គេចខ្លួនបាត់ស្រមោល ដោយសង្ស័យថា ពួកគេទាំងនោះអាចជាអ្នករស់នៅក្នុងទឹកដីខេត្តប៉ៃលិននេះដែរ ។ ភ្លាមៗនោះ ជនរងគ្រោះត្រូវបានមិត្តភ្តិរួមដំណើរដឹកតាមម៉ូតូបញ្ជូនទៅសង្គ្រោះនៅមន្ទីរពេទ្យបង្អែកខេត្តប៉ៃលិន ។
ក្នុងករណីខាងលើនេះ នគរបាលកំពុងដុតដៃដុតជើងតាមស៊ើបអង្កេត ដើម្បីចាប់ខ្លួនក្រុមជនសង្ស័យទាំងនោះយកមកផ្តន្ទាទោសតាមច្បាប់ ៕
ចែករំលែកព័តមាននេះ