រាជធានីភ្នំពេញ ៖ លោកយាយវ័យចំណាស់ម្នាក់ទឹកភ្នែកហូររហាមកាលពីរសៀលថ្ងៃទី៣១ កក្កដា បានមកដល់ស្នាក់ការកណ្តាល កោះសន្តិភាព លើកដៃសំពះអង្វរសុំឲ្យជួយចុះផ្សាយនូវរឿងរ៉ាវរបស់លោកយាយ ត្រូវបានកូនស្រីបង្កើតប្រើដំបងវាយរយះក្បាល និង យកប្រាក់អស់ចំនួន៥៥០០ដុល្លារអាមេរិក លោកយាយទទួចសុំឲ្យស្ថាប័នតុលាការជួយពន្លឿនលើការកាត់ក្តីសំណុំរឿងគាត់ឲ្យបានឆាប់ដើម្បីបានភាពយុត្តិធម៌ពីកូនស្រីមកវិញ ។
នៅចំពោះមុខអ្នកយកព័ត៌មាន កោះសន្តិភាព លោកយាយឈ្មោះ ហ៊ូ សុខុម អាយុ៧៤ឆ្នាំ បានលើកដៃសំពះក្នុងដំណក់ទឹកភ្នែកស្រែករកយុត្តិធម៌ ។ ពាក្យបណ្តឹងលោកយាយ ហ៊ូ សុខុម បានសំណូមពរសុំឲ្យសមត្ថកិច្ចចាប់ខ្លួនកូនស្រីដែលប្រើអំពើហិង្សាវាយម្តាយរយះក្បាលនាំទៅតុលាការដើម្បីផ្តន្ទាទោសតាមផ្លូវច្បាប់ និងទាមទារមកវិញនូវទឹកប្រាក់៥៥០០ ដុល្លារអាមេរិក ព្រមទាំងសងថ្លៃការព្យាបាលរបួសស្នាម៥លានរៀល ។ ប៉ុន្តែពាក្យបណ្តឹងរហូតមកដល់ពេលនេះមានរយៈពេល៩ខែហើយ តុលាការនៅមិនទាន់បានលើកយកមកបើកសវនាការជំនុំជម្រះក្តីដើម្បីរកយុត្តិធម៌ជូនលោកយាយទេ ។
លោកយាយមក កោះសន្តិភាព ពេលនេះសុំឲ្យតុលាការពន្លឿននៃការកាត់ក្តីដើម្បីឲ្យគាត់បានឃើញភាពយុត្តិធម៌មកវិញទាន់គាត់នៅរស់រានមានជីវិត ព្រោះពេលនេះវ័យកាន់តែជរាហើយ ។ សម្តីចុងក្រោយលោកយាយបានពោលថា បើតុលាការមិនជួយរកយុត្តិធម៌ជូនគាត់ទេ គាត់ក៏មិនអាចនៅរស់បានតទៅទៀតដែរ មូលហេតុគ្មានប្រាក់ទិញអាហារ ថ្នាំសង្កូវ សម្រាប់ជំងឺប្រចាំកាយ ដូច្នោះលោកយាយបានសម្រេចចិត្តរួចគឺជ្រើសរើសរកវិធីធ្វើអត្តឃាតសម្លាប់ខ្លួនមិនចាំបាច់ដល់អាយុទាន់ ។
លោកយាយហូរទឹកភ្នែកលើកដៃសំពះទទួចហើយទទួចទៀតសុំឲ្យតុលាការកាត់ក្តីរឿងគាត់ឲ្យបានឆាប់ ដូច្នេះមានតែ កោះសន្តិភាព ទេដែលជួយអង្រួនបេះដូងលោកចៅក្រម ឲ្យយករឿងលោកយាយមកកាត់ក្តីទៅដើម្បីលោកយាយបាននៅមើលសង្គមបច្ចុប្បន្នកំពុងមានការអភិវឌ្ឍន៍ទៅមុខទៀត ។
ក្នុងនោះដែរ កោះសន្តិភាព បានពិនិត្យឃើញឯកសាររបស់លោកយាយ ហ៊ូ សុខុម គឺបានដល់ដៃលោក ម៉េង តូនី ចៅក្រមស៊ើបសួរសាលាដំបូងរាជធានីភ្នំពេញហើយ ហើយក៏បានឃើញដីការកោះហៅរបស់លោក ស៊ិន វិរៈ ព្រះរាជអាជ្ញារងបានកោះហៅភាគីដើមចោទ និងចុងចម្លើយឲ្យចូលឆ្លើយ២ទៅ៣លើកឲ្យចូលឆ្លើយបំភ្លឺរឿងនេះដែរ តែលោកយាយថា ឈ្មោះ មាស ភារុណ កូនស្រីគាត់មិនបានចូលចូលឆ្លើយនៅតុលាការទេ ។
ដូច្នោះតុលាការគួរតែលើកយកសំណុំរឿងហ្នឹងមកកាត់ក្តីទៅដើម្បីផ្តន្ទាទោសជនបង្កអំពើហិង្សាវាយយកប្រាក់គាត់ និងសុំឲ្យតុលាការចាប់ខ្លួនកូនស្រី ដែលជាជនដៃដល់វាយគាត់រយះក្បាលយកទៅឃុំខ្លួនតាមទោសកំហុសលើបទល្មើសដូចការចោទប្រកាន់នោះ ៕
ចែករំលែកព័តមាននេះ