ទើបតែ​អាយុ​១៨​ឆ្នាំ​មែន​ពិត​ ប៉ុន្តែ​ស្នាដៃ​គួរ​ឱ្យ​កោត​សរសើរ​មិន​ធម្ម​តា


រាជធានី​ភ្នំពេញ ៖ កញ្ញា​ស៊ន់ កែវ​វ​ល័​ក្ខ ជា​សិស្ស​រៀន​ថ្នាក់​ទី​១២​នៅ​វិទ្យាល័យ​ព្រះ​ស៊ី​សុវត្ថិ និង​ជា​កីឡាការិនី​ថ្នាល​ក្នុង​ក្រុម​ជម្រើសជាតិ​ទទួល​បាន​នូវ​ការ​កោតសរសើរ​យ៉ាង​ខ្លាំង​ពី​សំណាក់​សហព័ន្ធ​កីឡា​យូ​ដូ បន្ទាប់​ពី​នាង​ដណ្ដើម​បាន​មេដាយមាស​១​គ្រឿង​ពី​ការ​ប្រកួត​កីឡា​ជាតិ​លើក​ទី​២ ។ តាម​រយៈ​ការ​រំលេច​ចេញ​នូវ​ស្នាដៃ​ដ៏​ល្អ​នេះ​ធ្វើ​ឱ្យ​នាង​កាន់តែ​មាន​ទំនុក​ចិត្ត​ប្រកបដោយ​មោទនភាព​ខ្ពស់​ក្នុង​នាម​ជា​កីឡាការិនី​ថ្នាល​ដែល​កំពុង​ខំប្រឹង​រីក​ដុះដាល​ក្នុង​ថ្នាល​កីឡា​យូ​ដូ​ដោយ​សង្ឃឹមថា នឹង​ទទួល​បាន​ឱកាស​ចូលរួម​ប្រកួត​ក្នុង​ព្រឹត្តិការណ៍​តូច​ធំ​ទាំង​ក្នុង​និង​ក្រៅប្រទេស​។

ជួប​អ្នក​យក​ព័ត៌មាន​កោះសន្តិភាព​ប្អូនស្រី​ស៊ន់ កែវ​វ​ល័​ក្ខ អាយុ​១៨​ឆ្នាំ​បាន​រៀបរាប់​ថា ខ្លួន​ចូល​ហ្វឹកហាត់​កីឡា​យូ​ដូ​ទើបតែ​បាន​ជាង​១​ឆ្នាំ​ប៉ុណ្ណោះ​ដោយ​មានការ​គាំទ្រ​ពី​ឪពុក​ម្ដាយ​ផង​ដែរ ។ ក្នុង​ចំណោម​បងប្អូន​៣​នាក់​ប្រុស​១​ស្រី​២​គឺ​មាន​តែ​រូប​នាង​ជា​កូនពៅ​គេ​និង​បងប្រុស​បន្ទាប់​ប៉ុណ្ណោះ​ដែល​កំពុង​ហ្វឹកហាត់​កីឡា​យូ​ដូ​ដូច​គ្នា​ខណៈ​បងស្រី​បង្អស់​មិន​ចូល​ចិត្ត​កីឡា​ទេ​។

ចំណែក​នាង​មាន​និស្ស័យ​ស្រឡាញ់​ចូល​ចិត្ត​កីឡា​តាំងពី​នៅ​តូច​ម្លេ​៉ះ​ប៉ុន្តែ​ពុំ​មានឱកាស​ចូល​ហ្វឹក​ហាត់​ទាល់តែ​សោះ ។ ទាល់តែ​ដល់​អាយុ​១៧​ឆ្នាំ និង​ដោយ​មានការ​គាំទ្រ​ពី​ឪពុក​​ម្ដាយ​ផង​នោះ​នាង​ក៏​បាន​ចូល​ហ្វឹកហាត់​កីឡា​យូ​ដូ​នេះ​តែ​ម្ដង​។​ដោយសារ​តែ​ការ​ខិតខំ​ប្រឹងប្រែង​ហ្វឹកហាត់​រយៈ​ពេល​ជាង​១​ឆ្នាំ​មកនេះ នាង​ត្រូវ​បាន​គ្រូបង្វឹក​ដំឡើង​ខ្សែក្រវាត់​ពី​ស​ទៅ​លឿង និង​ផ្ដល់​ឱកាស​ឱ្យ​នាង​ចូល​ហ្វឹកហាត់​ក្នុង​នាម​ជា​កីឡាការិនី​ថ្នាល​ក្នុង​ក្រុម​ជម្រើសជាតិ​ទៀត​ផង ។ មិនតែប៉ុណ្ណោះ​សហព័ន្ធ​កីឡា​យូ​ដូ​ក៏​បាន​ផ្ដល់​ឱកាស​ឱ្យ​នាង​ចូល​រួម​ប្រកួត​កីឡា​ជាតិ​លើក​ទី​២​ដែល​ទើប​បញ្ចប់​នា​ប៉ុន្មាន​ខែ​កន្លង​មកនេះ ហើយ​ជា​លទ្ធផល​នាង​ដណ្ដើម​បាន​មេដាយមាស​១​គ្រឿង​ធ្វើ​ឱ្យ​ក្រេ​ឌី​ត​នាង​ឡើង​មួយ​កម្រិត​ទៀត ។

ស៊ន់ កែវ​វ​ល័​ក្ខ​បន្ត​ថា ពី​មុន​នាង​គ្រាន់តែ​ចង់​ហាត់​កីឡា​ដើម្បី​សុខភាព​ប៉ុណ្ណោះ ប៉ុន្តែ​ដល់​ហាត់​យូរ​ៗ​ទៅ​បែរ​ជា​មាន​មហិច្ឆតា​ចង់​ក្លាយជា​កីឡាការិនី​ឆ្នើម​លំដាប់​ប្រទេស​ដូច​បងស្រី​ស៊ន សៀវ​ម៉ី ដែរ​។

ទោះបី​នាង​ចូល​ចិត្ត​កីឡា​យូ​ដូ ក៏​នាង​មិន​បោះ​បង់ការ​ខិតខំ​សិក្សា​រៀនសូត្រ​នោះ​ដែរ​ព្រោះ​​ជា​ឆ្នាំ​ត្រូវ​ប្រឡង​យក​សញ្ញាបត្រ​បាក់​ឌុ​ប​ក្នុង​ពេល​មានការ​រឹត​បន្តឹង​ពេល​ប្រឡង​ពី​ក្រសួង​អប់រំ​ផង​នោះ​គឺ​កាន់តែ​ធ្វើ​ឱ្យ​ខ្វល់ខ្វាយ​ក្នុង​ការ​រៀនសូត្រ​ថែម​ទៀត ។ នាង​ថា នាង​ចំណាយពេល​ហ្វឹក​ហាត់​ក្នុង​មួយ​ថ្ងៃ​តែ​១​ម៉ោង​ប៉ុណ្ណោះ​គឺ​នៅ​ពេល​ល្ងាច​ចាប់ពី​ម៉ោង​៥​និង​៣០​នាទី​ដល់​ម៉ោង​៦​និង​៣០​នាទី ដូច្នេះ​នាង​មាន​ពេលវេលា​រៀន​ច្រើន​។

ជា​ចុង​ក្រោយ ប្អូនស្រី​ស៊ន់ កែវ​វ​ល័​ក្ខ ដែល​មាន​ឪពុក​ឈ្មោះ​ម៉ៅ សុវត្ថិ អាយុ​ជាង​៥០​ឆ្នាំ ជា​មន្ត្រី​ធ្វើការ​នៅ​ក្រសួងទេសចរណ៍​និង​ម្ដាយ​ឈ្មោះ​អ៊ុំ សុទ្ធា អាយុ​ជាង​៤០​ឆ្នាំ​ជា​មេផ្ទះ​ប្រាប់​ថា នាង​ក៏​មាន​បំណង​ចង់ទៅ​ចូលរួម​ប្រកួត​នៅ​ក្រៅប្រទេស​ដែរ ប៉ុន្តែ​ភ្លាម​ៗ​ប្រហែល​​មិន​ទាន់​ទេ​ដោយសារ​តែ​កីឡា​យូ​ដូ​មិន​ទាន់​រីក​ចម្រើន​ខ្លាំង​ដូច​កីឡា​ដទៃ​ទៀត៕

Facebook Google Twitter Email

សូម​ subscribe Channel Youtube របស់​កោះ​សន្តិភាព​លោក​​អ្នក​នឹង​ទទូល​បាន​ព័ត៌មាន​ជា​វីដេអូ​ថ្មី​ៗ​បន្ថែម​ទៀត សូម​អគុណ!!!!!

កីឡាជាតិ

អត្រាប្តូរប្រាក់

អត្រាប្តូរប្រាក់ផ្សេងទៀត

Live

Sponsored News

To Top

ការស្ទង់មតិគេហទំព័រថ្មី




សូម​អរគុណ