រាជធានីភ្នំពេញ ៖ គិតត្រឹមដំណាច់ត្រីមាសទី២ឆ្នាំនេះ ការផ្គត់ផ្គង់ទំហំផ្សារទំនើបនៅទីក្រុងភ្នំពេញ មានការកើនឡើងដល់ប្រមាណជា៤៣% បើធៀបនឹងត្រីមាសទី១ឆ្នាំនេះ ។ នេះក៏ព្រោះតែបរិបទផ្លាស់ប្ដូរនៃរបៀបរស់នៅ ស្របពេលប្រាក់ចំណូលរបស់ប្រជាពលរដ្ឋកាន់តែប្រសើរឡើង ។…
រាជធានីភ្នំពេញ ៖ គិតត្រឹមដំណាច់ត្រីមាសទី២ឆ្នាំនេះ ការផ្គត់ផ្គង់ទំហំផ្សារទំនើបនៅទីក្រុងភ្នំពេញ មានការកើនឡើងដល់ប្រមាណជា៤៣% បើធៀបនឹងត្រីមាសទី១ឆ្នាំនេះ ។ នេះក៏ព្រោះតែបរិបទផ្លាស់ប្ដូរនៃរបៀបរស់នៅ ស្របពេលប្រាក់ចំណូលរបស់ប្រជាពលរដ្ឋកាន់តែប្រសើរឡើង ។
យោងតាមការសិក្សារបស់ក្រុមហ៊ុនអចលនទ្រព្យ CBRE Cambodia ដែលបានចេញផ្សាយរបាយការណ៍របស់ខ្លួនសម្រាប់ត្រីមាសទី២ឆ្នាំ២០១៨នេះ បានឲ្យដឹងថា ការផ្គត់ផ្គង់ទំហំទីផ្សារទំនើបក្នុងរាជធានីភ្នំពេញ មានការកើនឡើងរហូតដល់៤៣% បើធៀបនឹងត្រីមាសទី១ ឆ្នាំ២០១៨ ។ ការកើនឡើងនៃការផ្គត់ផ្គង់ផ្សារទំនើបនេះ កើតឡើងស្របពេលមានវត្តមានផ្សារទំនើបអុីអនទី២ ក្នុងខណ្ឌសែនសុខ ដែលមានផ្ទៃក្រឡារហូតដល់៨ម៉ឺន៥ពាន់ម៉ែត្រក្រឡា។ ក្រៅពីវត្តមានផ្សារទំនើបអុីអនទី២ ក៏មានវត្តមាន Prince Central Plaza និងការបើកទ្វាររបស់ The Bridge ផងដែរ ។ របាយការណ៍ដដែលបានបង្ហាញថា ក្រៅពីវត្តមានផ្សារទំនើបធំៗដែលបានបើកលក់ទាំងនេះ ក៏មានផ្សារទំនើបធំៗជាច្រើនទៀត នឹងបញ្ចប់គម្រោងសាងសង់នៅចុងឆ្នាំ២០១៨នេះ ក្នុងនោះមានដូចជា Midtown Mall , The Bridge និង The Olympia Mall ដែលនឹងបន្ថែមទំហំប្រមាណជា៥ម៉ឺន៥ពាន់ម៉ែត្រក្រឡាថែមទៀត ។
ចំណែកឯទំហំនៃការជួលវិញ ហាក់នៅមានស្ថិរភាព នឹងនរ មិនមានការកើនឡើង ឬថយចុះនោះទេ សម្រាប់ត្រីមាសទី២នេះ ។ រីឯទីតាំងទំនេរវិញហាក់ធ្លាក់ចុះប្រមាណក្រោម១០% ដោយគេមើលឃើញថា ក្នុងទីតាំងផ្សារទំនើបអេអនទាំងពីរសឹងតែមានការជួលពេញទាំងអស់។
អ្នកនាង អាន សុធីតា នាយិកាប្រចាំប្រទេសនៃក្រុមហ៊ុន CBRE Cambodia បានថ្លែងថា ការកើនឡើងនូវទំហំផ្សារទំនើបនៅទីក្រុងភ្នំពេញ ឆ្លុះបញ្ចាំងពីការរីកចម្រើននូវជីវភាពរបស់ប្រជាពលរដ្ឋ និងកម្ពុជាជាទីផ្សារថ្មីសម្រាប់អ្នកវិនិយោគជាតិ និងអន្តរជាតិ ដែលពួកគេមើលឃើញឱកាសច្រើននៅទីនេះ ។
អ្នកនាងបន្តថា ៖« អំណាចនៃការទិញបានកើនឡើងនៅកម្ពុជា កំណើនសេដ្ឋកិច្ច និងប្រាក់ចំណូលរបស់ប្រជាពលរដ្ឋ ជាមូលហេតុនៃការទាក់ទាញក្រុមហ៊ុនថ្មីៗជាច្រើនចូលមកកាន់ទីផ្សារនេះ » ។ អ្នកនាងបន្ថែមថា ឆ្នាំ២០១៨នេះ ទំហំផ្សារទំនើបនៅទីក្រុងភ្នំពេញ បានកើនឡើងច្រើន ប៉ុន្តែមិនទាន់លើសតម្រូវការទេ ដោយសារផ្សារទាំងនោះមានទីតាំង និងចាប់យកអតិថិជនគោលដៅផ្សេងៗគ្នា ។
អគ្គនាយកក្រុមហ៊ុនKFA លោកឧកញ៉ា នួន រឹទ្ធី បានថ្លែងថា ការរីកចម្រើននៃសេដ្ឋកិច្ច ដែលបានមកពីកត្តាសុខសន្តិភាព ស្ថិរភាពនយោបាយបានធ្វើឲ្យកម្ពុជាក្លាយជាទីផ្សារមួយមានភាពទាក់ទាញវិនិយោគិនអន្តរជាតិកាន់តែច្រើន ហើយនឹងកើនឡើងបន្ថែមទៀតនាពេលអនាគត ដោយសារសេដ្ឋកិច្ចកម្ពុជានឹងកើនឡើងរយៈពេលវែងបន្តទៀត ។ លោកបន្តថា ៖« ខ្ញុំជឿជាក់លើការដឹកនាំរបស់ប្រមុខរដ្ឋាភិបាល ដែលនឹងជំរុញកំណើនប្រាក់ចំណូលប្រជាពលរដ្ឋបន្ថែមទៀត ហើយពេលណាប្រាក់ចំណូលកើនឡើង កម្លាំងទិញនៅទីផ្សារនឹងកើនឡើងជាស្វ័យប្រវត្តិ » ។
យោងតាមក្របខ័ណ្ឌគោលនយោបាយម៉ាក្រូសេដ្ឋកិច្ច រយៈពេល៥ឆ្នាំចុងក្រោយនេះ រាជរដ្ឋាភិបាលសម្រេចបានតាមការគ្រោងទុកនូវកំណើនសេដ្ឋកិច្ចប្រចាំឆ្នាំក្នុងរង្វង់៧,០% ប្រកបដោយបរិយាប័ន្ន និងសមធម៌ ។ កម្ពុជាថែមទាំងសម្រេចបានជាប្រវត្តិសាស្ត្រ គឺការឆ្លងផុតពីឋានៈប្រទេសមានចំណូលទាប ទៅជាប្រទេសមានចំណូលមធ្យមកម្រិតទាប ជាផ្លូវការក្នុងឆ្នាំ២០១៥ ព្រមទាំងត្រូវបានចាត់ទុកថាជា «ខ្លាសេដ្ឋកិច្ចថ្មីនៅអាស៊ី» ក្នុងឆ្នាំ២០១៦ ។
កំណើននេះ បានបង្កើតការងារជាច្រើនដល់ប្រជាពលរដ្ឋទូទាំងប្រទេស ដែលឆ្លុះបញ្ចាំងតាមរយៈតួលេខរបស់ធនាគារពិភពលោក ដែលបានបង្ហាញថា ភាពគ្មានការងារធ្វើនៅប្រទេសកម្ពុជាស្ថិតក្នុងអត្រា០,៣% និងភាពក្រីក្រតោកយ៉ាកត្រូវបានលុបបំបាត់ចោលទាំងស្រុងក្នុងឆ្នាំ២០១៧។ ទន្ទឹមនឹងនេះ ប្រាក់ចំណូលរបស់ប្រជាពលរដ្ឋ ក៏កើនឡើងផងដែរ ដោយផលិតផលក្នុងស្រុកសរុប(ផ.ស.ស)ក្នុងមនុស្សម្នាក់កើនពី១.០៤២ដុល្លារអាមេរិកក្នុងឆ្នាំ២០១៣ ដល់ប្រមាណ១.៤២៧ដុល្លារអាមេរិកក្នុងឆ្នាំ២០១៧ និង១.៥៦៣ដុល្លារអាមេរិកនៅក្នុងឆ្នាំ២០១៨នេះ ។ ជាមួយគ្នានេះ ក្នុងឆ្នាំ២០១៨ និង២០១៩ សេដ្ឋកិច្ចកម្ពុជាត្រូវបានរំពឹងថា នឹងនៅបន្តកំណើនក្នុងរង្វង់ប្រមាណ៧,០% ដែលទ្រទ្រង់ដោយមូលដ្ឋានកំណើនស្រដៀងទៅនឹងឆ្នាំ២០១៧ដែរ ៕
ចែករំលែកព័តមាននេះ