រាជធានីភ្នំពេញ ៖ កត្តាសំខាន់ៗចំនួន៤បាននិងកំពុងជំរុញវិស័យឧស្សាហកម្មកម្ពុជាបន្តរីកចម្រើនខ្ពស់ ដោយនៅដំណាច់ត្រីមាសទី២ឆ្នាំនេះ តំបន់ឧស្សាហកម្មចំនួន២៦បានបង្កើតឡើង និងមានផ្ទៃក្រឡា២៤ម៉ឺនម៉ែត្រការ៉េ ។ យោងការសិក្សារបស់ក្រុមហ៊ុនCBRE Cambodia ដែលទើបបានបញ្ចប់របាយការណ៍របស់ខ្លួននៅដំណាច់ត្រីមាសទី២ឆ្នាំនេះ…
រាជធានីភ្នំពេញ ៖ កត្តាសំខាន់ៗចំនួន៤បាននិងកំពុងជំរុញវិស័យឧស្សាហកម្មកម្ពុជាបន្តរីកចម្រើនខ្ពស់ ដោយនៅដំណាច់ត្រីមាសទី២ឆ្នាំនេះ តំបន់ឧស្សាហកម្មចំនួន២៦បានបង្កើតឡើង និងមានផ្ទៃក្រឡា២៤ម៉ឺនម៉ែត្រការ៉េ ។
យោងការសិក្សារបស់ក្រុមហ៊ុនCBRE Cambodia ដែលទើបបានបញ្ចប់របាយការណ៍របស់ខ្លួននៅដំណាច់ត្រីមាសទី២ឆ្នាំនេះ បានរកឃើញថា គិតត្រឹមរយៈពេល៥ខែដើមឆ្នាំនេះ តំបន់ឧស្សាហកម្មបានកើនឡើងរហូតដល់២៦កន្លែង ដែលមានទំហំផ្ទៃក្រឡាសរុបចំនួន២៤ម៉ឺនម៉ែត្រការ៉េ ។ តម្លៃជួលឃ្លាំង ឬរោងចក្រ ដែលបានសាងសង់ចប់រួចរាល់ គឺចាប់ពី៣,២ដុល្លារឡើងទៅក្នុង១ម៉ែត្រការ៉េ ។
របាយការណ៍ដដែលបានបង្ហាញថា តម្រូវការសេវាកម្មជួលនានានៅតាមតំបន់ឧស្សាហកម្មបន្តកើនឡើងខ្ពស់ អាស្រ័យលើផែនការនៃគម្រោងហេដ្ឋារចនាសម្ព័ន្ធ ទីតាំង និងគោលដៅនៃការវិនិយោគ ។
នាយិកាប្រចាំប្រទេសនៃក្រុមហ៊ុនCBRE Cambodia អ្នកនាង អាន សុធីតា បានថ្លែងថា កំណើននៃការវិនិយោគតំបន់ឧស្សាហកម្មកើនឡើង ដោយសារកត្តា៤សំខាន់ ទី១ កម្ពុជាជាគោលដៅនៃការវិនិយោគផ្នែកឧស្សាហកម្ម។ ទី២ កម្លាំងពលកម្មនៅកម្ពុជាមានតម្លៃទាប ធៀបជាមួយប្រទេសថៃ គឺកម្ពុជាអាចទាបជាង២ដង ។ ទី៣ ការអនុគ្រោះពន្ធ និងទី៤ ច្បាប់វិនិយោគដ៏ទាក់ទាញរបស់កម្ពុជា ។
អ្នកនាងបន្តថា ៖« ទោះជាយ៉ាងណា កម្ពុជាក៏មានបញ្ហាប្រឈមរបស់ខ្លួនផងដែរ ទាក់ទងនឹងតម្លៃទឹក និងអគ្គិសនី នៅថ្លៃជាងប្រទេសជិតខាង » ។ អ្នកនាងបន្ថែមថា ៖« យ៉ាងណា ខ្ញុំគិតថា រាជរដ្ឋាភិបាលនឹងដោះស្រាយបញ្ហាទាំងនេះបានសម្រាប់រយៈពេល៣ទៅ៥ឆ្នាំខាងមុខ ដោយសារបច្ចុប្បន្ន រាជរដ្ឋាភិបាលបាននិងកំពុងវិនិយោគវារីអគ្គិសនី និងរោងចក្រអគ្គិសនីជាច្រើន » ។
លោកបណ្ឌិត ម៉ី កល្យាណ ទីប្រឹក្សាឧត្តមក្រុមប្រឹក្សាសេដ្ឋកិច្ចជាតិ បានថ្លែងថា ការរីកចម្រើនវិស័យឧស្សាហកម្មនៅកម្ពុជា ដោយសារគោលនយោបាយថ្មីរបស់រាជរដ្ឋាភិបាល តាមរយៈការដាក់ចេញគោលនយោបាយអភិវឌ្ឍន៍ វិស័យឧស្សាហកម្មឆ្នាំ២០១៥-២០២៥ ដែលបានដាក់ឲ្យដំណើរការ ដើម្បីធ្វើពិពិធកម្មទីផ្សារពលកម្ម និងសេដ្ឋកិច្ចកម្ពុជា ។ លោកបន្តថា ការដាក់ចេញនូវគោលនយោបាយថៃបូក១ បានផ្តល់ផលប្រយោជន៍ច្រើនដល់កម្ពុជាផងដែរ ដោយសាររោងចក្រមួយចំនួននៅប្រទេសថៃ បានមកកាន់តំបន់ជាយដែនកម្ពុជា ដើម្បីផលិត ហើយធ្វើការនាំចេញ ។
លោកបន្តថា ៖« គោលនយោបាយថៃបូក១ ពិតជាផ្តល់ផលប្រយោជន៍ច្រើនដល់កម្ពុជា ដោយសារកម្ពុជាមានកម្លាំងពលកម្មថោកជាងប្រទេសថៃ បានធ្វើឲ្យកម្ពុជាក្លាយជាទីតាំងទាក់ទាញការវិនិយោគមួយ » ។
លោកបន្តថា ៖« មានការលើកឡើងថាប្រទេសដែលស្ថិតនៅក្បែរប្រទេសអភិវឌ្ឍន៍លឿន នឹងជួយប្រទេសនោះឲ្យមានភាពរីកចម្រើនផងដែរ » ៕
ចែករំលែកព័តមាននេះ