ខេត្តព្រៃវែង ៖ យ៉ាងហោចណាស់ មានមនុស្សចំនួន៦នាក់បានរងរបួសធ្ងន់នៅក្នុងហេតុការណ៍គ្រោះថ្នាក់ចរាចរណ៍ចំនួន៣ករណីផ្សេងពីគ្នា ដែលមូលហេតុបណ្តាលមកពីការបើកបរខ្វះការប្រុងប្រយ័ត្ន និងការបើកបរដោយមិនគោរពច្បាប់ចរាចរណ៍។
ករណីទី១- កាលពីវេលាម៉ោង៩និង១៥នាទីព្រឹកថ្ងៃទី៣០ កក្តដា នៅលើកំណាត់ផ្លូវជាតិលេខ៣១០ ត្រង់ចំណុចភូមិឩត្តុង ឃុំព្រែកក្របៅ ស្រុកពាមជរ បានកើតឡើងរវាងម៉ូតូបុកជាមួយម៉ូតូ បណ្តាលអោយមនុស្សចំនួន៤នាក់រងរបួសធ្ងន់ ត្រូវបានដឹកយកទៅសង្គ្រោះនៅមន្ទីរពេទ្យបង្អែកអ្នកលឿងភ្លាមៗបន្ទាប់ពីកើតហេតុ។
សមត្ថកិច្ចបានអោយដឹងថា ករណីគ្រោះថ្នាក់ចរាចរណ៍នេះបង្កឡើងដោយឈ្មោះ ភួង ចាន្នី អាយុ៦៥ឆ្នាំ ជិះម៉ូតូមួយគ្រឿងម៉ាកឌ្រីមសង់ C125 ពណ៌ខ្មៅ ស៊េរីឆ្នាំ២០១៧ ពាក់ស្លាកលេខ ១GF-៧៥០៤ បើកបរក្នុងទិសដៅពីជើងទៅត្បូង លុះមកដល់ចំណុចកើតហេតុ បានវ៉ាជែងរ៉ឺម៉កម៉ូតូមួយគ្រឿងដែលនៅខាងមុខ ហើយក៏ជ្រុលចង្កូតទៅបុកម៉ូតូមួយគ្រឿងទៀតម៉ាកឌ្រីមសង់ C125 ពណ៌ខ្មៅ ស៊េរីឆ្នាំ២០១៦ ពាក់ស្លាកលេខ ព្រៃវែង ១L-២៤៧២ បើកបរដោយឈ្មោះ សេង សុងលីម ភេទប្រុស អាយុ២៥ឆ្នាំ និងអ្នករួមដំណើរជាមួយ២នាក់ទៀត ម្នាក់ឈ្មោះ ម៉ឹង យ៉យ ភេទស្រី អាយុ៤៥ឆ្នាំ និងម្នាក់ទៀតឈ្មោះ រ៉ន យ៉ឺន ភេទស្រី អាយុ១៨ឆ្នាំ បណ្តាលអោយម៉ូតូទាំង២គ្រឿងរងការខូចខាត ចំណែកមនុស្សទាំង៤នាក់ដួលបោកនឹងថ្នល់រងរបួសធ្ងន់ទាំងសងខាង។
ករណីទី២-កាលពីវេលាម៉ោង១១និង២០នាទីថ្ងៃត្រង់ ថ្ងៃទី៣០កក្កដា នៅលើកំណាត់ផ្លូវលំក្រាលខ្សាច់ស ស្ថិតក្នុងភូមិអង្គ ឃុំអង្គរស ស្រុកមេសាង បានកើតឡើងរវាងម៉ូតូបុកជាមួយម៉ូតូ បណ្តាលអោយមនុស្ស២នាក់រងរបួសធ្ងន់និងស្រាល។
សមត្ថកិច្ចបានអោយដឹងថា គ្រោះថ្នាក់ចរាចរណ៍នេះបង្កឡើងដោយឈ្មោះ ស៊ូ អ៊ាន ភេទប្រុស អាយុ៦០ឆ្នាំ បានជិះម៉ូតូមួយគ្រឿងម៉ាកគុបជ្រុងសេ៩០ ពណ៌ទឹកប៊ិច គ្មានស្លាកលេខ ជិះចេញពីផ្ទះរបស់ខ្លួនឡើងមកលើថ្នល់ ( ផ្ទះនៅជាប់ផ្លូវ ) ដោយជិះឡើងកាត់ទទឹងថ្នល់តែម្តង ហើយក៏ត្រូវម៉ូតូមួយគ្រឿងផ្សេងទៀតម៉ាកឌ្រីមសង់ C១២៥ ពណ៌ខ្មៅ ពាក់ស្លាកលេខ ព្រៃវែង ១K-២៦០៤ បើកបរដោយឈ្មោះ យិន ទូច ភេទប្រុស អាយុ២០ឆ្នាំ បណ្តាលអោយម៉ូតូទាំង២ដួលបោកនិងថ្នល់ បណ្តាលឱ្យអ្នកបើកបរម៉ូតូឈ្មោះ ស៊ូ អ៊ាន រងរបួសធ្ងន់ ត្រូវបានក្រុមគ្រួសារ នាំយកទៅព្យាបាលនៅមណ្ឌលសុខភាពឃុំអង្គរសភ្លាមៗបន្ទាប់ពីកើតហេតុ ចំណែកភាគីម្ខាងទៀតរងរបួសស្រាល។
ករណីទី៣- កាលពីវេលាម៉ោង៥និង៣០នាទីល្ងាចថ្ងៃទី៣០ កក្កដា នៅលើកំណាត់ផ្លូវជាតិលេខ៣១២ ត្រង់ចំណុចភូមិលឹង្គ ឃុះអង្គររាជ្យ ស្រុកព្រះស្តេច បានកើតឡើងរវាងម៉ូតូបុកជាមួយរថយន្ត បណ្តាលឱ្យអ្នកបើកបរម៉ូតូរងរបួសធ្ងន់។
សមត្ថកិច្ចបានអោយដឹងថា ករណីនេះបង្កឡើងដោយឈ្មោះ សេង រស្មី ភេទប្រុស អាយុ២៥ឆ្នាំ ជិះម៉ូតូមួយគ្រឿងម៉ាក HONDA WAVE C100 ពណ៌ក្រហម គ្មានស្លាកលេខ ធ្វើដំណើរក្នុងទិសដៅពីជើងទៅត្បូង លុះមកដល់កន្លែងកើតហេតុ ម៉ូតូខាងលើបានបើកវ៉ាជែងម៉ូតូមួយគ្រឿងផ្សេងទៀតដែលនៅខាងមុខ ហើយក៏ជ្រុលចង្កូតទៅបុករថយន្តមួយគ្រឿងម៉ាកហាយឡែនឌ័រ ពណ៍ទឹកមាស ពាក់ស្លាកលេខ ភ្នំពេញ ២U-១៧៩២ ដែលបើកបរក្នុងទិសដៅបញ្ច្រាសគ្នា បណ្តាលអោយអ្នកបើកម៉ូតូរងរបួសធ្ងន់ ត្រូវបានបញ្ជូនទៅសង្គ្រោះនៅមន្ទីរពេទ្យបង្អែកស្រុកព្រះស្តេច ចំណែកម៉ូតូនិងរថយន្តត្រូវបានសមត្ថកិច្ចយកទៅរក្សាទុករងចាំការដោះស្រាយនៅពេលក្រោយ៕
ចែករំលែកព័តមាននេះ