រាជធានីភ្នំពេញ ៖ ស្របពេលដែលស្ថានអគ្គកុងស៊ុលចិន ប្រចាំខេត្តសៀមរាប បានបង្ហាញការព្រួយបារម្ភពីការលក់វត្ថុអនុស្សាវរីយ៍ក្លែងក្លាយដល់ភ្ញៀវទេសចរអន្តរជាតិ ពិសេសភ្ញៀវទេសចរចិននោះ ក្រុមវិស័យឯកជនផ្នែកទេសចរណ៍បានអំពាវនាវឲ្យស្ថាប័នពាក់ព័ន្ធមានវិធានការជាបន្ទាន់ដើម្បីទប់ស្កាត់បញ្ហានេះ ព្រោះវានឹងនាំឲ្យប៉ះពាល់ដល់វិស័យទេសចរណ៍។ លោក ម៉ូ…
រាជធានីភ្នំពេញ ៖ ស្របពេលដែលស្ថានអគ្គកុងស៊ុលចិន ប្រចាំខេត្តសៀមរាប បានបង្ហាញការព្រួយបារម្ភពីការលក់វត្ថុអនុស្សាវរីយ៍ក្លែងក្លាយដល់ភ្ញៀវទេសចរអន្តរជាតិ ពិសេសភ្ញៀវទេសចរចិននោះ ក្រុមវិស័យឯកជនផ្នែកទេសចរណ៍បានអំពាវនាវឲ្យស្ថាប័នពាក់ព័ន្ធមានវិធានការជាបន្ទាន់ដើម្បីទប់ស្កាត់បញ្ហានេះ ព្រោះវានឹងនាំឲ្យប៉ះពាល់ដល់វិស័យទេសចរណ៍។
លោក ម៉ូ យ៉ុន យ៉ុន (Mo Yuan Yuan) អគ្គកុងស៊ុលនៃស្ថានទូតសាធារណរដ្ឋប្រជាមានិតចិន តំណាងការិយាល័យប្រចាំខេត្តសៀមរាប កាលពីពេលថ្មីៗនេះ បានបង្ហាញក្ដីបារម្ភពីផលប៉ះពាល់ដល់ចំនួនទេសចរចិន ដោយសារហាងលក់សម្ភារមួយចំនួនបាននិងកំពុងលក់របស់មិនពិត គ្មានគុណភាព និងមានតម្លៃខ្ពស់ដល់ទេសចរចិន ។
ពាក់ព័ន្ធនឹងបញ្ហានេះ ប្រធានសមាគមទេសចរណ៍អាស៊ីប៉ាស៊ីហ្វិក លោក ធួន ស៊ីណាន បានថ្លែងតាមទូរស័ព្ទនាព្រឹកថ្ងៃទី២៧ កក្កដា ថា បញ្ហានេះ យើងបានតវ៉ារយៈពេល២០ឆ្នាំមកហើយ ព្រោះហាងខ្លះយករបស់តម្លៃ៣ដុល្លារ លក់ក្នុងតម្លៃ៨០ទៅ១០០ដុល្លារអាមេរិកដល់ភ្ញៀវទេសចរអន្តរជាតិ ខ្លះលក់ពេជ្រតម្លៃជាង១ម៉ឺនដុល្លារ តែតម្លៃពិតរបស់ត្បូងត្រឹមតែ៨០ដុល្លារអាមេរិកក៏មាន ។ លោកបន្តថា កន្លងមក ក្រសួង និងស្ថាប័នពាក់ព័ន្ធបានណែនាំពីបញ្ហានេះ ប៉ុន្តែប្រសិទ្ធភាពនៅមានកម្រិត ។
លោកបន្តថា ៖« កាលពីប៉ុន្មានឆ្នាំមុន ឯកអគ្គរដ្ឋទូតប៉ូឡូញ បានជួបខ្ញុំផ្ទាល់ដើម្បីលើកឡើងពីបញ្ហានេះដែរ មិនត្រឹមតែស្ថានទូតចិននោះទេ »។ លោកបន្តថា ៖« អាជ្ញាធរលើកឡើងពីទីផ្សារសេរី ប៉ុន្តែទីផ្សារសេរី គេមិនអនុវត្តបែបនេះទេ ដូចនៅវៀតណាម សិង្ហបុរី ចិន ម៉ាឡេស៊ី ជាដើម គេទីផ្សារសេរីដែរ តែមិនប្រព្រឹត្តបែបនេះទេ » ។
លោក ធួន ស៊ីណាន បានបន្តថា ដំណោះស្រាយបញ្ហានេះ គឺអាជ្ញាធរខេត្តដែលនៅមូលដ្ឋានផ្ទាល់ត្រូវចាត់វិធានការ មិនមែនក្រសួងទេសចរណ៍ទេ តែក្រសួងសេដ្ឋកិច្ច និងហិរញ្ញវត្ថុ និងក្រសួងពាណិជ្ជកម្ម ក៏គួរចូលរួមចាត់វិធានការលើបញ្ហានេះដែរ ។
លោកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជា បានលើកឡើងស្រដៀងគ្នាថា កន្លងមក ក្រសួងទេសចរណ៍បានចេញសេចក្តីណែនាំលើបញ្ហានេះ តែនៅតែមានអ្នកលក់ផលិតផលក្លែងក្លាយច្រើន ។ ហេតុនេះ ក្រសួង និងស្ថាប័នពាក់ព័ន្ធ គួរធ្វើការណែនាំឡើងវិញ និងចាត់វិធានការពិន័យ ព្រមទាំងដាក់ទោសទណ្ឌ ព្រោះបើនៅតែបណ្តោយឲ្យបញ្ហានេះបន្តកើតឡើង វាធ្វើឲ្យប៉ះពាល់កិត្តិនាមរបស់កម្ពុជា ។
លោកស្រីបន្តថា ៖« ការចាត់វិធានការ គួរធ្វើឡើងដើម្បីមានទំនុកចិត្តឡើងវិញ ព្រោះគោលនយោបាយទេសចរណ៍ គឺចង់ឲ្យភ្ញៀវស្នាក់នៅយូរ និងចំណាយប្រាក់ច្រើន ទិញទំនិញច្រើន » ។
លោកស្រីបន្តថា ៖« ប្រតិបត្តិករទេសចរណ៍ ចង់ណែនាំឲ្យភ្ញៀវទិញទំនិញ តែយើងមិនហ៊ានណែនាំ ដោយសារតែបញ្ហាទំនុកចិត្ត ហេតុនេះអ្នកលក់គួរនិយាយត្រង់ » ។ លោកស្រី ឆាយ ស៊ីវលីន បានបន្តថា ៖«យើងបានឃើញផ្ទាល់ ឮផ្ទាល់ ហើយយើងពិតជាមានការព្រួយបារម្ភពីបញ្ហានេះ » ។
ទីប្រឹក្សាសភាពាណិជ្ជកម្មកម្ពុជា លោកហូ វណ្ឌី បានថ្លែងផងដែរថា កន្លងមក មានចំណាត់ការពីស្ថាប័នពាក់ព័ន្ធលើបញ្ហានេះដែរ ប៉ុន្តែមិនសូវមានប្រសិទ្ធភាពខ្ពស់ ដែលធ្វើឲ្យក្រសួង និងវិស័យឯកជនឈឺក្បាលចំពោះបញ្ហានេះ ។ លោកបន្តថា វាជាជំងឺរ៉ាំរ៉ៃយូរមកហើយ ដែលទាមទារឲ្យស្ថាប័នពាក់ព័ន្ធ និងមន្ទីរទេសចរណ៍ត្រូវចាត់វិធានការលើបញ្ហាទាំងអស់នេះ ។
លោកបន្តថា ៖« ការបណ្តោយឲ្យបញ្ហានេះកើតឡើង វានឹងធ្វើឲ្យបាត់បង់ទំនុកចិត្ត ឈានទៅបាត់បង់ភ្ញៀវ និងបាត់បង់ចំណូលទាំងអស់គ្នា » ៕
ចែករំលែកព័តមាននេះ