រាជធានីភ្នំពេញ ៖ មន្ត្រីជាន់ខ្ពស់ក្រសួងទេសចរណ៍ បានជំរុញឲ្យក្រុមហ៊ុនភ្នាក់ងារទេសចរណ៍នានាបង្កើនការរៀបចំសេវាកម្មកម្សាន្ដនៅតាមរមណីយដ្ឋានក្នុងស្រុកឲ្យបានច្រើន ខណៈការរៀបចំកញ្ចប់ទស្សនកិច្ចនៅក្រៅប្រទេស បានកើនឡើងខ្ពស់រួចទៅ
ហើយ ។
រដ្ឋលេខាធិការក្រសួងទេសចរណ៍ លោក ប៉ាក់ សុខុម បានថ្លែងកាលពីពេលថ្មីៗនេះថា សព្វថ្ងៃនេះ ការផ្ដល់កញ្ចប់សេវាកម្មទេសចរណ៍ ទៅក្រៅប្រទេស ហាក់មានច្រើនជាងការរៀបចំកញ្ចប់សេវាកម្មទេសចរណ៍ក្នុងស្រុកសម្រាប់ប្រជាពលរដ្ឋកម្ពុជា ខណៈទេសចរក្នុងស្រុកមានសារសំខាន់ជាខ្លាំង ដែលមិនអាចមើលរំលងបាន ។
លោកថ្លែងថា ៖« វាចាំបាច់ក្នុងការជួយសម្រួលពីក្រុមហ៊ុនសេវាឯកជនរៀបចំកញ្ចប់សេវាកម្មទេសចរណ៍ក្នុងស្រុកសម្រាប់ប្រជាជនកម្ពុជាឲ្យបានកាន់តែច្រើនថែមទៀត »។
លោកបន្តថា ៖« កញ្ចប់សេវាកម្មទេសចរណ៍ក្នុងស្រុកនេះ ត្រូវធ្វើឡើងឲ្យបានសមស្របទៅតាមជីវភាពរបស់ប្រជាជនកម្ពុជាគ្រប់កម្រិត មិនថាជាសិស្ស-និស្សិត មន្ត្រីរាជការ ឬអាជីវករនោះទេ » ។
លោកបន្តថា ៖« ការរៀបចំសេវាកម្មទេសចរណ៍ឲ្យប្រជាជនកម្ពុជាធ្វើដំណើរកម្សាន្ដ ក្រៅពីផ្ដល់ផលចំណេញលើសេដ្ឋកិច្ចជាតិ វាក៏ជាការជំរុញឲ្យប្រជាពលរដ្ឋកម្ពុជាបានស្គាល់ពីទឹកដីរបស់ខ្លួនកាន់តែច្បាស់ ឈ្វេងយល់ពីសារសំខាន់ និងបណ្ដុះគំនិតស្នេហា ស្រឡាញ់ទឹកដីខ្លួនឯងផងដែរ » ។
យោងតាមរបាយការណ៍របស់ក្រសួងទេសចរណ៍បានបង្ហាញថា ភ្ញៀវទេសចរក្នុងស្រុកបានរួមចំណែកប្រមាណ៦០% នៃចំណូលសរុបក្នុងវិស័យទេសចរណ៍កម្ពុជា ។ កាលពីឆ្នាំ២០១៧កន្លងមក ទេសចរក្នុងស្រុកបានដើរកម្សាន្ដនៅតាមរមណីយដ្ឋាននានាជិត១១លាននាក់ ហើយជាចក្ខុវិស័យ ក្រសួងទេសចរណ៍រំពឹងថា នឹងមានទេសចរជាតិប្រមាណ១៩លាននាក់នៅឆ្នាំ២០២៥ ខាងមុខនេះ ។
លោក ហូ វណ្ឌី ទីប្រឹក្សាសមាគមទីភ្នាក់ងារទេសចរណ៍កម្ពុជា បានថ្លែងថា ការរៀបចំកញ្ចប់ទេសចរណ៍ក្នុងស្រុកពិតជាមានសារសំខាន់ ដើម្បីផ្សព្វផ្សាយចំណេះដឹង និងសេដ្ឋកិច្ចដល់មូលដ្ឋាន ព្រោះពេលភ្ញៀវទេសចរទៅដល់កន្លែងណាមួយ ពួកគេតែងតែចាយប្រាក់នៅទីនោះ ដែលនេះជាការចូលរួមចំណែកកាត់បន្ថយភាពក្រីក្រដល់ប្រជាពលរដ្ឋកម្ពុជាដោយផ្ទាល់ និងប្រយោលផងដែរ ។
លោកបន្តថា ៖« ទេសចរណ៍តែងតែនាំមុខសេដ្ឋកិច្ច ជាពិសេស ទេសចរណ៍ទៅដល់ទីណា សកម្មភាពសេដ្ឋកិច្ចតែងតែកើតមាននៅទីនោះ»៕
ចែករំលែកព័តមាននេះ