រាជធានីភ្នំពេញ ៖ រថយន្តស៊េរីទំនើបម៉ាក Lexus GS-300 មួយគ្រឿង បានក្រពឹតទ្វារខាងឆ្វេងម្ខាងរងការខូចខាតយ៉ាងដំណំ ខណៈដែលនារីវ័យក្មេងចំនួន ៣នាក់បងប្អូនបានបើកបរក្នុងគោលបំណងទៅកាន់ការិយាល័យបោះឆ្នោតមួយកន្លែងដែលនៅ ក្បែរនោះ។ គ្រាន់តែបើកចេញពីផ្ទះបានចម្ងាយប្រមាណជាជាង៥០ ក៏ត្រូវបានបុរសម្នាក់ បើកម៉ូតូធំមួយគ្រឿង មកបុកពេញទំហឹងនោះ។
ករណីគ្រោះថ្នាក់ចរាចរណ៍នេះដែរ បានកើតឡើង នៅវេលាម៉ោង១ និង១៥នាទីថ្ងៃត្រង់ ថ្ងៃទី២៩ ខែកក្កដា ឆ្នាំ២០១៨ នៅចំណុចផ្លូវលេខ២០៥ កែងនឹងផ្លូវលេខ៣៤៨ ក្នុងសង្កាត់ទួលស្វាយព្រៃទី២ ខណ្ឌចម្ការមន។ តាមប្រភពព័ត៌មានពីនគរបាល បានប្រប់ឱ្យដឹងថា មុនពេលកើតហេតុ គេបានឃើញរថយន្តស៊េរីទំនើបម៉ាក Lexus GS 300 ពណ៌ស ពាក់ស្លាកលេខ ភ្នំពេញ ២AT-៣១៣០ មួយគ្រឿងជិះគ្នា៣នាក់ ដែលសុទ្ធតែស្រីៗ ជាបងប្អូនបង្កើតនឹងគ្នា បើកបរក្នុងទិសដៅពីលិចទៅកើត ដើម្បីទៅកាន់មណ្ឌលបោះឆ្នោតមួយកន្លែង ដែលនៅក្បែរនោះ។
លុះពេលមកដល់កន្លែងកើតហេតុខាងលើ ដែលជាផ្លូវបំបែកជា៤នោះ ដែលមានចម្ងាយពីពីផ្ទះប្រមាណជាជាង ៥០ម៉ែត្រនោះ ក៏ស្រាប់តែមានម៉ូតូធំ ម៉ាក KTM ពណ៌ខ្មៅ ពាក់ស្លាកលេខ ភ្នំពេញ ១GJ-២២១៤ មួយគ្រឿង ដែលបើកបរដោយបុរសម្នាក់ក្នុងល្បឿនយ៉ាងលឿន មកបុកពេញទំហឹងបណ្តាលឱ្យក្រពឹតទ្វារខាងឆ្វេងម្ខាងតែម្តង តែមិនបង្កឲ្យមានអ្នកណាម្នាក់ រងគ្រោះថ្នាក់ឡើយ។
ក្រោយពេលកើតហេតុ កម្លាំងមានសម្ថកិច្ចក៏បានធ្វើការវាស់វែង និងយកទាំងរថយន្តម៉ាក Lexus GX300 និងម៉ូតូធំម៉ាក KTM ទៅដាក់លើចិញ្ចើមផ្លូវ និងធ្វើការដោះស្រាយគ្នា ដោយភាគីខាងម៉ូតូយល់ព្រមសងថ្លៃខូចខាតទៅដល់ភាគីរថយន្តចំនួន ៣០០ដុល្លារ ដើម្បីបញ្ចប់រឿងនៅនឹងកន្លែងកើតហេតុភ្លាមៗផងដែរ៕
ចែករំលែកព័តមាននេះ