រាជធានីភ្នំពេញ ៖ ស្ត្រី៣នាក់ជិះម៉ូតូមួយគ្រឿងម៉ាកហ្សុយស៊ូគីនិចកំពុងតែដើរលេងត្រូវជនសង្ស័យ៣នាក់ជិះម៉ូតូហុងដាឌ្រីមបានធ្វើសកម្មភាពឆក់ទូរស័ព្ទដៃបានសម្រេចហើយត្រូវជនរងគ្រោះជិះដេញតាមរួចធាក់ប្រដួលម៉ូតូត្រូវបានសមត្ថកិច្ចឃាត់បានម្នាក់ និង២នាក់ទៀតរត់ចូលក្នុងទឹកទន្លេបាត់ស្រមោល ហេតុការណ៍នេះបានកើតឡើងកាលពីវេលាម៉ោង១០យប់ថ្ងៃទី២៦ ខែកក្កដា ឆ្នាំ២០១៨ តាមបណ្តោយផ្លូវមាត់ទន្លេនៅចំណុចក្រោយផ្សារ AEON ស្ថិតនៅក្នុងសង្កាត់ទន្លេបាសាក់ ខណ្ឌចំការមន ។
សាក្សីដែលឃើញហេតុការណ៍បានអោយដឹងថា មុនពេលកើតហេតុគេបានឃើញជនរងគ្រោះស្រីៗគ្នា៣នាក់មិនស្គាល់អត្តសញ្ញាណជិះម៉ូតូមួយគ្រឿងម៉ាកហ្សុយស៊ូគីនិចមិនចាំស្លាកលេខ បើកបរតាមបណ្តោយផ្លូវមាត់ទន្លេក្រោយផ្សារ AEON ទិសដៅពីជើងទៅត្បូង ។
ខណៈជិះមកដល់ចំណុចកើតហេតុខាងលើក៏ស្រាប់តែលេចមុខជនសង្ស័យ៣នាក់ជិះម៉ូតូមួយគ្រឿងម៉ាកហុងដាឌ្រីម ពណ៌ខ្មៅ មិនចាំស្លាកលេខ បើកបរស្របទិសគ្នាបានជិះមកជនរងគ្រោះរួចក៏ធ្វើសកម្មភាពឆក់ទូរស័ព្ទដៃពីស្ត្រីរងគ្រោះបានសម្រេច ហើយបម្រុងនឹងជិះរត់គេចខ្លួន ប៉ុន្តែត្រូវជនរងគ្រោះជិះដេញតាមពីក្រោយរួចធាក់ប្រដួលម៉ូតូទើបដួលម៉ូតូទាំងជនរងគ្រោះ និងជនសង្ស័យភ្លាមៗនោះដែលសមត្ថកិច្ចក៏បានមកដល់កន្លែងកើតហេតុរួចអន្តរាគមន៍ឃាត់ខ្លួនបានម្នាក់យកទៅប៉ុស្តិ៍ទន្លេបាសាក់ដើម្បីសួរនាំ ។
រីឯបក្សពួក២នាក់ទៀតបានរត់ហើយលោតចូលក្នុងទន្លេបាត់ស្រមោលត្រូវបានកម្លាំងព្រហ្មទណ្ឌចំការមនស្រាវជ្រាវអស់រយៈពេលជិត១ម៉ោង ប៉ុន្តែនៅតែមិនឃើញជនសង្ស័យទៀត ។ ក្រោយពេលកើតហេតុជនសង្ស័យខាងលើនេះត្រូវបានសមត្ថកិច្ចកសាងសំណុំរឿងរួចបញ្ចូនទៅកាន់តុលាការដើម្បីចាត់ការទៅតាមនីតិវិធី ៕
ចែករំលែកព័តមាននេះ