រាជធានីភ្នំពេញ ៖ ម៉ូតូកង់បីឥណ្ឌាមួយគ្រឿងបើកលឿនរវល់អោនមើលទូរស័ព្ទឆ្លងផ្លូវបំបែកជាបួន ប៉ះជាមួយរថយន្តឈ្នួលឆ្លងផ្លូវខ្វែងគ្នាក៏ងាកចង្កូតគេចរថយន្ត បណ្តាលឲ្យកន្ទុយម៉ូតូ បោកនឹងស្តុបមុខខាងឆ្វេងរថយន្តបណ្តាលឲ្យបែករងការខូចខាតដែលហេតុការណ៍នេះដែលបានកើតឡើងកាលពីវេលាម៉ោង៩នឹង៣០នាទីយប់ថ្ងៃទី២៦ ខែកក្កដានេះ នៅផ្លូវប៉ាស្ទ័រ កែងនឹង៣៦០ សង្កាត់បឹងកេងកង៣ ខណ្ឌចំការមន ។
ម៉ូតូបង្កជាប្រភេទម៉ូតូកង់បីឥណ្ឌា ពណ៌ស ពាក់ស្លាកលេខ ភ្នំពេញ1GS- 6181 បើកដោយបុរសម្នាក់ដឹកភ្ញៀវបរទេសប្រុសម្នាក់ ។ ចំណែករថយន្តរងគ្រោះជាប្រភេទរថយន្តឈ្នួលម៉ាកសាំយ៉ុង ពណ៌ទឹកប្រាក់ ពាក់ស្លាកលេខ ភ្នំពេញ 2Q -3047 ដឹកភ្ញៀវជាកម្មករសំណង់ស្រីប្រុស ចាស់ក្មេង ពេញរថយន្ត ។
ប្រភពព័ត៌មានបានប្រាប់ឲ្យដឹងថា មុនកើតហេតុ គឺគេឃើញរថយន្តខាងលើធ្វើដំណើរតាមបណ្តោយផ្លូវប៉ាស្ទ័រ ក្នុងទិសដៅពីជើងទៅត្បូងដោយដឹកភ្ញៀវចេញពីស្តាតអូឡាំពិកគោលបំណងទៅខេត្តព្រៃវែង ហើយឆ្លងកាត់ផ្លូវនោះខណៈមកដល់កន្លែងកើតហេតុជាផ្លូវបំបែកជាបួនភ្លាមនោះរថយន្តបានឆ្លង៣៦០ ដល់ពាក់កណ្តាលផ្លូវស្រាប់តែមានម៉ូតូកង់បីបង្កបើកយ៉ាងលឿនតាមបណ្តោយផ្លូវ៣៦០ បើកជែងគេឯងឆ្លងផ្លូវប៉ាស្ទ័រក្នុងទិសដៅពីកើតទៅលិច ដោយសារ តែរវល់មើលទូរស័ព្ទក៏ប៉ះគ្នាជាមួយរថយន្តឈ្នួល ហើយម៉ូតូបង្កបានងាកចង្កូតគេចទៅខាងឆ្វេង បណ្តាលឲ្យកន្ទុយម៉ូតូបង្កបោកនឹងក្បាលរថយន្តបណ្តាលបែកស្តុបមុខផ្នែកខាងឆ្វេងរថយន្តរងការខូចខាត ចំណែកម៉ូតូបង្កក្រពឹតផ្នែកខាងក្រោយ ផ្នែកខាងឆ្វេងដូចគ្នា វិលមួយជុំត្រឡប់ក្បាលមកក្រោយ តែមិនបង្កឲ្យនរណាម្នាក់រងរបួសឡើយ ។
ភ្លាមៗបន្ទាប់ពីកើតហេតុ គឺភាគីទាំង២បានចុះមកចរចាគ្នាដោយខាងរថយន្តសុំស្មើតែខាងបង្កមិនព្រម ហើយថែមទាំងទាមទារខាងរថយន្តឲ្យសងការខូចខាតមកខ្លួនទៀត ដោយអះអាងថា ខាងរថយន្តជាអ្នកបុកគាត់ ភ្លាមៗនោះប្រជាពលរដ្ឋដែលធ្វើដំណើរឆ្លងកាត់ទីនោះដែលបានឃើញហេតុការណ៍ក៏ដូចជា ប្រជាពលរដ្ឋដែលរត់ម៉ូតូឌុបនៅចំណុចនោះបានបញ្ចេញប្រតិកម្មភ្លាមៗ ដោយចោទប្រកាន់ទៅខាងម៉ូតូជាអ្នកខុស បើកបរខ្វះការប្រុងប្រយ័ត្ននឹងជែងខុសផ្លូវចរាចរណ៍ទៀតទៅប៉ះជាមួយគេ ហើយគេចនឹងកៀររថយន្តគេបណ្តាលបែកហើយនៅទារគេឲ្យសងទៀត ហើយខាងប្រជាពលរដ្ឋគាំទ្រឲ្យខាងរថយន្តទារសំណងពីរខាងម៉ូតូកង់បីវិញ ។
ដោយមានការសម្របសម្រួលពីសមត្ថកិច្ចមូលដ្ឋានភាគីខាងរថយន្តទាំង២បានបញ្ចប់រឿងរ៉ាវ ដោយព្រមស្មើគ្នាដោយជួសជុលការខូចខាតរៀងខ្លួន ដើម្បីបញ្ចប់រឿង ៕
ចែករំលែកព័តមាននេះ